1 Kuriniu 6:13 - Sateré-Mawé

¹³ Iꞌewyte iraniaꞌin eipyꞌasetpe -Uimiꞌu kat hap yn atunug neran aat kaꞌap yne eꞌat katupono miꞌu yn aimowepiit kuap hap e hat. Maꞌato eiweꞌeg wo o miꞌu mesuwarotiat wywo yn eiꞌok hap. Miꞌu waku kahato wen maꞌato miꞌu yn watikat pote aimaꞌat hap toineꞌen katupono Tupana eropat hap yt watikat hin i. Meiũran aru Tupana timoma yne ahesyꞌat hap hawyi yt kan hamo i aimiꞌu kat hap. Yt eweikuap i kat hamo Tupana tunug aipiit apo. Taꞌi toikyꞌesat aito teropat hamo iꞌewyte toikyꞌesat aito tokyꞌe haria. Toikyꞌesat aipiit towatnuat e. Yt toikyꞌesat i aipiit watum yt iweꞌeg i rakaria pe iꞌewyte yt toikyꞌesat watum aipiit miꞌu kat hap yn kape. Uiwyriaꞌin waku watuwehum kahato Tupana kape aimiꞌu ete maꞌato yt naku i watunug miꞌu ahetupana wo. Iesui Aikaꞌiwat aipoi kuap kahato. Waku iwywo watikat aimiꞌu. Yne Tupana tum teran ahepe aimowepiit hamuat.

1 Kuriniu 6:13 ပူးပေါင်းရင်းမြစ်များ

Mateu 15:17

Pyno kat som watuꞌu aiwẽ puo hawyi toto aimeꞌen kape hawyi tuwẽtem aipiit puo yn e.

Mateu 15:20

Pyno meimewat koꞌi nug hap kaipyi ti miit mohun topyhuꞌat maꞌato mekewat watenuk yt watiposei wywuat hap wyti yt kat i topyhuꞌat imohun hap.

Maku 7:19

Katupono kat som teke eiwẽ pe yt putꞌok e hin i eipyꞌa piat pe maꞌato eimeꞌen pe putꞌok e hawyi tuwẽtem iraꞌyn eipiit pyi e.

Iuwãu 6:27

Eweikat kahato wyti miꞌu eimeꞌen moꞌok hamuat neꞌi e maꞌato miꞌi ti nem rakatnuat neꞌi e. Maꞌato waku eweikat miꞌu sese wuatꞌi eꞌat piat eimoieineꞌen hamuat e. Miꞌi yn wyti Miitꞌin Ykeꞌet tum kuap ehepe. Pywo Miitꞌin Ykeꞌet tum kuap katupono iꞌywot atipy piat waku kahato miꞌi nug hamo e.

Iuwãu 6:49

Saꞌawyꞌi ehaꞌaseꞌiꞌin tuꞌu man yahig note maꞌato mio miꞌi haria topap yne raꞌyn.

Humanu 12:1

Uheꞌywytꞌin uheꞌykeꞌetꞌin uheinytꞌin yt ahewaku hin pykai i Tupana aikyꞌe -Yt atiꞌatuꞌapiheg teran i miꞌiria e tuwepe ahetiat pe. Tupana miꞌatukyꞌe eipe pote ahẽtup ehepe uheꞌykeꞌetꞌin uheinytꞌin Iesui mohey haria Tupana eikyꞌe pote ewetum no eipiit tope eweikupteꞌen kahato imotypot haria wo. Aikotã saꞌawyꞌi wuaria tiꞌauka taꞌatuhũria Tupana motypot hamo hap ewy waku ewetum eipiit Tupana kape Tupana potpap nug hamo. Waku eheineꞌen hap imikyꞌesat ewy imotypot hap yn topyhuꞌat. Waku eipiit pyi tuwẽtem sehay Tupana motypot hap yn Tupana ewaku hap oktan aikotã waku watunug hap ewy. Aikaꞌiwat wakuat kahato pote waku watopyhuꞌat heropat sese haria wo.

Humanu 14:17

Maꞌato pywo pe ti Tupana topyhuꞌat Ahehakyeraꞌat hat yt aimiꞌu u hap kaipyi i yt ahesapo hy u hap kaipyi i. Tupana topyhuꞌat Aiporekuat no Topaꞌãu tutum ahepe hawyi. Ipaꞌãu yn ainug kuap toꞌywania koꞌi wo. Yt aheko miꞌu etiat ahehakyeraꞌat hap. Yt aheko i aimohãpyk kuap. Tupana Paꞌãu yn aimowepiit kuap. Aheko miꞌu u hap ete yt aimowepiit kuap i. Karãpe aiwanetup hap hewyry kahato kowoꞌi kowoꞌi hawyi Tupana Paꞌãu yn aimowepiit kuap. Aheko miꞌu ete eꞌat ete watiꞌatunug yne hawyi yt kat i te ahehakyeraꞌat hap are. Tupana yn ahehakyeraꞌat kuap.

Humanu 6:12

Saꞌawyꞌi aipiit mikyꞌesat saꞌag nakat po pe watopyhuꞌat kahato. Miꞌi hawyi aimikyꞌesat saꞌag nug hap yn aikaꞌiwat no topyhuꞌat. Aiwẽ pyi watunug saꞌag maꞌato mesup waku waĩ watoꞌe saꞌawyꞌi wuat aimikyꞌesat ete. Koitywy wẽtup miit ewywuat areineꞌen Tupana wywo waku watoꞌe.

Humanu 7:4

Pyno miꞌi hap kaipyi ti ahenoi ehepe iãꞌãkap wuo eipe Iesui mohey haria pe. Aito Iesui mohey haria mesup. Saꞌawyꞌi watikuap kahato mekewat Muisei woꞌonapin hap Iuteuria waĩꞌe hap koꞌi. Waku kahato miꞌi e hap ainapin hamuat. -Miꞌi e hap watunug yne hawyi ahehakyeraꞌat hap saꞌup toineꞌen watoꞌe saꞌawyꞌi aiwoꞌope. Miꞌi hawyi watunug neran kahato maꞌato wahãꞌãg kahato yne ahesaika hawe pykai watiꞌaparap aparap mekewat Tupana piat ainapin hap ete. Miꞌi pote Iesui ikuꞌuro aikawiatno aheiam muat. Iwywo iꞌewyte aikuꞌuro hap ewy toineꞌen. Tupana waĩꞌe hap waku wen maꞌato aito yt nakuaria i pote yt watunug kuap i. Saꞌawyꞌi wahãꞌãg kahato yne waĩꞌe hap nug hamuat. Mekewat waĩꞌe hap topyhuꞌat aikotã aheꞌaito aiwary ewy. Maꞌato aikuꞌuro Aikaꞌiwat Iesui upi hawyi yt watoineꞌen poꞌog i saꞌawyꞌi wuat po piat mekewat aheꞌaito aheharyꞌi ewywuat hap. Iesui upi aikuꞌuro maꞌato mesup Iesui wywo watuwẽtem guꞌuro pyi iwywo ipakup takaria Tupana mowepiit hamuat hap nug hamo watuwẽtem. Saꞌawyꞌi aheꞌaito aheharyꞌi waĩꞌe waĩꞌe yn ahepe maꞌato koitywy aikuꞌuro raꞌyn pote aheꞌaito aheharyꞌi saꞌawyꞌi wuat Iuteuria eko koꞌi yt waĩꞌe kuap i ahepe aikuꞌuro raꞌyn hap ewy pote. Mio yt aimuꞌe kuap i aheꞌaito aheharyꞌi ewywuat. Miꞌi iãꞌãkap ewy wẽtup miit ewy yn naꞌyn watopyhuꞌat Iesui piit wywo. Ikuꞌuro turan aikuꞌuro hap wy topyhuꞌat maꞌato Tupana tihep Iesui guꞌuro pyi iꞌewyte aito watuwẽtem iwywo hap ewy. Koitywy aheꞌaito aheharyꞌi Tupana Paꞌãu topyhuꞌat hap ewy. Miꞌi pote aheꞌaito pakup ehay upi watopyhuꞌat. Koitywy watunug Tupana mowepiit hap koꞌi. Tupana Paꞌãu ni aimoesaika imikyꞌesat wakuap nug hamuat. Saꞌawyꞌi wahãꞌãg kahato puretig nu kawiat miwan nug hamuat wen aipiit yt hesaika kahato i inug hamuat. Maꞌato mesup aheꞌaito aheharyꞌi pakup ewywuat Tupana Paꞌãu wywo raꞌyn watopyhuꞌat wẽtup piit ewy. Miꞌi pote ahesaika puretig pakup sehay nug hamuat are sehay iãꞌãkap puo.

1 Kuriniu 3:16

Eweikuap apo Tupana Paꞌãu yat sese eipe hap sio yt. Taꞌi Tupana yat sese koꞌi ti eipe. Tupana Paꞌãu eiam torannia imohey haria Iesui kaipywiat haria.

1 Kuriniu 6:15

Karãpe watomohey Iesui hawyi wẽtup piit ewy aipiit Iesui piit wywo. Miꞌi pote yt naku i watuwehik haryporia yt iweꞌeg i rakat ete ihainia yt iweꞌeg i rakat ete kat pote ti watoineꞌen Iesui piit ewywuat pote.

1 Kuriniu 6:19

Yt eweikuap i te aipiit Tupana motypot yat ewywuat toineꞌen hap. Tupana Paꞌãu eiam aito hap yt eweikuap i te Tupana toineꞌen aipiit pe hap.

2 Kuriniu 11:2

Uiwyriaꞌin tawa Kurintiu piaria areineꞌen eiꞌywot ewy. Eipe eweikupteꞌen uhakiꞌyt ewy yt karãpiat heꞌaito i te rakat ewy. Aikaꞌiwat Iesui toineꞌen aikotã uhakiꞌyt ehaytuwy ewy. Miꞌi pote uhehayꞌywyi kahato ehete. Yt atikyꞌesat i iraniaꞌin neꞌi eꞌaito wo. Atikyꞌesat Iesui yn eꞌaito wo. Taꞌi uhehayꞌywyi kahato ehete aikotã Tupana ihayꞌywyi hap ewy aikotã eꞌywot ewy areineꞌen uhakiꞌyt are.

2 Kuriniu 5:15

Tutum saꞌup yne Tupana pe aikyiꞌat hamo. Tohaꞌup nug yne hawyi Tupana watnuaria wo watoineꞌen. Koitywy Iꞌywot eropat haria watoineꞌen. Kat pote aikyiꞌat raꞌyn pote. Yt naku i watuweropat neꞌi. Waku poꞌog wateropat mekewat ikuꞌuro aikawiatno rakat.

Karasia 5:24

Pywo pe ti Aiporekuat Iesui po pe raꞌyn watopyhuꞌat pote mekewat aiwanetup hap aimikyꞌesat saꞌag koꞌi topap yne raꞌyn. Miꞌi hawyi yt iheg muo hin i aiminug saꞌag koꞌi tukupteꞌen. Katupono Iesui watno raꞌyn watopyhuꞌat pote.

Ewesu 5:23

Katupono eꞌaito topyhuꞌat eꞌakag wo Tupana wanetup hawe aikotã aikotã aipotypot Iesui Aiꞌakag wo topyhuꞌat hap ewy.