1 Kuriniu 15:10 - Sateré-Mawé

¹⁰ Hegyiꞌat kahato Tupana uhepe atikuap koitywy. Atikuap iwese hap hawyi yt atipun hin i uikyꞌe hap. Arepotpap poꞌog ipotpoꞌororia iraniaꞌin kai aikotã uikyꞌe hap oktan arepotpap uikyꞌe hap moherep hamo.

1 Kuriniu 15:10 ပူးပေါင်းရင်းမြစ်များ

Mateu 10:20

Katupono ti aru ehereto raꞌyn hap eꞌat pe ti aru yt eiwat sehay hin i tuwẽtem eiwẽ pyi maꞌato aiꞌywot atipy piat paꞌãu kaipyi ti aru tuwẽtem eiwẽ pyi ehehay.

Mateu 25:16

Miꞌi hawyi mekewat 500 iꞌa rakaria topo piat tuweꞌeg hap ewy tutunug. Miꞌi ti imowato kahato tokaꞌiwat etineiru iꞌoktan ne toiwyꞌinug. Miꞌi hawyi 1 miu iꞌa rakaria tuwemowato raꞌyn.

Humanu 11:1

Miꞌi pote apo are ehepe sio Tupana Iuteuria kyꞌe te sio yt sio toiꞌatupugha sio waureꞌe raꞌyn Iuteuria ywania kai temiitꞌin kai sio yt i te areꞌe. Yt rat paĩ toiꞌatukyꞌe kahato te miꞌiria e. Uito ti mekewat Iuteuria ywania kaipywiat hat pote atikuap kahato urukyꞌe hap paĩ. Atikuap kahato Tupana yt uruwaure hin i te hap. Uhaꞌaseꞌi pot ti mekewat Tupana mohey hat akag sese Aparãu are. Pywo ti rat uhaꞌaseꞌi Pesami ti Aparãu emiariru toineꞌen saꞌawyꞌi.

Humanu 12:3

Pyno uito Pauru Tupana uipoꞌoro einapin hamo. Tupana hegyiꞌat kahato hawyi uinug eimuꞌe hatno miꞌi pote worohoꞌonapin eipe. Yt naku i aiwanetup hawe -Uito poꞌog torannia kai aiꞌe hap kape. Waku -Uito en watoꞌoꞌewy kahato watoꞌe. Katupono aito wẽtup ok poꞌog imohey wẽtup ok yt maꞌato wẽtup sok yn aito pykai. Miꞌi pote yt ereꞌe kuap i -Uito poꞌog eikai hap ete.

1 Kuriniu 15:11

Miꞌi hawyi uruimoherep ehepe Tupana ehay Iesui etiat sio uito sio 12 ok takaria Tupana ehay yn Iesui etiat. Taꞌi wẽtup sehay yn uruwẽ pyi tuwẽtem katupono uruto wẽtup sehay moherep haria yn uruimoherep wote. Miꞌi tupono Iesui mohey haria sok eipe mesup urupoꞌoro hat mohey haria eipe pote.

1 Kuriniu 15:2

Pyno mio tã are worohoꞌomuꞌe saꞌawyꞌi wuat sehay wakuat sese ahenoi. Miꞌi eweimohey motꞌi pote Tupana miehakyeraꞌat koꞌi eweikupteꞌen maꞌato watomohey ran neꞌi pote yt e.

1 Kuriniu 3:10

Eipe Tupana motypot yat ewy eweikupteꞌen. Uito Tupana motypot yat ãkukag moꞌam hat ewy Uipoꞌoro hat mikyꞌesat ewy are. Hãpyk kahato atunug wuatꞌi nug kuap hat ewy. Waku yne hawyi iraniaꞌin inug ipiit. Iꞌewyte iraniaꞌin iꞌahik yi wo hap ewy. Miꞌi hap ewy atunug ehepe are. Katupono Tupana toꞌe -Eiweꞌeg wo o ewetunug uiꞌyat nug hap ete waku uiꞌe hap ewy ewetunug o e ahepe. Miꞌi pote waku watiꞌatumuꞌe miitꞌin hãpyk kahato ihay pywuat nuat yn.

1 Kuriniu 3:6

Uito areineꞌen hãꞌỹi koi hat Tupana ehay wo ewy worohoꞌomuꞌe mekewat eꞌat pe. Miꞌi turan aimuꞌe hat Apauru putꞌok e itote eimuꞌe hamo hap ewy hawyi toihuꞌi huꞌi uimikoi iãꞌỹi hap ewy hawyi iꞌatutag naꞌyn Tupana esaika hap wywo.

1 Kuriniu 4:7

Miꞌi pote kat hamo watoꞌe iraniaꞌin me -Uito poꞌog ekai katupono Tupana tum ahepe tomisepap kuap nug kuap hap. Yt aiwewi i watikuap wuatꞌi nug hamuat maꞌato Tupana miium kaipyi wahepap maꞌato yt pote yt kat i aikai. Pyno kat hamo ten -Uito poꞌog waku eikai watoꞌe aipyꞌa pe.

2 Kuriniu 12:11

Uiwyriaꞌin tawa Kurintiu piaria yt uimotypot hin i Tupana mikyꞌesat ewy kat pote saꞌawyꞌi Tupana uiꞌairo tehay wakuat moherep ehepiat hamo. Iesui potpoꞌororia 12 ok takaria ewywuat sese areineꞌen. Miꞌiria wakuat sese ewywuat areineꞌen Iesui potpoꞌoro wo. Uito wakuat miꞌiria ewywuat are. Yt uiweꞌeg hin i areꞌe mio tã are maꞌato uimohit pote mio tã are.

2 Kuriniu 3:5

Tupana miꞌairo uruto tehay moherep hamuat. Miꞌi pykai yt karãpe i urutoꞌe -Uruto poꞌog Tupana uruꞌairo yt urutoꞌe i. Iꞌewyte -Uruto poꞌog imohey haria iraniaꞌin kai pote Tupana uruꞌairo hap yt urutoꞌe hin i. Yt miꞌi tã ahehay hin i katupono uruesaika hap Tupana ehay moherep hamuat yt tuut i uruesaika hap kaipyi. Maꞌato Tupana urumoesaika tesaika hap kaipyi tomikyꞌesat nug hamuat. Tupana Paꞌãu tum tesaika hap uruepe. Yt uruwekaipyi hin i tuut uruesaika hap.

2 Kuriniu 6:1

Urutoria Iesui ehay moherep haria sese. Miꞌi pote koitywy uruhẽtup kahato ehupi. Eipe iꞌewyte uruꞌewy te wẽtup piit ewy yn Tupana wywo. Watuwepotpap kahato wuatꞌi ywania piat ikuap Haꞌyru etiat hamo. Pyno Tupana eropat haria aito pote uruhẽtup ehupi urupyꞌa pyi kahato. Yt eweikupteꞌen neiꞌo Tupana piat eikyꞌe hap ete iraꞌak takaria wo neꞌi. Tupana tum naꞌyn ehepe kat koꞌi kat koꞌi topotpap nug hamuat yt kat saꞌup i. Yt naku i Tupana miium ahepiat koꞌi watiporerokosap neꞌi. Yt naku i watipun imiium koꞌi.

Karasia 2:8

Taꞌi itotiaria tikuap kahato aikotã Tupana Paꞌãu toineꞌen kahato uhetiat hap iraniaꞌin ywania muꞌe Iesui etiat hap taꞌatukuap maꞌato iꞌewyte taꞌatukuap kahato aikotã Ipaꞌãu toineꞌen kahato Peteru kai uruꞌywania Iuteu ywania muꞌe Iesui etiat hamuat hap taꞌatukuap kahato. Miꞌi pote -Taꞌi aiꞌywania Iesui mohey haria muꞌe kahato hat sese Peteru iꞌatuꞌe maꞌato Pauru iꞌewyte te Tupana Paꞌãu ipotpap kahato ipiit pyi iraniaꞌin ywania muꞌe hamo Iesui mohey haria apykok hamo iꞌatuꞌe Ierusarẽi miaria imohey haria akag koꞌi.

Wiripu 2:13

Are paĩ Tupana tikyꞌesat kahato watunug tomikyꞌesat ewywuat hap. Miꞌi pote ainapin aat kaꞌap aiwanetup hawe kat som kat som waku watunug hap. Karãpe aiwẽ pyi yt watunug neran i imikyꞌesat koꞌi miꞌi hawyi perupꞌi popuo aimuꞌe aiwanetup hawe -Etunug o etunug o e. Miꞌi hawyi meiũran -Waku Uhyt waku Mimi watoꞌe Tupana pe katupono toikyꞌesat kahato tehay upiat watuwat hap.

Wiripu 4:13

Maꞌato yt uiwekaipyi i tuut uhesaika hap maꞌato Aipotypot Iesui kaipyi atipuẽti. Miꞌi ti kat e hap kat e hap etiat -Uimoesaika hap wuatꞌi etiat kuap hap ete uimowatetup are Tupana pe. Iꞌewyte waku kahato eipe miꞌi e hap ti ereꞌe Tupana pe.

1 Tesaronika 5:12

Uhytꞌiꞌin eweiꞌatumotypot o eimuꞌe haria eipyꞌasetpiaria. Mio tã urutoꞌe uruwese popuo. Yt eweiꞌatumohit neꞌi teiꞌo aiꞌapykok haria katupono Tupana minug aiꞌakag wuat ainapin hanuaria. Iꞌewyte aiporeroto muap hãpyk takat kapiat haria.

1 Timoteu 4:10

Wuatꞌi tomohey haria Ehakyeraꞌat hat Miꞌi are ti epe paĩ. Miꞌi ti aimiekatup sese. Miꞌi kape yn watuwepotpap watuwesoꞌopot waku.