1 Kuriniu 14:26 - Sateré-Mawé

²⁶ Uiwyriaꞌin uheinytꞌin koitywy worohoꞌomuꞌe teran aikotã aikotã waku watimotypot Tupana aiwoꞌoꞌatunug hap ete. Waku ikahu kahato watimotypot Tupana. Waku pe yn waku ahehay itote. Waku watikat Tupana mohey hat wẽtup ok aimuꞌe kahato hat itotiat Tupana motypot wepy hap ete. Miꞌi hawyi waku wẽtup ok aimuꞌe itote Tupana ehay miwan myi. Miꞌi hawyi wẽtup ok itote ihay kahato Tupana wẽ ewy Tupana ainapin hap sese moherep hamo Tupana toꞌe hap ewy. Miꞌi hawyi waku wẽtup ok aimuꞌe Tupana pusu puo sio toineꞌen itote wẽtup ok atipy piaria pusu kuap hat imoherep ahepe aipusu puo kat e kat e hap koꞌi ete. Miꞌi pote aimoesaika kahato Tupana mohey hap ete Tupana pusu puat. Atipy piaria pusu puo ihay rakat waku wẽtup ok yn hawyi waku wẽtup ok imoherep hat ihay iwywo kat toꞌe kat toꞌe e hap wuatꞌi pusu puo.

1 Kuriniu 14:26 ပူးပေါင်းရင်းမြစ်များ

Humanu 1:13

Saꞌawyꞌi areꞌe Tupana pe -Areto teran tawa wato Huma kape katupono uheinytꞌin uheꞌywytꞌin Esaꞌyru mohey haria kapiat araꞌakasa hamo are. Maꞌato ahãꞌãg hawyi toineꞌen uipyhyp pyhyp hap kat koꞌi kat koꞌi uikosap hamo. Uiwyriaꞌin areto teran ehewowi. Miꞌi hap o yt eweiwaure teiꞌo katupono worohoꞌomoesaika teran eiperia Iesui mohey hap ete. Iraniaꞌin ywania aikopiat aikopiat kape areto kahu raꞌyn mote areto teran ehewowi eikuap hamo. Maꞌato uipyhyp pyhyp kat koꞌi kat koꞌi ehowawiat uikosap hamo. Koitywy iraniaꞌin miꞌiria teꞌeropyhuꞌat Iesui mohey haria itag nakaria wo raꞌyn. Miꞌi hap ewy atikyꞌesat ehetama pe wy. Yt uheso hin i miꞌi pote ahãꞌãg i ahãꞌãg i kahato ehewowi wen maꞌato yt putꞌok are i te ehewowi eimotag.

Humanu 12:7

Maꞌato tutum ahepe tesaika hap teropat hap miitꞌin powyro hamo pote waku watuwepotpap kahato heropat nug hap ete. Maꞌato tutum ahepe miitꞌin muꞌe kuap hap miꞌi pote waku watiꞌatumuꞌe miitꞌin hesaika hap wywo.

Humanu 14:19

Miꞌi pote waku watikat kahato muap aiwoꞌowese hap nug hamo. Waku watopyhuꞌat woꞌowese haria wo. Waku watikat kahato muap aiwoꞌomopoĩꞌam hamuat are. Waku watikat muap aiwoꞌope aiwoꞌomoesaika Iesui ehay wo imohey poꞌog hamuat hap ete.

Humanu 15:2

Poꞌog waku iraniaꞌin Iesui mohey haria mowepiit hatno watopyhuꞌat. Waku watikat iraniaꞌin Iesui mohey haria waku piat hap are. Waku watiꞌatumotag neran Iesui mohey hap ete iraniaꞌin.

1 Kuriniu 14:15

Pyno aikotã waku watunug ahenoi epe. Waku ahehay Tupana kape aipyꞌa pyi Tupana pusu puo waku maꞌato poꞌog waku ahehay Tupana kape aiwanetup hawyi aipusu puo. Iꞌewyte waku watuwepy Tupana kape Tupana pusu puo maꞌato poꞌog waku watuwepy Tupana kape aiwanetup hawyi aipusu puo.

1 Kuriniu 14:2

Katupono karãpe ahehay Tupana wywo ipusu puo yt uwe i mesuwarotiat aikuap yt miitꞌin pusu ewywuat i pote yt aiwanetup hap kaipyi i ahehay pote maꞌato Tupana wanetup hap ewy ahehay Tupana pusu ewy ahehay pote yt uwe i mesuwe ikuap.

1 Kuriniu 14:27

Maꞌato miꞌi hawyi miꞌiria aimuꞌe turan waku wẽtup ok aimuꞌe aipusu puo kat som toꞌe kat som toꞌe hap ete.

1 Kuriniu 14:40

Miꞌi hawyi karãpe watiꞌatunug watuwaꞌatunug Tupana motypot hamo hawyi waku hãpyk puo watunug. Watimotypot waku pe kahato imotypot yat pe are uito Pauru.

2 Kuriniu 12:19

Yt karãpe i eipyꞌasetpe urutukupteꞌen turan paa urutoꞌe -Watiꞌatumaꞌat miꞌiria yt urutoꞌe i. Yt urueso i rat iꞌewyte Tupana tikuap yt urueso i hap. Iꞌewyte Aikaꞌiwat Iesui tikuap yt urueso i hap. Katupono yne uruminug koꞌi eimoesaika imohey hap etiat hamo. Miꞌi pote yt urueso i.

2 Kuriniu 13:10

Atikyꞌesat kahato ehehãite imohey hap ete putꞌok uiꞌe turan. Hãpyk Tupana eko ewy hap atikyꞌesat. Miꞌi pote worohoꞌonapin miwan me yt areineꞌen i te eipyꞌasetpiat turan. Poꞌog waku uiwanetup hawe worohoꞌonapin miwan me aiwoꞌoꞌewa piat hap kai. Kat pote atiꞌairo kuap uiꞌe hap. Miꞌi hawyi yt kat i uhehay uimiwan me eimohit hap. Yt karãpe i worohoꞌomohit teran eipe. Worohoꞌomotag yn neran Aikaꞌiwat mohey hap ete. Katupono saꞌawyꞌi Tupana tum uhepe tesaika hap tomohey haria napin uhepiat hamo iꞌatumoesaika imoheg hap etiat hamo.

Ewesu 4:12

Wẽtup ok pe wẽtup ok pe tutum tesaika hap tomisepap koꞌi yt uwe minug kuap i nug hamuat hap tutum e. Pyno yt toꞌoꞌewyꞌewy hin i toimoꞌẽ tesaika hap tomisepap nug hamuat koꞌi tominug kuap hap ewywuat nug hamuat hap koꞌi are. Taꞌi toimoꞌẽ kahato ahepe tomiium koꞌi are. Yt toꞌoꞌewyꞌewy hin i tutum. Ewat emikuap uiat uimikuap Tupana miium koꞌi aimisepap koꞌi yt toꞌoꞌewy hin i are. Tomohey haria moweꞌeg hamo tutum tesaika hap ahepe topotpap nug kuap hamo tutum e. Tupana tikyꞌesat kahato aito tomipoꞌoro koꞌi Tosaꞌyru Iesui ewywuat e. Miꞌi pote aimoesaika Tosaꞌyru Paꞌãu wo topotpap nug hamuat.

Ewesu 4:16

Saꞌawyꞌi aito wuꞌuka yne ywania wywuat haria aito wuatꞌi ewanikaptia wo watukupteꞌen. Pya kahato watukupteꞌen Tupana kai aito torannia. Aipiit ete ipoityꞌi ahaga koꞌi maꞌato wẽtup piit yn watoineꞌen aito wẽtup piit yn aito. Yt tuweran hin i maꞌato ahaga koꞌi. Toꞌosat kahato ahaga koꞌi. Miꞌi hawyi aipiit iheg aipiit wẽtup yn. Aipuꞌi aikag koꞌi ahaga toꞌosat toꞌoete kahato. Karãpe watunug Aiꞌakag Iesui mikyꞌesat ewy hawyi watopyhuꞌat aikotã haga koꞌi ewy ipiit ewy. Miꞌi hawyi wahewyry aikotã ihãite rakat ewy. Karãpe aito Iesui mohey haria watoꞌokyꞌe yne yne aiwoꞌope miꞌi hawyi watoꞌopowyro miꞌi hawyi watopyhuꞌat aito Iesui piit ihãite rakat ewy.

Ewesu 4:29

Waku ahehay hẽꞌẽ rakat ewy are. Waku iwese kahato rakat ewy watoineꞌen. Waku iraniaꞌin mowepiit ahehay kuap hanuaria watikuap are. Miꞌi tã watunug mote pywo iꞌatuꞌe hamo ahehay kuap haria. Miꞌi hawyi ahehay kuap haria poityro hat ewy watopyhuꞌat. Yt naku i watopotkuasa ahehay wo. Yt naku i watipoepyk ahehay wo are.

Ewesu 5:19

Eiwoꞌomuꞌe ro morekuat Tawi wepy hap koꞌi ete saꞌawyꞌi wuat koꞌi ete. Waku watimotypot Tupana wepy hap wywo. Waku watuwepy Tupana Paꞌãu kaipyi aiwehum hap wywo. Waku wepy nug haria wo watukupteꞌen Aikaꞌiwat motypot hap koꞌi wywo watoineꞌen.

1 Tesaronika 5:11

Miꞌi tupono ti waku watoꞌomoesaika watoꞌomowepiit tuut aru Iesui aiꞌe hap ete. Taꞌi atikuap taꞌyn eipe miꞌi hap nug haria raꞌyn are. Miꞌi yn uruikyꞌesat poꞌog.