1 Kuriniu 13:8 - Sateré-Mawé

⁸ Watiꞌatukyꞌe sese miitꞌin pote mesup mukiꞌite wuatꞌi eꞌat pe watiꞌatukyꞌe poꞌog poꞌog hap ewy. Tupana ihay tuereto aiwẽ pyi tehay wo watimoherep kahato. Maꞌato meiũran Tupana ewywuat raꞌyn watoineꞌen atipy pe hawyi yt kat hamo i ihay aiwẽ pyi katupono aimuꞌe hat no toineꞌen atipy pe ihay maꞌato miitꞌin kyꞌe hap Tupana kyꞌe hap topyhuꞌat itote wuatꞌi eꞌat pe. Miꞌi pote mesup te Tupana tum ahepe tesaika hap wuatꞌi pusu kuap hamo. Maꞌato atipy pe torannia itotiaria wuatꞌi ywania pusu kuap haria tukupteꞌen maꞌato Tupana kyꞌe hap miitꞌin kyꞌe hap itote topyhuꞌat wuatꞌi eꞌat pe.

1 Kuriniu 13:8 ပူးပေါင်းရင်းမြစ်များ

Iruka 22:32

Pyno ahẽtup kahato Uiꞌywot pe emoesaika hamo. Miꞌi hawyi karapeĩ eraꞌaipok uhowowi i raꞌyn aru miꞌi hawyi etiꞌatumoesaika o ewyriaꞌin uimohey haria iꞌatuiãꞌãg hap turan e Iesui Peteru pe.

Iesui Potmuꞌeria 13:1

Miꞌi hawyi tawa Antiokia pe tukupteꞌen Iesui mohey haria. Iꞌewyte iꞌatumuꞌe haria Tupana ehay wuat ihay rakaria tukupteꞌen. Wẽtup ok mehin Panape hawyi wẽtup ok Simeãu iꞌatuwẽpowat Tapaiunꞌã iꞌatuꞌe hap. Wẽtup Irusiu tawa Sirene kaipywiat. Wẽtup ok Manaꞌẽ morekuat Eroti ty mepyt watꞌypꞌi hawyi wẽtup ok Pauru mekewat saꞌawyꞌi Iesui mohey haria auka hat miꞌi hawyi toran naꞌyn itotiaria atumuꞌe haria.

Iesui Potmuꞌeria 19:6

Miꞌi hawyi Pauru tuweponug miꞌi hawyi Tupana Paꞌãu wakuat putꞌok e raꞌyn iꞌatuete. Miꞌi hawyi taꞌatumoherep kahato Tupana ehay iraniaꞌin pusu puo.

Iesui Potmuꞌeria 2:4

Miꞌi ti Tupana Paꞌãu tuwehik Iesui mohey haria ete. Miꞌi kaipyi kat pusu kat pusu puo iꞌatuehay kahato Tupana Paꞌãu kaipyi. Iraniaꞌin pusu taꞌatusepap taꞌyn iꞌatuehay kuap taꞌyn yt taꞌatuwat taꞌatupusu pykai i kat pote Tupana Paꞌãu kaipyi pote taꞌatukuap. Taꞌi Tupana Paꞌãu ihay kahato iꞌatuwẽ pyi yt iꞌatumikuap wuat pykai. Katupono Tupana ihay iꞌatuewowi topusu puo.

1 Kuriniu 12:10

Miꞌi hawyi Tupana Paꞌãu tum tesaika hap wẽtup ok pe Tupana ewywuat yt uwe misepap i nug hamo. Wẽtup ok pe tutum tesaika hap Tupana wanetup hap moherep hamuat hawyi Tupana wẽ wo raꞌyn toineꞌen hap. Miꞌi hawyi wẽtup ok pe Tupana Paꞌãu tum tesaika hap wuatꞌi kuap hamuat pywo sio yt hap kuap hamuat sio Tupana Paꞌãu kaipyi ihay sio ahiag ihay wẽtup ok miit ete hap kuap hamo. Iꞌewyte tutum wẽtup ok miit pe tesaika hap wẽtup ywania pusu puat iꞌatumuꞌe hamuat yt toikuap pykai i hap. Wẽtup ok pe tutum tesaika hap wẽtup ywania pusu moherep hamo aipusu puat imoherep hamo.

1 Kuriniu 13:10

Pyno koitywy watikuap ipatꞌok yn maꞌato meiũran wuatꞌi kuap hap tutum ahepe tomikuap oktan. Koitywy wahepap kurin Tupana sepap nug hamo wen maꞌato atipy pe watunug kuap yne hap ewy.

1 Kuriniu 13:13

Pyno mesuwarotiat toineꞌen myẽꞌym nakat yn yt karãpe i ikahuro rakat. Wẽtup aiwoꞌomohey hap wẽtup -Waku pe aru topyhuꞌat e hap wẽtup aiwoꞌokyꞌe hap. Myẽꞌym miꞌiria wuatꞌi eꞌat piaria waku rakat. Wẽtup poꞌog torannia kai miꞌi ti aiwoꞌokyꞌe sese hap. Pyno waku watoꞌe Tupana pe -Uinug o woꞌokyꞌe hatno waku watoꞌe. Miꞌi hap Tupana wywuat miitꞌin nywuat aiwoꞌopotkyꞌe hap poꞌog hesaika torannia kai areꞌe.

1 Kuriniu 14:39

Uiwyriaꞌin waku wahẽtup yne aipyꞌa pyi -Tupana uinug o ewẽ wo ehay moherep miitꞌin miat hamo watoꞌe. Iꞌewyte waku watoꞌe Tupana pusu puat ihay teran nakat pe -Waku mana waku uhyt watoꞌe. Yt etipyhyp teiꞌo miꞌiria.

1 Kuriniu 8:2

Miꞌi tupono karãpe -Uito poꞌog atikuap e hat putꞌok e ahete hawyi yt aiweꞌeg i hap topyhuꞌat katupono mesuwat yi totiat yt uwe i topyhuꞌat ikuap yne hat. Miꞌi tupono waku watopyhuꞌat -Atikuap teran e haria wo -Uimuꞌe ro e haria wo.

Karasia 5:6

Maꞌato Aikaꞌiwat Iesui ahehakyeraꞌat teran haype Tupana yt tuwanetup hin i mekewat seko aiwemusin ãpy sokpe tek hap kape neꞌi. Maꞌato toiehakyeraꞌat kuap miitꞌin yne sio hemusin ãpy sokpe tek hap toĩ sio yt sio Iuteuria sio yt miꞌiria i waku yne. Toimohãpyk kuap wuatꞌi ywania katupono kat seko kat seko kape neꞌi yt ihaꞌat hin i maꞌato tehaꞌat tomohey hap sese kape yn. Tokyꞌe ahepiat hap aikawiat toineꞌen sio yt watikyꞌe i hap kape yn taꞌakasa.

Epereu 8:13

Aikotã nem nakat ewy aiwoꞌowese saꞌawyꞌi wuat hap topyhuꞌat aikotã ikuꞌuro rakat ewy ipotꞌi rakat tuweityk hap ewy raꞌyn. Miꞌi hawyi ipakup aiwoꞌowese hap topyhuꞌat mekewat eꞌat pe waku kahato rakatno e Tupana saꞌawyꞌi miwan me aipytꞌatnug Topaꞌãu wuat hap ete Iesui Paꞌãu aipiit piat hap ete.