1 Kuriniu 12:11 - Sateré-Mawé

¹¹ Tupana Paꞌãu wẽtup yn toineꞌen pykai iꞌatu kahato tomisepap nug hap koꞌi tukupteꞌen. Tutum ahepe tomisepap nug kuap hap Topaꞌãu kaipyi. Maꞌato yt ewy hin i toimoꞌẽ ahepe. Tomikyꞌesat ewy tutum ahepe tomisepap nug kuap hap koꞌi. Wẽtup ok aipyꞌasetpiat pe tutum wẽtup tomisepap nug kuap hap hawyi wẽtup aipyꞌasetpiat pe wẽtup tomisepap nug kuap hap tutum e. Yt toꞌoꞌewyꞌewy hin i toiꞌatumoꞌẽ tomisepap nug kuap hap ahepe.

1 Kuriniu 12:11 ပူးပေါင်းရင်းမြစ်များ

Mateu 11:26

Taꞌi Uiꞌywot En ni etunug naꞌyn aikotã paa e haria pe uimoherep kahato raꞌyn en emikyꞌesat ewy.

Mateu 20:15

Waku uhekat wywo atunug uimikyꞌesat ewy uhegyiꞌat hap oktan e. Ehaꞌywyi uhegyiꞌat uhekat wywo pote e ipotpap aat rakaria pe e.

Iuwãu 3:27

Miꞌi hawyi Iuwãu tiꞌatuwesat -Uiwyriaꞌin Tupana atipy piat ieineꞌen hat yn wyti hum kuap ahepe tomikyꞌesat ewy nug hamo. Koran som hap oktan Tupana tum ahepe rakat yn waku watunug are e.

Iuwãu 3:8

-Pyno Tupana Paꞌãu kaipyi yn Tupana mepytno erepyhuꞌat. Miꞌi etiat enoi hamuat niatpo kahato maꞌato aikotã ywytu hewyry tomikyꞌesat ewy kahato hap ewy e. Ipuehay watikuap kahato wen maꞌato aikope pyi wasere tuut hap yt uwe i ikuap iꞌewyte ito hap yt uwe i ikuap. Miꞌi hap ewy Tupana Paꞌãu tomoherep pakup i miitꞌin tomikyꞌesat ewy e. Yt heremo i Tupana Paꞌãu ywytu ewy maꞌato putꞌok e hawyi watikuap Tupana raꞌyn Tupana saꞌyru wo Tupana sakiꞌyt no teꞌeropyhuꞌat e.

Iuwãu 5:21

Iꞌywot tiꞌatumoieineꞌen pakup i map haria. Miꞌi hap ewy ti Haꞌyru tiꞌatumoieineꞌen tomiꞌairoria koꞌi e.

Humanu 12:6

Pyno wẽtup ok imohey hat pe Tupana tum tesaika hap topotpap nug hamuat maꞌato wẽtup ok pe wẽtup sepap hap tutum. Yt toꞌoꞌewy hin i tutum ahepe aimikuap koꞌi aimisepap nug hap koꞌi. Maꞌato Tupana tum yne miꞌi koꞌi ahepe tegyiꞌat pote haype. Tutum neꞌen neꞌi yt kat saꞌup i. Wẽtup ok pe tutum tesaika hap tehay moherep hamuat. Tutum ahepe pote pyno waku watimoherep ihay imohey hap mywo imohey hap oktan.

Humanu 9:18

Miꞌi pote mesup te Tupana topyhuꞌat iwese rakatno tomikyꞌesat oktan maꞌato iraniaꞌin ipyꞌahak takaria pe toiꞌatumopyꞌahak poꞌog neꞌi tuwepyi tomikyꞌesat ewy.

1 Kuriniu 12:18

Miꞌi pote Tupana yt ainug i wẽtup yn ahaga aipiit maꞌato iꞌatu kahato ahaga ainug wẽtup piit kaipyi yn pykai. Pywo ti tomikyꞌesat ewy ainug.

1 Kuriniu 12:4

Pyno yt aiwoꞌoꞌewy hin i wẽtup yn Tupana Paꞌãu aipyꞌa pe pykai katupono Tupana Paꞌãu tum ahepe tesaika hap yt toꞌoꞌewyꞌewy hin i toimoꞌẽ wuatꞌi nug hamuat wẽtup yn Tupana Paꞌãu toineꞌen pykai.

1 Kuriniu 12:6

Aipotpap hap koꞌi yt toꞌoꞌewyꞌewy i Tupana potpap nug hap. Maꞌato miꞌi pykai wẽtup yn aimisepap koꞌi ium hat. Miꞌi hat ti Tupana are.

1 Kuriniu 7:17

Mesup ti koitywy Tupana aiꞌairo Aikaꞌiwat emiit sese wo. Waku kahato watoineꞌen. Maꞌato miꞌi pykai aikotã saꞌawyꞌi watoineꞌen hap ewy te. Saꞌawyꞌi Iuteu ywania aito pote mesup te Iuteu ywania watoineꞌen e. Saꞌawyꞌi tapyiꞌa ywania watoineꞌen iꞌewyte mesup te tapyiꞌa wo watoineꞌen. Saꞌawyꞌi watoineꞌen wẽtup ok eropat hatno pote watomohey Iesui hawyi miꞌi hap ewy te topyhuꞌat rẽ mesup koitywy heropat hat watoineꞌen ne. Miꞌi pote worohoꞌonapin neran eipe Iesui mohey haria pakup koꞌi Tupana miꞌairo pakup koꞌi. -Eweimohey Iesui hawyi waku eweikupteꞌen no aikotã watoineꞌen watimohey Iesui hap eꞌat pe aiꞌairo hap eꞌat pe hap ewy waku watukupteꞌen ne.

1 Kuriniu 7:7

Uito areineꞌen yt iharyꞌi rakat i. Uito Pauru Tupana mikyꞌesat ewy areineꞌen are. Miꞌi hap atipuẽti waku kahato. Miꞌi pote atikyꞌesat iraniaꞌin uiꞌewy yt iharyꞌi i rakat i ewy taꞌatukyꞌesat pote. Miꞌi tã Tupana tikyꞌesat uito wen toĩ iraniaꞌin yt uiꞌewy hin i katupono miꞌiria iharyꞌi kahato rakaria wo Tupana tikyꞌesat.

2 Kuriniu 10:13

Uruto eiꞌapykok haria pykai yt karãpe i urutoꞌe uruwanetup hawe -Uruto poꞌog eikai yt urutoꞌe i iraniaꞌin eipyꞌasetpiaria -Uruto poꞌog e haria ewy. Tupana uruꞌairo eheropat haria ewy yn. Yne uruewaku hap koꞌi uruepiat sepap hap koꞌi yt kat i tuwẽtem uruwekaipyi neꞌi.

Ewesu 1:11

Yne tomikyꞌesat ewy Tupana saꞌawyꞌi aiꞌairo raꞌyn tomikyꞌesat ewy. Miꞌi hawyi ainug tosakiꞌytꞌin no tosaꞌyruꞌin no Aheykeꞌet Aikywyt Iesui ewywuat ainug wẽtup miit mepytꞌin koꞌi ewywuat ainug naꞌyn aito watimohey Iesui hawyi. Tomikyꞌesat ewy tutum aru ahepe topowatꞌyp yne yne. Hekat kahato rakaria wo watopyhuꞌat wuatꞌi eꞌat pe aikotã toꞌe saꞌawyꞌi wuat hap ewy raꞌyn tutum ahepe.

Ewesu 4:7

Miꞌi hawyi wẽtup ok pe wẽtup ok pe tomohey haria pe toimoꞌẽ tomisepap koꞌi nug hap tomikyꞌesat ewy. Toiꞌatumoꞌẽ ahepuo tomisepap nug hap ipotpap koꞌi nug hamuat. Aipotypot Iesui mikyꞌesat ewy Tupana tiꞌatumoꞌẽ tomisepap koꞌi ahepe.

Epereu 2:4

Katupono Aikaꞌiwat Iesui tiꞌatupowyro kahato tosaipepiaria tehay enoi hanuaria hawyi tutum tesaika hap iꞌatuepe. Topaꞌãu tutum tomisepap koꞌi ewywuat nug hamuat. Toipywo kahato tehay iꞌatuwẽ piat katupono taꞌatunug imisepap yt miitꞌin misepap ewy hin i ipaꞌãu esaika hap wywo. Miꞌi hawyi iꞌatupiit pyi tuwẽtem hesaika hap miitꞌin moehãite hamuat. Iꞌatupo iꞌatupiit pyi taꞌatunug kahato miitꞌin yt ewy hin i miitꞌin mowanetup hamo miitꞌin waꞌakasa hamo. Miꞌi hap kape teꞌerahaꞌat iꞌatuesaika hap kape hawyi pywo iꞌatuꞌe. Tutum Topaꞌãu iꞌatuepe topotpap nug waku kahato hamo. Tomikyꞌesat ewy toimoꞌẽ yne tesaika hap iꞌatuepe.

Tiaku 1:18

Tehay pywuat sese wo ainug tomepytꞌin koꞌi. Miꞌi hawyi aito watopyhuꞌat Tupana mowepiit kahato haria aikotã aimikoi pakup haat rakat aimowepiit hap topyhuꞌat. Miꞌi hap ewy aito Iesui mohey haria watopyhuꞌat Tupana mowepiit hanuaria wo sese katupono -Poꞌog poꞌog uimikyꞌeria eipe torannia uiminug koꞌi kai e Tupana ahepe tosaꞌyruꞌin me tosakiꞌytꞌin me.