1 Kuriniu 1:18 - Sateré-Mawé

¹⁸ Taꞌi ariaꞌyp posak etiat Iesui ikuꞌuro ahetianuat enoi hap ti yt hee hin i mekewat hoꞌowasat rakaria pe -Yt eweꞌeg hin i ti iꞌatuꞌe neꞌi ahepe. Maꞌato aito Iesui mikyꞌeria pe ti hee kahato raꞌyn katupono watikuap taꞌyn hesaika kahato mekewat sehay hap.

1 Kuriniu 1:18 ပူးပေါင်းရင်းမြစ်များ

Iesui Potmuꞌeria 13:41

Katupono ti aru mekewat eꞌat pe uito atunug eipyꞌasetpe wakuap iwato kahato yt wẽtup ewywuat i iwato rakat atunug maꞌato eweiꞌakasa hawyi ti aru iꞌewyte eweikuap hawyi ti aru maꞌato yt eweimohey i e Tupana saꞌawyꞌi e. Taꞌi yian mete ti Tupana henoi ehetiat uiꞌywania Apakuki 1.5 pe tohenoi e Pauru Iuteuria pe.

Iesui Potmuꞌeria 17:18

Miꞌi hawyi itotiaria woꞌonapin hat potmuꞌeria tokokaꞌat Pauru kape ihay kuap hamo. Miꞌi hawyi teꞌeroꞌe toꞌope muap upi -Toꞌiro ihay aat kaꞌap takat ehay kuap hamo iꞌatuꞌe. Taꞌi miꞌi ti wẽtup ywania kawiat tupanaria moherep hat iꞌatuꞌe toꞌope katupono Pauru henoi itote Iesui etiat aikotã guꞌuro pyi tuwẽtem i hap etiat.

Iesui Potmuꞌeria 17:32

Mio tã e hawyi iraniaꞌin toꞌokyryꞌi kahato Pauru ete. Guꞌuro pywiat ieineꞌen i wat e hap ete. -Toran naꞌyn uhyt iꞌatuꞌe apuete. Taꞌi uruikuap ti aru wẽtup eꞌat pe mio eꞌe hap etiat iꞌatuꞌe iraniaꞌin Pauru pe.

Iesui Potmuꞌeria 2:47

Teꞌeruwehum kahato haype Tupana kape aat kaꞌap. Miꞌi pote iraniaꞌin Ierusarẽi miaria teꞌeruwehum miꞌiria kape -Taꞌi Iesui mohey haria ti waku pe tukupteꞌen iꞌatuꞌe. Taꞌi miꞌiria hegyiꞌat rakaria paĩ iꞌatuꞌe. Miꞌi pote ti Aipotypot Iesui tiꞌatuwyꞌinug kahato yne eꞌat tomohey haria tomiehakyeraꞌat pakup i koꞌi.

Humanu 1:16

Miꞌi pote rat yne uhesaika hap wywo ahãꞌãg neran ehowawiat areto hamo wen. Katupono sehay wakuat Iesui etiat hesaika kahato rakat aikotã Tupana esaika hap oktan ne. Aikotã pureke koꞌi esaika hap ewy Iesui etiat sehay. -Pywo ti rat uwe uwe timohey raꞌyn Iesui miꞌi hat Tupana miehakyeraꞌat wo topyhuꞌat sio wuatꞌi miitꞌin eropat haria sio wuatꞌi miitꞌin akagnia koꞌi toiꞌatuehakyeraꞌat kuap torannia Tosaꞌyru mohey haria areꞌe raꞌyn wuatꞌi ywania pe. Saꞌawyꞌi waku Iuteu ywania kape watimoherep Iesui etiat miꞌi hawyi waku iraniaꞌin yt Iuteu i ywania kape watimoherep Aipotypot Iesui. Hesaika kahato mesuwat sehay Iesui etiat are. Iesui etiat sehay pupi ti yt aremoti hin i imoherep hamo.

1 Kuriniu 1:21

Katupono saꞌawyꞌi wuat weꞌeg kahato haria ikuap teran Tupana maꞌato yt putꞌok e i iꞌatuweꞌeg hap Tupana kuap hamuat hap. Katupono koitywy Tupana tikyꞌesat kahato mekewat yt iꞌatuweꞌeg i hap kaipywiat ariaꞌyp posak etiat neꞌi ikuꞌuro rakat mohey haria ehehakyeraꞌat hamuat hap. Poꞌog Tupana iweꞌeg miitꞌin kai Katupono Tupana mikyryꞌi wo toineꞌen miitꞌin weꞌeg kahato hap e.

1 Kuriniu 15:2

Pyno mio tã are worohoꞌomuꞌe saꞌawyꞌi wuat sehay wakuat sese ahenoi. Miꞌi eweimohey motꞌi pote Tupana miehakyeraꞌat koꞌi eweikupteꞌen maꞌato watomohey ran neꞌi pote yt e.

1 Kuriniu 2:14

Maꞌato iraniaꞌin yt Tupana Paꞌãu yt eiam i koꞌi ti -Yt iꞌatuꞌe neꞌi Tupana ehay pywuat aiwẽ piat ete katupono miꞌiria yt kat kuap i Tupana miium Topaꞌãu wakuat kaipywiat. -Yt kat hamo i ehay iꞌatuꞌe Tupana pe. Taꞌi aimienoi Tupana Paꞌãu kaipywiat ete ti teꞌeruwekyryꞌi neꞌi. Yt taꞌatukuap i kahato Tupana miium koꞌi ikahu rakat pykai katupono Tupana Paꞌãu yt toineꞌen i iꞌatupyꞌa pe ikuap hamuat.

1 Kuriniu 2:2

Mio tã are uiwepe -Mesuwe Iesui yn atimoherep miitꞌin me hawyi iraniaꞌin ehay atiwaure yne. Aipotypot ete yn aru uhehay areꞌe uipyꞌa pe. Aikotã Aikawiatno ariaꞌyp posak ete ikuꞌuro hap yn aru uhehay wo atimoherep tawa Kurintiu piaria pe areꞌe uiwepe.

1 Kuriniu 3:19

Iꞌatu kahato mesuwat yi tote -Uito poꞌog uiweꞌeg e haria maꞌato Tupana wanetup hawe yt kat i kuap haria ewy miꞌiria -Uito uiweꞌeg kahato iꞌatuꞌe pykai. Miwan me mio tã toꞌe -Uito poꞌog uiweꞌeg e haria teꞌeruwemaꞌat neꞌi taꞌatuweꞌeg saꞌag hamo hawyi taꞌatuweꞌeg poꞌog hap suki ewywuat topyhuꞌat taꞌatuꞌauka hamo pira ewy e Tupana saꞌawyꞌi miwan me.

1 Kuriniu 4:10

Miꞌi pykai Aipotypot Iesui moherep hap ete yt urupohep hin i miitꞌin teꞌeruwekyryꞌi teran uruete pykai. Maꞌato ehete yt uwe i teꞌeruwekyryꞌi uruetiat ewy. Miꞌi pote -Uruto poꞌog Aipotypot emiit eweiꞌe. Uruweꞌeg poꞌog iraniaꞌin kai eweiꞌe. Uruto imohey pakup kahato haria eweiꞌe. Taꞌi uruwanetup hawe eipe ipakup kahato koꞌi. Maꞌato uruto miitꞌin mimohit koꞌi wo urutopyhuꞌat.

2 Kuriniu 10:4

Aito imohey haria watoineꞌen aikotã surara koꞌi ewy. Maꞌato aiporyꞌa koꞌi tuweupiat raꞌyn. Yt mesuwarotiat wuꞌuka hap ewywuat i katupono poꞌog poꞌog hesaika iꞌatukai. Miꞌi koꞌi wywo Tupana aipowyro kahato miꞌi koꞌi yt naku i nug hat akit hamo. Aiminug saꞌag koꞌi aikotã wanikaptia ewy topyhuꞌat.

2 Kuriniu 4:3

Maꞌato yt watimoherep Iesui etiat muap Tupana kapiat pote yt taꞌatukuap hin i. Miꞌi hawyi aimimuꞌeria yt ikuap takaria i wo tukupteꞌen. Yt naku i yt wahenoi i katupono yt wahenoi i hawyi tuwat aria kape yt taꞌatukuap i Tupana etiat pote.

1 Tesaronika 1:5

Saꞌawyꞌi ti uruhenoi kahato ehepe sehay wakuat Iesui etiat maꞌato yt uruwat uruẽku kaipyi yn i maꞌato Tupana esaika hap kaipyi iꞌewyte Tupana Paꞌãu kaipyi uruiꞌatumuꞌe eipe. Taꞌi pywuat sese urutoꞌe. Urumimohey mesuwat sehay urutoꞌe uruhenoi ehepe turan. Eweikuap taꞌyn aikotã saꞌawyꞌi urutukupteꞌen eipyꞌasetpiat hap. Taꞌi eikyꞌe uruepiat hap yn ni toineꞌen urukai.

2 Tesaronika 2:10

Miꞌi hawyi ti aru hoꞌowasat rakaria wo miitꞌin toiꞌatumaꞌat kahato raꞌyn mekewat topo wuat tominug wo yt miitꞌin minug kuap i wo. Miꞌi hawyi imimaꞌat koꞌi tuwehytꞌok yne aria pe katupono taꞌatumohey kahato raꞌyn heso hap koꞌi poꞌog pywuat sese sehay kai. Yt taꞌatukyꞌesat i poꞌog taꞌatuehakyeraꞌat hanuat Tupana miium.

Epereu 12:2

Aikotã seput haria teꞌerahaꞌat popuo taꞌatueput hap etiat -Putꞌok are iꞌatuꞌe hamuat hap kape yn hap ewy waku watehaꞌat aiwanetup hawe -Putꞌok are aru Iesui yatype aiꞌe hap kape yn katupono Iesui topyhuꞌat seput haria akag ewy katupono toimohey Tupana poꞌog torannia kai. Uiwyriaꞌin waku Iesui piat Tupana mohey hap ewy waku watomohey Tupana are. Iesui ti aimoehãite kuap kahato Tupana mohey hap ete. Haꞌawytepyi watomohey Iesui hawyi aiwanetup hap Iesui yn topyhuꞌat miꞌi hap ewy waku watomohey te Iesui putꞌok watoꞌe iꞌyatypiat hap eꞌat kape. Aikotã seput haria taꞌatusaꞌawynug hawyi te ikahuro hap kape teꞌeruwanetup hap ewy Iesui toineꞌen mesuwiat turan seput hat ewy topyhuꞌat. Putꞌok e Tupana etiat hap kape yn iha ariaꞌyp posak kape yn iha Tupana mikyꞌesat nug hap kape yn iha. Miꞌi hap yn imowepiit hap. Miꞌi hawyi tutuꞌu aiꞌapiheg hap ariaꞌyp posak ete. Yt toikyꞌesat hin i miitꞌin mikyryꞌi hap pykai. Toikuap kahato tomohit hap maꞌato yt tuwemoti hin i ariaꞌyp posak totiat toineꞌen saꞌag hap miitꞌin ehaꞌat hap pupi. Tokuꞌuro hawyi taꞌapyk Tupana po sese kai aikope Tupana piat topainug hap tote. Tokuꞌuro hap no aikawiatno hap kape yn toto toineꞌen mesuwe turan. Tupana mikyꞌesat nug hap yn imowepiit hap mesuwarote topyhuꞌat tohoꞌopot hap eꞌat turan. Iesui seput hat akag ewy toineꞌen meiũpe turan.

Epereu 4:12

Tupana aikuap kahato. Tehay hãi hyk kahato aikotã kyseꞌyp hãihyk toꞌowa piat rakat suraraꞌin ekyseꞌyp ewywuat Tupana e hap. Hãihyk hesaika mekewat kyseꞌyp ewywuat Tupana ehay teke kuap kahato aipiit pe aiwanetup hawe. Toitek tek kuap kahato aiminug saꞌag koꞌi. Tupana ehay aimoieineꞌen kuap kahato. Yt heremo i aipiit piat rakat yt naku i hap toipuruk kuap kahato aiwanetup hap kaipyi aipiit pyi. Hesaika kahato Tupana ehay aimoehãite hap nug hamuat aiwanetup hawe. Tupana ehay tikuap kahato aipaꞌãu. Toikuap kahato kat e hap kat e hap aipiit pe toineꞌen hap sio watomohey teran sio watimotypot teran sio watuwemotypot teran sio miitꞌin aimotypot hap yn watikyꞌesat sio Tupana motypot hap watikyꞌesat hap. Kyseꞌyp hãihyk takat ewy Tupana ehay tipoꞌoro kuap kahato yt naku i aiwanetup hap pya pyi aikai. Toipatꞌok kuap kahato yt naku i sio waku hap. Toikuap yne aipiit piat yt heremo i rakat. Toikuap kahato aipyꞌa piat aimikyꞌesat kyꞌesat hap toineꞌen hap ihay teke teke kahato aiwanetup hawe pote. Iꞌewyte kan hamoĩ watunug wakuap hap toikuap. Toikuap aiwanetup waku sio yt hap. Kat pote mekewat sio Tupana kyꞌe hap aikai sio yt miꞌi i hap toikuap. Sio aiwemotypot hap sio Tupana motypot hap toikuap. Yt heremo i rakat wen aiwanetup hap toikuap yne aipyꞌa piat aimikyꞌesat koꞌi kyseꞌyp hãi hyk toꞌowa piat rakat ewywuat tehay wo.