1 Kuriniu 1:10 - Sateré-Mawé

¹⁰ Uheꞌywytꞌin uheinytꞌin pywo pe areꞌe ehepe Aipotypot Aikaꞌiwat Iesui ehay moherep hat ti uito are. Miꞌi tupono ahẽtup eiwoꞌoehay upi eweikupteꞌen. Miꞌi pote -Pywo pywo eweiꞌe eiwoꞌope hawyi eiwoꞌowehik kahato. Miꞌi hawyi wẽtup wanetup hap wywo yn eweikupteꞌen. Waku aiwoꞌoꞌewy yn watoineꞌen wẽtup mikyꞌesat upi yn hawyi sehay yt kat i aiwoꞌosytpok hap toineꞌen aikai.

1 Kuriniu 1:10 ပူးပေါင်းရင်းမြစ်များ

Mateu 9:16

Pyno yt uwe i ti imog kuap sokpe pakup sepok wo neꞌi tesokpe potꞌi hiotꞌe rakat mog maꞌato sokpe pakup wo neꞌi etimog hiotꞌe rakat sokpe potꞌi pote poꞌog neꞌi hiotꞌe sokpe.

Maku 2:21

-Iꞌewyte ti wẽtup sehay ahenoi teran ehepe e. Ahesokpe potꞌi iꞌewyte hiotꞌe pote yt naku i watomog sokpe pakup wo neꞌi e. Katupono ti ahepiat imog hap tuweꞌatuk hawyi toihiot neꞌi raꞌyn ahesokpe potꞌi e. Miꞌi hawyi ahesokpe hiotꞌe rakat topyhuꞌat poꞌog naꞌyn saꞌag e.

Maku 3:24

Yt aikotã kuap i wyti ren e. Katupono yt karãpe i tuwesopo kuap miit piit pyi ahiag e. Katupono karãpe wẽtup setama pe miitꞌin tuꞌuka tuꞌuka toꞌope meiũran ti mekewat setama pe yt uwe i raꞌyn topyhuꞌat e. Kat pote toꞌoꞌatoiat yne yne e yt kat i woꞌowese hap itote pote e.

Iuwãu 10:19

Mio tã e pote itotiaria Iuteu ywania akagnia tuꞌuka kahato raꞌyn taꞌatuehay wo.

Iuwãu 17:23

-Uiꞌywot atikyꞌesat En Uito hawyi ahemiitꞌin wẽtup miit ewy yn hap are. Atikyꞌesat ahemiitꞌin wakuaria sese ahewaku hap oktan hap atikyꞌesat are. Aiwoꞌoꞌewy kahato watoineꞌen Papai En Uito ahemiitꞌin wywo wẽtup yn aiwanetup hap koꞌi hap atikyꞌesat are. Taꞌatuꞌatumuꞌe miitꞌin turan pywo sese ti Tupana Mipoꞌoro Iesui ahehakyeraꞌat hanuat iꞌatuꞌe wanetup haria hap atikyꞌesat e. Taꞌi Tupana aikyꞌe kahato Tosaꞌyru kyꞌe hap ewy iꞌatuꞌe iraniaꞌin hap ahẽtup. Katupono hãpyk sese tukupteꞌen ahemiitꞌin iraniaꞌin ehamo pote hap ahẽtup epe Uiꞌywot are e.

Iuwãu 7:43

Miꞌi pote iꞌatuwanetup hap uwe sese Iesui hap ete yt toꞌoꞌewy i. Miꞌi pote yt toꞌowese i raꞌyn toꞌope.

Iuwãu 9:16

Tupana ehay moherep haria teꞌeroꞌe -Pyno miꞌi miit yt Tupana kaipywiat i iꞌatuꞌe katupono yt aipotpap i hap eꞌat pe miꞌi tã hap tutunug iꞌatuꞌe. Maꞌato iraniaꞌin teꞌeroꞌe -Kat pote yt Tupana kaipywiat i Miꞌi Miit eweiꞌe iꞌatuꞌe. Yt Tupana kaipywiat i Miꞌi Miit pote aikotã som pyno wakuap sese tutunug kuap yt Tupana Mipoꞌoro i Miꞌi Miit pote iꞌatuꞌe iraniaꞌin. Miꞌi hawyi yt toꞌoꞌewyꞌewy i raꞌyn teꞌeruwanetup.

Iesui Potmuꞌeria 4:32

Miꞌi hawyi Iesui mohey haria woꞌokyꞌe kahato haria tukupteꞌen itote aikotã wẽtup miit ewy kahato iꞌatupyꞌa wasu hap. Taꞌi wẽtup miit ewy yn iꞌatuwanetup hap. Miꞌi hawyi iꞌatuegyiꞌat kahato rakaria wo tukupteꞌen itote. Miꞌi hawyi yt uwe i itote -Uiatnuat yn uhekat e hat topyhuꞌat iꞌatupyꞌasetpe katupono taꞌatumoꞌẽ kahato toꞌope kat koꞌi kat koꞌi iꞌatuekat e. -Taꞌi aiwatnuat topyhuꞌat yne uhekat yne uruekat mesup iꞌatuꞌe toꞌope katupono taꞌatukyꞌe kahato saꞌawyꞌi Iesui mohey haria itote.

Humanu 1:13

Saꞌawyꞌi areꞌe Tupana pe -Areto teran tawa wato Huma kape katupono uheinytꞌin uheꞌywytꞌin Esaꞌyru mohey haria kapiat araꞌakasa hamo are. Maꞌato ahãꞌãg hawyi toineꞌen uipyhyp pyhyp hap kat koꞌi kat koꞌi uikosap hamo. Uiwyriaꞌin areto teran ehewowi. Miꞌi hap o yt eweiwaure teiꞌo katupono worohoꞌomoesaika teran eiperia Iesui mohey hap ete. Iraniaꞌin ywania aikopiat aikopiat kape areto kahu raꞌyn mote areto teran ehewowi eikuap hamo. Maꞌato uipyhyp pyhyp kat koꞌi kat koꞌi ehowawiat uikosap hamo. Koitywy iraniaꞌin miꞌiria teꞌeropyhuꞌat Iesui mohey haria itag nakaria wo raꞌyn. Miꞌi hap ewy atikyꞌesat ehetama pe wy. Yt uheso hin i miꞌi pote ahãꞌãg i ahãꞌãg i kahato ehewowi wen maꞌato yt putꞌok are i te ehewowi eimotag.

Humanu 12:1

Uheꞌywytꞌin uheꞌykeꞌetꞌin uheinytꞌin yt ahewaku hin pykai i Tupana aikyꞌe -Yt atiꞌatuꞌapiheg teran i miꞌiria e tuwepe ahetiat pe. Tupana miꞌatukyꞌe eipe pote ahẽtup ehepe uheꞌykeꞌetꞌin uheinytꞌin Iesui mohey haria Tupana eikyꞌe pote ewetum no eipiit tope eweikupteꞌen kahato imotypot haria wo. Aikotã saꞌawyꞌi wuaria tiꞌauka taꞌatuhũria Tupana motypot hamo hap ewy waku ewetum eipiit Tupana kape Tupana potpap nug hamo. Waku eheineꞌen hap imikyꞌesat ewy imotypot hap yn topyhuꞌat. Waku eipiit pyi tuwẽtem sehay Tupana motypot hap yn Tupana ewaku hap oktan aikotã waku watunug hap ewy. Aikaꞌiwat wakuat kahato pote waku watopyhuꞌat heropat sese haria wo.

Humanu 12:16

Yt naku i ipatꞌok ete aiwese ipatꞌok ete yt. Karãpe putꞌok e ahete motpap hap yt aimikyꞌesat ewy i miitꞌin emiit minug hap ewy pote waku watunug aimisakup hap wywo iꞌatuꞌakag wo watopyhuꞌat pykai. -Uito poꞌog mote yt naku i uipotpap aikotã miit emiit ewy yt naku i watoꞌe.

Humanu 15:30

Uiwyriaꞌin tama Humanu piaria ahẽtup kahato ehupi uheinytꞌin uheꞌywytꞌin ewehẽtup yne eipyꞌa pyi haty wo uipowyro hamuat Tupana pe -Etipowyro Pauru hewyry hap upi eweiꞌe o. Etimotypot Esaꞌyru Emipoꞌoro uruporekuat nuat Pauru ehay kaipyi Pauru minug kaipyi eweiꞌe o Tupana kape. Taꞌi atikuap uikyꞌe Tupana Paꞌãu kaipywiat ehepiat hap miꞌi pote ahẽtup ehepe ewehẽtup o Tupana kape uipowyro hap.

Humanu 16:17

Tukupteꞌen Iesui mohey ran haria maꞌato mesuwat yi tote yt naku i rakaria katupono woꞌoehay uuka teran sehay wuat haria tukupteꞌen. Taꞌi miꞌiria taꞌatupatꞌok patꞌok teran kahato aito hap taꞌatukyꞌesat kahato. Miꞌiria aimoꞌakagꞌaia taꞌatuehay wuat hap taꞌatuehay wo. Yt Iesui kyꞌe hap kaipyi i maꞌato wẽtup mohey hap kape wẽtup sehay kape aimoꞌakagꞌaia teran. Typy mohey hap nug hamo yt Aimimohey Iesui ewy i taꞌatumoherep yt aimimohey sehay yt ewy i yt aimuꞌe hap saꞌawyꞌi wuat Iesui potmuꞌeria piat yt aimuꞌe hap ewy i aimuꞌe. Yt naku i. Uiwyriaꞌin karãpe miꞌiria ewywuaria putꞌok iꞌatuꞌe eipyꞌasetpe ehepiat Iesui mohey hap nug kowoꞌi kowoꞌi hanuaria eiweꞌeg wo o miꞌiria pupi. Miꞌiria putꞌok iꞌatuꞌe turan waku eweikuap meremo iꞌatuepiat eimaꞌat reran hap hawyi yt eweiwat i iꞌatuehay upi. -Urumuꞌe ro uhyt mana yt eweiꞌe teiꞌo iꞌatuepe. Iꞌatuehay pupi eweikenꞌẽ o. Uiwyriaꞌin Iesui mohey haria eipe pyno worohoꞌonapin haty puo yt eweipomeꞌeg teiꞌo ehewaure kaꞌa woꞌopatꞌok patꞌok Iesui mohey haria etiat iꞌatumoꞌakagꞌaia hap kaipywiaria kape.

1 Kuriniu 1:11

Gaꞌatpo tõꞌẽ mana Kure yat piaria hawyi miꞌiria henoi uhepe aikotã eipyꞌasetpe tukupteꞌen sehay wuat wuꞌuka haria etiat.

1 Kuriniu 11:18

Taꞌi iraniaꞌin henoi uhepe -Yt toꞌoꞌewy hin i itotiaria hawyi wuꞌuka hap yn topyhuꞌat itote iꞌatuꞌe. Pyno eipe Iesui mohey haria pykai eiwepatꞌok patꞌok itotiat hap atikuap taꞌyn. Yt atimohey i yne iꞌatuehay koꞌi ehetiat maꞌato miꞌi iꞌatuꞌe hap ehetiat hap atimohey.

1 Kuriniu 12:25

Miꞌi hawyi ahaga koꞌi toꞌopowyro aat kaꞌap. Yt naku i ahaga yt toꞌopowyro i toꞌope.

1 Kuriniu 3:3

Katupono eweikupteꞌen mesuwarotiat wanetup haria ewy yn. Eiwuꞌuka wuꞌuka eiwoꞌope sehay hit no. Miꞌi hawyi ehaꞌywyi eweikupteꞌen eiwoꞌope aikotã mesuwarotiaria yt Iesui mohey i haria eko ewy eweikupteꞌen.

1 Kuriniu 4:16

Miꞌi hawyi uipyꞌa pyi ahẽtup ehupi eweikupteꞌen itote uiꞌewy kahato hamuat hap Aikaꞌiwat Iesui mohey hamuat hap ete.

2 Kuriniu 10:1

Uito ti eimuꞌe hat sese saꞌawyꞌi wuat. Haꞌawyte Tupana uipoꞌoro ehewowi. Miꞌi turan worohoꞌonapin perupꞌi puo aikotã Aikaꞌiwat Iesui ainapin hap ewy aikyꞌe hap wywo. Saꞌawyꞌi ihakyꞌeꞌi hakyꞌeꞌi rakatno uito areineꞌen eipyꞌasetpe turan poꞌog yi kape. Maꞌato koitywy areineꞌen pya eikai. Miꞌi pote worohoꞌonapin uimiwan me haty wo uiwemotypot wywo.

2 Kuriniu 13:11

Uiwyriaꞌin uhekatuwyria kuekatu atipoꞌoro ehewowi. Toran naꞌyn uimiwan mesuwe. Waku pe eweikupteꞌen. Yt kat i iꞌaparap ehepiat hap eheineꞌen hap ete hap wywo eweikupteꞌen. Wẽtup ok miit ewywuat eweikupteꞌen imohey hap ete. Eiwoꞌomowepiit ro eiwoꞌopowyro hap ete woꞌowese hap ete. Miꞌi ewy ewetunug pote eiwepiit kahato katupono Tupana wuatꞌi kyꞌe hat toineꞌen eipyꞌasetpe eimowepiit sese hamo.

2 Kuriniu 13:9

Uruikyꞌesat kahato eweikupteꞌen waku rakaria Tupana ewywuaria wo hap. Urumowepiit kahato karãpe eweikupteꞌen hesaika kahato rakaria wo imohey hap ete. Miꞌi hawyi poꞌog urunapin haria ewy. Miꞌi hap eꞌat pe urumowepiit kahato.

2 Kuriniu 5:20

Koitywy toineꞌen Wuatꞌi Porekuat Koro wo. Miꞌi hawyi ainug topotpoꞌoro wo morekuat hit koꞌi wo wẽtup tawa kape wẽtup tawa kape tehay moherep hamo -Eweiꞌaipok to Tupana kape e hamo. Aikaꞌiwat Iesui toineꞌen atipy pe. Maꞌato uruto haipepiaria ihay moherep haria urutoꞌe. Tupana urupoꞌoro ehewowi eikyꞌe kahato haype. Worohoꞌokyꞌesat eipe uruwyriaꞌin wo i raꞌyn urutoꞌe. Eiwewyꞌinug no Tupana wywo urutoꞌe.

2 Kuriniu 6:1

Urutoria Iesui ehay moherep haria sese. Miꞌi pote koitywy uruhẽtup kahato ehupi. Eipe iꞌewyte uruꞌewy te wẽtup piit ewy yn Tupana wywo. Watuwepotpap kahato wuatꞌi ywania piat ikuap Haꞌyru etiat hamo. Pyno Tupana eropat haria aito pote uruhẽtup ehupi urupyꞌa pyi kahato. Yt eweikupteꞌen neiꞌo Tupana piat eikyꞌe hap ete iraꞌak takaria wo neꞌi. Tupana tum naꞌyn ehepe kat koꞌi kat koꞌi topotpap nug hamuat yt kat saꞌup i. Yt naku i Tupana miium ahepiat koꞌi watiporerokosap neꞌi. Yt naku i watipun imiium koꞌi.

Karasia 4:12

Uito meimuẽwat seko koꞌi uhehakyeraꞌat hap atiwaure yne rakirẽ ahẽtup kahato Iesui kape yn uhehakyeraꞌat hap. Miꞌi hawyi atipuẽti Tupana Iesui mohey hap upi waku kahato. Pyno mesup atikyꞌesat kahato eipe uito ewywuat. Yt eweimohey teiꞌo eheko nug hap muap Tupana kuap hamuat katupono Iesui yn muap Tupana kape are. Atikyꞌesat kahato eipe uiꞌewywuat imohey haria hap atikyꞌesat eweikupteꞌen hamuat paĩ. Iuteuria ywania mepyt sese uito meiũ paĩ. Uiꞌywot ti Iuteu sese paĩ. Uiꞌywania eko koꞌi ewy atunug kahato saꞌawyꞌi uhehakyeraꞌat hap kyewi Tupana kuap hamo wen maꞌato yt atipuẽti i miꞌi muap atunug yne urueko ewywuat pykai paĩ. Miꞌi hawyi Iesui Uhehakyeraꞌat hatno topyhuꞌat hawyi waku kahato Tupana topyhuꞌat yt pya hin i uikai topyhuꞌat. Pyno atikyꞌesat eipe uhepiat Iesui mohey hap ewywuaria ro eweikupteꞌen. Saꞌawyꞌi areineꞌen eipyꞌasetpe turan eheko ewywuat atunug. Yt urueko koꞌi i atunug uito Iuteu uito pykai. Eipe ewy atunug itote. Pyno mesup ewetunug uito ewy eweikupteꞌen yi Karasia ywania. Waku eheko wakuat ewywuat ewetunug aikotã saꞌawyꞌi atunug eipyꞌasetpe are. Maꞌato mio uheko Iuteu eko upi eweikat Tupana piat ehehakyeraꞌat hap aikotã uimotag hap eꞌat pe ewywuat ewetunug neran. Yt eiweꞌeg hin i mio tã ewetunug pote. Saꞌawyꞌi uimohey haria eweikupteꞌen. Kat pote mesup uhehay mohit hanuaria eweikupteꞌen.

Wiripu 1:27

Karãpe watimoherep sehay wakuat Aipotypot etiat miitꞌin me miꞌi turan waku aiweꞌeg wo o aikotã aikotã watoineꞌen iꞌatupyꞌasetpiat turan. Waku iweꞌeg kahato rakaria ewy watoineꞌen. Yt naku i watiꞌatumuꞌe miitꞌin yt naku i nug haria aito pote. Aimimuꞌeria yt tikyꞌesat i ahehay Iesui etiat taꞌatupuẽti yt naku i nug haria aito pote. Yt teke i iꞌatuewaure kaꞌa pe wakuat Iesui etiat aheineꞌen hap yt ikahu i pote are. Atikyꞌesat kahato wakuaria wo o eweikupteꞌen sio areineꞌen eipyꞌasetpe sio yt. Waku eweikupteꞌen wakuat nug haria wo o itote yt uiwywuat pykai i. Miꞌi hawyi yt areineꞌen i eipyꞌasetpe pykai sehay wakuat atikuap aru iraniaꞌin wẽ pyi ehetiat eiminug koꞌi piat hap wyti aru hap atikuap. -Taꞌi yt taꞌatuꞌatoiat hin i te Iesui mohey hap iꞌatuꞌe aru uhepe. Toꞌoꞌewyꞌewy wẽtup miit piit ewy iꞌatupotpap e hap aru atikuap wy ehetiat. Taꞌi suraraꞌin ewy tuꞌuka kahato saꞌag ete e hap aru atikuap wy. Iꞌewyte taꞌatukyꞌesat yne miitꞌin Iesui ehay wakuat mohey haria iꞌatuꞌe aru uhepe meiũpe yt heremo i areineꞌen eipyꞌasetpe pykai are.

Wiripu 3:16

Karãpe watiꞌaparap miꞌi hap aru Tupana timoherep ahepe aiminug saꞌag hap koꞌi. Waku wateput aimikuap ewy Iesui mikyꞌesat hap oktan. Miꞌi turan Tupana aipowyro tesaika hamo seput poꞌog saꞌawyꞌi wuat kawiat haria wo.

1 Tesaronika 5:13

Waku aimuꞌe haria kyꞌe haria wo watukupteꞌen. Waku iꞌatumotypot haria wo watukupteꞌen. Iꞌewyte watoꞌowese kahato aiwoꞌope.

2 Tesaronika 2:1

Pyno uruwyriaꞌin koitywy uruhenoi pakup i teran ehepe Aipotypot Aikaꞌiwat Iesui aipok hap etiat aikotã aikotã aiꞌatunug tuwewawi hap etiat uruhenoi teran ehepe.

1 Timoteu 5:21

Timoteu etunug no haty wo yne yne enapin hap uhepiat hap ewy. Etiꞌatunapin uiꞌewy yne itotiaria toꞌewyꞌewy. Eꞌyian pupi o yt erekenꞌẽ teiꞌo eꞌywania pupi iꞌatunapin hamo. Ewy ok sese pupi iꞌewyte yt erekenꞌẽ teiꞌo inapin hamo maꞌato waku torannia etiꞌatunapin perupꞌi puo. Woronapin Tupana ehamo Iesui ehamo iꞌewyte atipy piaria wakuaria ehamo woronapin uhaꞌyru.

2 Timoteu 4:1

Pyno Timoteu woronapin kahato haty wo Tupana ehamo Aipotypot Iesui ehamo -Etimohey kahato o Tupana ehay ereꞌe o epotmuꞌeria pe. Yt ewẽpohep hin i neiꞌo miꞌi hap ete. Yt epohepap pykai i yt epohep teiꞌo iꞌatumuꞌe hap ete. Katupono tuut irane Aikaꞌiwat uwe waku uwe yt naku i rakaria hap enoi hamo ihãite rakaria kape iꞌewyte map haria kape.

1 Peteru 2:11

Uito ti Peteru. Uimikyꞌeria sese eipe. Miꞌi pote atikyꞌesat kahato ewetunug uimikyꞌesat ewy. Atikyꞌesat kahato eweiꞌatoiat yne ehewaire hap kyꞌesat hap koꞌi eipiit mikyꞌesat saꞌag koꞌi. Karãpe wẽtup ok ehãꞌãg hawyi -Yt atikyꞌesat i eweiꞌe. Taꞌi aimikyꞌesat saꞌag koꞌi aipyꞌa piat toineꞌen aat kaꞌap hawyi meiũran yt kat i Tupana kyꞌe hap toineꞌen aikai kat pote mekewat aimikyꞌesat saꞌag koꞌi tuꞌuka kahato Tupana mikyꞌesat hap wywo aipyꞌa pe. Mesuwat rotiaria ewy yt naku i watopyhuꞌat kat pote atipy piaria aito pote. Ahewyry mesuwarote wen maꞌato ahetama sese yt mesuwarote i. Miꞌi pote yt naku i iraniaꞌin mikyꞌesat ewywuat watunug saꞌag iꞌatuwywo.

1 Peteru 5:10

Maꞌato Tupana ti eipowyro kahato hat toineꞌen uiwyriaꞌin ipakup takaria. Tutum neran ehepe yne tesaika hap yt kat saꞌup i. Toikyꞌesat kahato eiperia tomimotypot koꞌi wuatꞌi eꞌat piat hatno. Kat pote Aipotypot Iesui mohey haria eipe pote. Pyno hoꞌopot hap yt motꞌi hamuat i toineꞌen. Mukiꞌite eꞌihatꞌok eꞌihatꞌok hap ewy tokosap taꞌyn. Pyno waku etuꞌu hoꞌopot hap mesup miꞌi hawyi meiũran Tupana mimotag koꞌi wo eweikupteꞌen waku rakaria hãpyk kahato rakaria wo. Yt uwe mimaꞌat koꞌi wo i eweikupteꞌen. Meiũran Tupana ehay wywo ehesaika eweikupteꞌen. Miꞌi hawyi meiũran eiwanetup hap yt kowoꞌi kowoꞌi hin i toineꞌen. Hesaika rakaria wo Tupana mohey haria ewy eweikupteꞌen ewehoꞌopot hap tokosap hawyi ehãꞌãg hap tokosap hawyi are yne pe nagnia pe makuptiaria pe kurum iwasuria pe hirokaria pe yne pe are.