Tito 3:7 - New Testament in Mazatec Huautla

⁷ jme¹-ni³ nca³ cˀoa⁴-sˀin² sˀe⁴-si¹ni³na¹ cjoa⁴tjao², jo³-sˀin² ti³cho³ya²-le⁴² cjoa⁴vi³jna³chon³ nca³ntsjai², nca⁴ je³tˀa³ je¹-na¹ xi³ to⁴tˀa³tsˀe⁴ cjoa⁴nta³-le⁴.

Tito 3:7 ပူးပေါင်းရင်းမြစ်များ

San Mateo 25:34

Cˀia⁴ je² cho⁴ta⁴ti¹tjon² coi⁴tso⁴-le⁴ je² xi³ tjio¹ nca³qui²xi⁴-le⁴: Nčhoao¹³, jon² xi³ Nˀai³-na⁴ qui³si³chi³con³tˀain³, chjoe¹cjoa⁴tjao²³ je² cjoa⁴te¹xo³ma³ xi³ ti¹jna³nta³ xi³ tˀa³tsaon⁴³, sa³ˀnta³ nca³ to²tsˀin³-le⁴ cjoa⁴.

San Marcos 10:17

Cˀia⁴ nca³ Jesús ji³tjo³-ni³ nca³ coai⁴ ya⁴³ ntia⁴², ji³nčhoa³ to³ca³nčhˀoe² jnco³ xi³ tsa³ca³sen²xco¹nchˀin³ nqui³xcon⁴ nca³ je², qui³sco²na³nqui³-le⁴: Maestro ntai³, jme¹ cjoa⁴nta³ xi³ sˀian³ jme¹-ni³ nca³ sˀe⁴-si¹ni³na³ cjoa⁴vi³jna³chon³ nca³ntsjai².

Romanos 11:6

Cˀia⁴ tsa² to⁴tˀa³tsˀe⁴ cjoa⁴nta³, li²coi³ to⁴tˀa³tsˀe⁴ xa¹na¹ˀni³. Tsa² cja⁴ˀai¹ tjin¹ cjoa⁴, je² cjoa⁴nta³-ve⁴ a³li² ti⁴cjoa⁴nta³-ni³ˀni³. Cˀoa⁴ tsa² to⁴tˀa³tsˀe⁴ xa¹-na¹, a³li² ti⁴cjoa⁴nta³-ni³ˀni³. Tsa² cja⁴ˀai¹ tjin¹ cjoa⁴, je² xa¹-na¹ li²coi³ ti⁴xa¹-ni³ˀni³.

Romanos 3:24

Fe³tˀa³-le⁴ je¹ xi³ to⁴cjoa⁴tjao², xi³ to⁴tˀa³tsˀe⁴ cjoa⁴nta³-le⁴ Ni³na¹, nca⁴ Cristo tsa³cˀe¹chji¹ntjai² xi³ tˀa³tsˀe⁴.

Romanos 3:28

Cˀoa⁴-sˀin² nta³ cho¹son²-ni³le⁴² nca³ cho⁴ta⁴ fe³tˀa³-na¹ je¹ to⁴tˀa³tsˀe⁴ nca³ ma³cjain¹-na¹, tˀa³xin² je² xa¹ xi³ tsˀe⁴ cjoa⁴te¹xo³ma³.

Romanos 4:16

Coi³ nca³ cˀoa⁴ma³ xi³ to⁴tˀa³tsˀe⁴ nca³ ma³cjain¹-na¹, jme¹-ni³ nca³ cˀoa⁴ma³-si¹ni³ to⁴cao⁴ cjoa⁴nta³-le⁴ Ni³na¹, cˀoa⁴ jme¹-ni³ nca³ je² xi³ Ni³na¹ qui³tsjoa³-ni³ tsˀoa³ ña³qui³ tjin¹qui²xi⁴-ni¹ tˀa³tsˀe⁴ nca³tsˀi³ ntje⁴-le⁴, a³li² to⁴je²-jin² xi³ tsˀe⁴ cjoa⁴te¹xo³ma³, to⁴nca³ cˀoa⁴²-ti⁴ je² xi³ ma³cjain¹-le⁴ jo³-sˀin² coan³cjain¹-le⁴ Abraham xi³ nˀai³-na¹ nca³tsˀia³².

Romanos 4:4

Tˀa³tsˀe⁴ je² xi³ si¹xa¹, je² chji¹-le⁴ li²coi³ ma³xqui⁴cao⁴ jo³-ni³ tsa² xi³ to⁴cjoa⁴tjao², to⁴nca³ jo³-ni³ tsa² xi³ qui³tjen⁴ xi³ tˀa³tsˀe⁴.

Romanos 8:17

Cˀia⁴ tsa² ˀnti¹-le⁴ ma³², cˀoa⁴²-ti⁴ sˀe⁴-na¹ cjoa⁴tjao² tsˀe⁴ Ni³na¹. To⁴jnco³ sˀe⁴-na¹ cjoa⁴tjao² cao⁴ Cristo, tsa² ña³tjen⁴ chja⁴ˀa² cjoa⁴ñˀain³ cao⁴ Cristo, jme¹-ni³ nca³ ña³tjen⁴ coi²tjo⁴je³ya³-si¹nia³² cao⁴ je².

1 Corintios 6:11

Cˀoa⁴coan³ cjoaon³ cˀao³. To⁴nca³ je³tsa³ca³ne²yao³ yao³-no³, je³coan³tsje³yao³, je³je³tˀa³ je¹-no³, cao⁴ je² jan³ˀain¹-le⁴ je² Nai³-na¹ Jesucristo, cˀoa⁴ xi³ to⁴tˀa³tsˀe⁴ je² Espíritu Santo xi³ tsˀe⁴ Ni³na¹-na¹.

Gálatas 2:16

ˀya³-nia¹ nca³ cho⁴ta⁴son³ˀnte³ li²coi³ fe³tˀa³ je¹-le⁴ nca⁴ cˀoa⁴sˀin¹ jo³ tso² cjoa⁴te¹xo³ma³, to⁴nca³ coi³ nca³ ma³cjain¹-le⁴ tˀa³tsˀe⁴ Jesucristo. Cˀoa⁴-ti⁴ ña¹ coan³cjain¹-na¹ tˀa³tsˀe⁴ Jesucristo, jme¹-ni³ nca³ cjoe⁴tˀa³-si¹ni³ je¹-na¹ nca⁴ ma³cjain¹-na¹ tˀa³tsˀe⁴ Cristo, a³li² tsa² coi³ nca³ cˀoa⁴nˀian² jo³ tso² cjoa⁴te¹xo³ma³. Ni⁴ˀya³-jin² xi³ cˀoa⁴-sˀin² fe³tˀa³ je¹-le⁴ nca⁴ cˀoa⁴sˀin¹ jo³ tso² cjoa⁴te¹xo³ma³.

Gálatas 3:29

Cˀia⁴ tsa² jon² tsˀe⁴ Cristo mao³, ña³qui³ cjoa⁴qui²xi⁴ nca³ ntje⁴-le⁴ Abraham mao³-ˀni³, cˀoa⁴-ti⁴ tjin¹-no³ cjoa⁴tjao² jo³-sˀin² nca³ Ni³na¹ qui³tsjoa³ tsˀoa³ nca³ tsjoa¹.

Gálatas 4:7

Ntˀai⁴-ntai⁴ a³li² ti⁴cho⁴ˀnta³-ni³. Ji³ ni¹³ ˀnti¹-le⁴. Tsa² ˀnti¹-le⁴, cˀoa⁴-ti⁴ sˀe⁴-li² cjoa⁴tjao² xi³ tsˀe⁴ Ni³na¹ xi³ to⁴tˀa³tsˀe⁴ Cristo.

2 Tesalonicenses 2:16

Ti⁴je²-ni³ Nai³-na¹ Jesucristo cao⁴ Ni³na¹ Nˀai³-na¹, je² xi³ cjai¹nca³ coan³tsjoa³que³-na¹, qui³tsjoa³-na¹ cjoa⁴je³ta³con² xi³ cˀoe¹jna³jin³ntsjai²-na¹, cˀoa⁴ xi³ nta³ ti³cho³ya²-le⁴² xi³ to⁴tˀa³tsˀe⁴ cjoa⁴nta³-le⁴.

Tito 1:2

Je²-vi⁴ xi³ cˀoa⁴coan⁴ nca³ ti³cho³ya²-le⁴² cjoa⁴vi³jna³chon³ nca³ntsjai². Ni³na¹ xi³ li²coi³ vˀa³na⁴cha⁴ qui³si³sˀe³nqui³ je² cjoa⁴vi³jna³chon³-ve⁴ jo³ sa³ˀnta³ nca³ ti¹tjon² nca³ cje³ nčhoa¹-jin² son³ˀnte³.

Tito 2:11

Nca⁴ coan³tsen³ je² cjoa⁴nta³-le⁴ Ni³na¹ xi³ vˀa³sje³ntjai² nca³tsˀi³ cho⁴ta⁴.

Tito 2:13

Ti³cho³ya²-le⁴² xi³ cjai¹nca³ to⁴nta³ cjoa⁴nta³, cˀia⁴ nca³ coan⁴tsen³ cjoa⁴je³ya³-le⁴ je² Ni³na¹ xi³ nˀion¹ ncˀa³, xi³ vˀa³sje³ntjai²-na¹, xi³ ti⁴je²-ni³ Jesucristo.

Hebreos 1:14

A³ tsi² tsa² je² nca³tsˀi³ a²ncje⁴ xi³ espíritu xi³ si¹xa¹, xi³ ni²ca³sen¹ nca³ si¹xa¹-le⁴ je² xi³ cˀoai⁴cjoa⁴tjao²-le⁴ cjoa⁴vi³tjo³ntjai².

Hebreos 11:7

Coi³ nca³ coan³cjain¹-le⁴ Noé, cˀoa⁴ nca³ qui³tsa³cjon³que³, tsa³cˀe¹nta³ chi³tso³je³. Cˀoa⁴-sˀin² ji³tjo³ntjai² nca³tsˀi³ cho⁴ta⁴ni³ˀya³-le⁴, nca⁴ cˀoa⁴-sˀin² to⁴nqui³-ni³ tsa³cˀin²ya³-le⁴ xi³ tˀa³tsˀe⁴ cjoa⁴ xi³ cje³ ma³tsen³-jin²sa³. To⁴coi³ nca³ cˀoa⁴-sˀin² coan³cjain¹-le⁴ Noé, tsa³ca³co¹ nca³ tsa³quin²-le⁴ cjoa⁴ñˀain³ cho⁴ta⁴son³ˀnte³, cˀoa⁴-sˀin² tsa³cˀai²cjoa⁴tjao²-le⁴ cjoa⁴qui²xi⁴, xi³ sˀe⁴-na¹ nca³ ma³cjain¹-na¹.

Hebreos 11:9

Coi³ nca³ coan³cjain¹-le⁴, tsa³cˀa³mjen³son² ya⁴ na³nqui³ xi³ qui³ni²sˀe³nqui³-le⁴ jo³-ni³ tsa² na³nqui³ xi³ qui³ni²quin³ya³-le⁴, cˀoa⁴ ntˀia³na³jño³ tsa³cˀe²jna³nqui³ cao⁴ Isaac cao⁴ Jacobo. Ti⁴coi³-ni³ cjoa⁴tjao² xi³ qui³ni²sˀe³nqui³-le⁴ Isaac, Jacobo, cao⁴ Abraham.

Hebreos 6:17

Ni³na¹ coan³me³-le⁴ nca³ nqui²sa⁴ tse³ tsa³ca³co¹son²tsen³-le⁴ je² xi³ sˀe⁴-le⁴ cjoa⁴tjao² xi³ qui³si³sˀe³nqui³, jo³-sˀin² nca³ tsi² si¹cˀa³ntjai²ya³ cjoa⁴fa³ˀai³tsjen³-le⁴. Qui³si³qui²xi⁴ya³nta³ nca³ ña³qui³ cjoa⁴qui²xi⁴ xi³ qui³tso²,

Santiago 2:5

ˀnti¹ntsˀe³, xi³ cjai¹ tsjoa³que⁴-no³, ti⁴no¹ˀyao²³: Ni³na¹ a³ tsi² tsa³cja³ˀa¹jin³ cho⁴ta⁴yo⁴ma⁴ xi³ tjin¹ i⁴ son³ˀnte³-vi⁴, jme¹-ni³ nca³ nˀion¹ coan⁴cjain¹-si¹ni³le⁴ tˀa³tsˀe⁴ Ni³na¹, nca³ cˀoai⁴cjoa⁴tjao²-si¹ni³le⁴ je² cjoa⁴te¹xo³ma³ xi³ Ni³na¹ qui³tsjoa³ tsˀoa³ nca³ tsjoa¹-le⁴ je² xi³ tsjoa³que³ nca³ je².

1 Pedro 3:7

Jon², xi³ xˀion⁴³, cˀoa⁴-ti⁴sˀin² ti⁴yo³cao⁴³ ya¹nchjin¹-no³ jo³-sˀin² nca³ nta³ ma³cho⁴ya³-no³. Jcha⁴cho⁴tao⁴³ ya¹nchjin¹-no³ jo³-ni³ tsa² jnco³ cho⁴tsin¹ xi³ nqui²sa⁴ čhjoe³, nca⁴ to⁴jnco³ tjin¹-no³ cjoa⁴tjao² xi³ cjoa⁴vi³jna³chon³, jme¹-ni³ nca³ je² xi³ vˀe²tsˀoao³ li²coi³ sa⁴te¹chjoa²-si¹ni³.