San Juan 13:31 - New Testament in Mazatec Huautla

³¹ Cˀia⁴ nca³ je³ji³tjo³ Judas, cˀoi⁴qui³tso² Jesús: Ntˀai⁴ntai⁴ je³ji³tjo³je³ya³ ˀnti¹-le⁴ cho⁴ta⁴, cˀoa⁴ Ni³na¹ je³ji³tjo³je³ya³ xi³ tˀa³tsˀe⁴ nca³ je².

San Juan 13:31 ပူးပေါင်းရင်းမြစ်များ

San Mateo 8:20

Jesús qui³tso²-le⁴: Je² ni⁴nta⁴ tjin¹-le⁴ nqui³jao³, cˀoa⁴ je² ni⁴se³ xi³ si¹ma³ncˀa³ tjin¹-le⁴ tje¹, to⁴nca³ je² ˀnti¹-le⁴ cho⁴ta⁴ tsin²-le⁴ ˀnte³-jin² jña³ si⁴²cja¹ya³.

San Lucas 12:50

Tjin¹ cjoa⁴sa³te¹nta¹ xi³ nta³ ma³chjen¹-na³ nca³ an³ sa³te¹nta¹³. A³li² to⁴cˀoa⁴cji³ si³cjao¹jian³ sa³ˀnta³ coan⁴jnco³.

San Juan 11:4

Cˀia⁴ nca³ Jesús qui³nčhˀoe¹-le⁴, cˀoi⁴qui³tso²: Je² chˀin³-vi⁴ li²coi³ coi⁴ya¹-ni³, to⁴nca³ tˀa³tsˀe⁴ cjoa⁴je³ya³-le⁴ Ni³na¹, jme¹-ni³ nca³ je² ˀnti¹-le⁴ Ni³na¹ coi⁴tjo³je³ya³-si¹ni³.

San Juan 12:23

Cˀia⁴ Jesús cˀoi⁴qui³tso²: Je³ja³ˀai³ hora nca³ je² ˀnti¹-le⁴ cho⁴ta⁴ sˀe⁴-le⁴ cjoa⁴je³ya³.

San Juan 12:28

Nˀai³-na⁴, chˀa⁴sje³je³yai³ jan³ˀain¹-li⁴. Cˀia⁴ qui³no²ˀya²-ni³le⁴ jnco³ jta⁴ ncˀa³jmi³: Je³tsˀa³sje³je³ya²³ jan³ˀain¹-na⁴, cˀoa⁴ cˀoa⁴-sˀin² cˀoa³sje³je³ya³-nca¹nia³.

San Juan 14:13

To⁴jme³-ni³ xi³ si⁴je¹-lao⁴³ Nˀai³-na¹ cao⁴ jan³ˀain¹-na⁴, cˀoa⁴-sˀin² sˀian³, jme¹-ni³ nca³ cˀoa⁴-sˀin² Nˀai³-na¹ coi⁴tjo³je³ya³ xi³ to⁴tˀa³tsˀe⁴ ˀnti¹-le⁴.

San Juan 16:14

Je² xi³ cˀoa⁴sje³je³ya³-na³, nca⁴ scoe¹ xi³ tsˀan⁴, cˀoa⁴ si⁴²cji³nčhˀoe¹-no³.

San Juan 7:39

Coi³ xi³ qui³tso² xi³ tˀa³tsˀe⁴ je² Espíritu Santo xi³ je² xi³ ma³cjain¹-le⁴ tˀa³tsˀe⁴ Jesús sˀa⁴ scoe¹. Cje³-sa³ fa³ˀai³-jin² je² Espíritu Santo, nca⁴ cje³ sˀe³-jin²le⁴ cjoa⁴je³ya³ Jesús.

Hechos de los Apóstoles 2:36

Cjai¹nca³ nta³ ca²ta³ve³ nca³tsˀi³ cho⁴ta⁴ Israel nca³ je² Jesús xi³ jon² tsa³cja³tˀao³ cro², Ni³na¹ tsa³ca³sen¹nta³ Nai³-na¹ cˀoa⁴ Cristo.

Hechos de los Apóstoles 3:13

Je² Ni³na¹-le⁴ Abraham cao⁴ Isaac cao⁴ Jacobo, je² Ni³na¹-le⁴ nˀai³jcha¹cjin³-na¹ tsa³cˀa³sje³je³ya³ Jesús xi³ ˀnti¹-le⁴, je² xi³ jon² qui³ni²⁴ntsjao³. A³li² tsain⁴-jin²jin⁴ tsa³qui³xon¹³ nqui³xcon⁴ Pilato, cˀia⁴ nca³ je² qui³si³cja³ˀai³tsjen³ nca³ si⁴²cˀe¹jna³ntai¹.

2 Corintios 3:18

To⁴coi³ ña¹ nca³tsˀia³² nca³ tsi² tjio¹ˀma³ ncjan³², nca³ cho¹tsen³ya³² jo³-ni³ tsa² jnco³ cho⁴tsin¹ je² cjoa⁴je³ya³-le⁴ Nai³-na¹, cˀoa⁴-sˀin² cji³vˀa³ntjai²ya³² nca³ cˀoa⁴coan⁴ cjoan³² jo³ cjoan³ Nai³-na¹, nca³ tjin¹-na¹ cjoa⁴je³ya³, cˀoa⁴ nqui²sa⁴ tse³ cjoa⁴je³ya³ nca³ nčhoa¹-ni³ je² Nai³-na¹ xi³ je² Espíritu.

Efesios 1:12

Ni³na¹ tsa³cja³ˀa¹jin³-na³jin⁴ nca³ jin⁴-jin⁴ xi³ ti¹tjon² qui³cho³ya²cao⁴cjoai⁴-jin⁴ tˀa³tsˀe⁴ Cristo, jme¹-ni³ nca³ coan⁴ chˀa⁴sje³nta³-si¹ni³jin⁴ je² cjoa⁴je³ya³-le⁴.

Efesios 2:7

jme¹-ni³ nca³ je² ni⁴čhjin³ xi³ nčhoa¹-sa³ coa⁴co²-si¹ni³ je² cjoa⁴nta³-le⁴ xi³ li² to⁴jo³ xi³ cji³tse³, nca³ cˀoa⁴-sˀin² qui³sˀe³-le⁴ cjoa⁴ma⁴ta³con² tˀa³tsan⁴² nca³ ti³yo³coa⁴² Cristo Jesús.

Efesios 3:10

Cˀoa⁴ coan³ jme¹-ni³ nca³ je² na⁴xi⁴na³nta¹-le⁴ Cristo coa⁴co²ya³-si¹ni³le⁴ ntˀai⁴-vi⁴ je² xi³ tjin¹-le⁴ xa¹ti¹tjon² cao⁴ xi³ tjin¹-le⁴ nca³nˀion¹ ya⁴ ncˀa³jmi³. Cao⁴co²ya³-le⁴ je² cjoa⁴ˀi³sen³ta³con²-le⁴ Ni³na¹ xi³ cjai¹ ncjin² jco⁴ya³ tjin¹.

Filipenses 2:11

jme¹-ni³ nca³ si⁴²qui²xi⁴ya³nta³-si¹ni³ nca³tsˀi³ cho⁴ta⁴ nca³ Jesucristo je² ni¹ Nai³-na¹. Cˀoa⁴-sˀin² cˀoa⁴sje³je³ya³ Ni³na¹ Nˀai³-na¹.

1 Pedro 1:21

Xi³ to⁴tˀa³tsˀe⁴ Cristo ma³cjain¹-no³ xi³ tˀa³tsˀe⁴ Ni³na¹, je² xi³ qui³si³cja³ˀa¹ya³jin-ni³le⁴ cˀen³, cˀoa⁴-ti⁴ je² xi³ qui³tsjoa³-le⁴ cjoa⁴je³ya³. Coi³ cjoa⁴-vi⁴ nca³ cˀoa⁴-sˀin² ma³cjain¹-no³, cˀoa⁴ cho¹ya³-lao⁴³ tˀa³tsˀe⁴ Ni³na¹.

1 Pedro 2:12

Nta³ ta³nquin¹cao⁴³ yao³-no³ ya⁴jin³-le⁴ cho⁴ta⁴ xi³ li² judío-jin². Nta³ tsa² jo³-ni³ cho⁴ta⁴tsˀen⁴ ve³con³-no³, cˀia⁴ tsa² scoe⁴ nca³ nta³ xa¹-no³, cˀoa⁴sje³je³ya³ Ni³na¹ coi³ ni⁴čhjin³ nca³ Ni³na¹ cjoa⁴ˀai¹con³-le⁴.

1 Pedro 4:11

Tsa² jnco³ xi³ nchja⁴, ca²ta³nchja⁴ jo³ tso² en¹-le⁴ Ni³na¹. Tsa² jnco³ xi³ si¹xa¹cao⁴, ca²ta³si¹xa¹cao⁴ jo³ tjin¹ nca³nˀion¹ xi³ tsjoa¹ Ni³na¹, jme¹-ni³ nca³ coi⁴tjo³je³ya³-si¹ni³ Ni³na¹ cao⁴ nca³yi³je³ cjoa⁴ xi³ to⁴tˀa³tsˀe⁴ Jesucristo. Tsˀe⁴ ni¹ cjoa⁴je³ya³ cao⁴ cjoa⁴te¹xo³ma³ xi³ ni⁴cˀia³-jin² cjoe⁴tˀa³. Cˀoa⁴ ca²ta³ma³.