29 Je² Nˀai³-na⁴ xi³ qui³tsjoa³-na³ va³rre²-na⁴, je² ni¹ ti¹tjon²-le⁴ nca³yi³je³ cjoa⁴. Ni⁴ˀya³-jin² xi³ coan⁴ cjoa⁴ˀa²xin²ya³-ni³ ntsja³ Nˀai³-na⁴ je² va³rre²-na⁴.
An³ tsjoa³-le⁴ cjoa⁴vi³jna³chon³ nca³ntsjai². Ni⁴to⁴cˀia³-jin² nca³ ntia³ cha⁴, ni⁴to⁴ˀya³-jin² xi³ cjoa⁴ˀa²xin²ya³-ni³ ntsa⁴.
An³ cao⁴ Nˀai³-na¹ to⁴jnco³-ni¹⁴jin⁴.
Qui³no²ˀya²-nio¹³ jo³ qui³xin³-no³: Cjoia¹³, cjoa²ˀai⁴con³-nca¹ni³no³. Tsa² coan³tsjoa³cha³-nao¹³, cjai¹nca³ to⁴tsjoa³ coan³-no³, nca⁴ cˀoa⁴qui³xian³ nca³ cjoi¹con³-le⁴ Nˀai³-na¹. Je² Nˀai³-na¹ nqui²sa⁴ ti¹tjon² cao⁴-ni³ tsa² an³.
Li²coi³ ti⁴ˀi⁴ ti²jna⁴-nia³ i⁴ son³ˀnte³-vi⁴, to⁴nca³ je² i⁴ tjio¹ i⁴ son³ˀnte³-vi⁴. An³ cjoi¹con³-le²³ nca³ ji³. Nˀai³tsje³, nta³ ti⁴ca³tio²tjoa²nqui³ nca³nˀion¹-li⁴ je² xi³ cao⁴ jan³ˀain¹-li⁴ tsa³cˀai²-nai¹³.
Jo³-sˀin² nca³ tsa³cˀai²-lai⁴ cjoa⁴te¹xo³ma³ xi³ tˀa³tsˀe⁴ nca³tsˀi³ cho⁴ta⁴, jme¹-ni³ nca³ tsjoa¹-si¹ni³le⁴ cjoa⁴vi³jna³chon³ nca³ntsjai² nca³tsˀi³ xi³ tsa³cˀai²-lai⁴.
Je² cho⁴ta⁴ xi³ tsa³cˀai²-nai¹³ i⁴ son³ˀnte³-vi⁴, an³ tsa³ca³co³son²tsen³-le⁴ jo³ cjoain³ nca³ ji³. Tsi⁴ ni¹³, cˀoa⁴ ji³ tsa³cˀai²-nai¹³. Qui³si³qui³tjo³son² en¹-li⁴.
An³ vˀe³tsˀoa³ntje²³ nca³ je². A³li² je² cho⁴ta⁴son³ˀnte³-vi⁴ vˀe³tsˀoa³ntje²³, to⁴je² cho⁴ta⁴ xi³ ji³ tsa³cˀai²-nai¹³, nca⁴ je² xi³ tsi⁴.
Je² nca³tsˀi³ xi³ tsjoa¹-na³ Nˀai³-na¹ cjoa⁴ˀai¹con³-na³, cˀoa⁴ je² xi³ fa³ˀai³con²-na³, an³ li²coi³ mˀaon³sje³.