Apocalipsis 12:17 - New Testament in Mazatec Huautla

¹⁷ Cˀia⁴ je² cho⁴toan¹-ve⁴ a³li² cˀoa⁴cji³ coan³jti³que³ chjon⁴²-ve⁴. Qui³ sˀin¹ cjoa⁴jchan¹, co²ntran⁴ qui³-le⁴ je² xi³cˀa³ ntje⁴-le⁴ chjon⁴²-ve⁴, jña³-le⁴ xi³ si¹tjo³son² je² cjoa⁴te¹xo³ma³-le⁴ Ni³na¹, cˀoa⁴ tsjoa¹ en¹ tˀa³tsˀe⁴ Jesucristo.

Apocalipsis 12:17 ပူးပေါင်းရင်းမြစ်များ

San Mateo 28:20

Ta⁴co²ya³-lao⁴³ nca³ ca²ta³si¹tjo³son² nca³yi³je³ cjoa⁴ xi³ an³ tsa³cˀe³ne²³-no³. Coe⁴-ni³ an³ ti²jna⁴cao⁴-no³ nca³ jon² nca³ntsjai² ni⁴čhjin³, sa³ˀnta³ nca³ cjoe⁴tˀa³ son³ˀnte³-vi⁴. Cˀoa⁴ ca²ta³ma³.

San Juan 8:44

Jon² nio¹³ xi³ nˀai³-no³ je² nai⁴², cˀoa⁴ tsjoa³-no³ nca³ cˀoa⁴sˀiaon⁴³ jo³-sˀin² me³-le⁴ nˀai³-no³. Je² nˀai³-no³ si¹cˀen³ cˀen³ sa³ˀnta³ ti¹tjon², cˀoa⁴ li²coi³ tsa³cˀe²jna³jin³-le⁴ xi³ cjoa⁴qui²xi⁴, nca⁴ tsin²-le⁴ cjoa⁴qui²xi⁴-jin². Cˀia⁴ nca³ nchja⁴ en¹nti³so³, nchja⁴ jo³ cjoan³ nca³ je². Nti³so³ nca³ je², cˀoa⁴ nˀai³-le⁴ cjoa⁴nti³so³.

1 Corintios 2:1

Ntsˀe³², cˀia⁴ nca³ qui³con³-no³, a³li² cao⁴ en¹ncˀa³-jin² qui³con³-no³, ni⁴cao⁴ cjoa⁴chji⁴ne⁴ xi³ ncˀa³-jin² nca³ qui³tsjoa³-no³ cjoa⁴qui²xi⁴ xi³ tˀa³tsˀe⁴ Cristo.

1 Pedro 5:8

To⁴jvi³ to⁴ˀi³nta³ ti⁴yo³, ti⁴yo³chon³ˀntao³, nca⁴ je² co²ntran⁴-no³, je² nai⁴², jo³-ni³ tsa² xa³ xi³ ti¹va³te¹, ti¹si¹cˀo¹tji³ntai³-no³, ti¹va¹sjai³ ˀya³ xi³ squi⁴ne⁴.

1 Juan 2:3

Coi³ ˀya³-nia¹ nca³ tsa³ˀya³² nca³ je², tsa² ni²cji³tjo³soan² cjoa⁴te¹xo³ma³-le⁴.

1 Juan 5:10

Je² xi³ ma³cjain¹-le⁴ tˀa³tsˀe⁴ ˀnti¹-le⁴ Ni³na¹, je² cjoa⁴ xi³ qui³ni²qui²xi⁴ya³ ti¹jna³jin³ ni⁴ma⁴-le⁴. Je² xi³ tsi² ma³cjain¹-le⁴ tˀa³tsˀe⁴ Ni³na¹, tsa³cˀa³sje³ nti³so³ Ni³na¹, nca³ tsi²coi³ coan³cjain¹-le⁴ je² en¹ xi³ Ni³na¹ qui³si³qui²xi⁴ya³ xi³ tˀa³tsˀe⁴ ˀnti¹-le⁴.

1 Juan 5:2

Cˀoi⁴-sˀin² ˀya³-nia¹ nca³ tjao²cha³² ˀnti¹-le⁴ Ni³na¹, cˀia⁴ nca³ tjao²cha³² Ni³na¹, cˀoa⁴ ni²cji³tjo³soan² cjoa⁴te¹xo³ma³-le⁴.

Apocalipsis 1:2

Je² Juan qui³tsjoa³ en¹-le⁴ xi³ tˀa³tsˀe⁴ en¹-le⁴ Ni³na¹, cˀoa⁴ xi³ tˀa³tsˀe⁴ en¹-le⁴ Jesucristo, cˀoa⁴ xi³ tˀa³tsˀe⁴ nca³yi³je³ cjoa⁴ xi³ tsa³ve³.

Apocalipsis 1:9

An³ xi³ Juan ˀmi²-na³, xi³ ntsˀao³. To⁴jnco³ ti³chja³ˀa³² cjoa⁴ñˀain³, cˀoa⁴ ti²jna⁴cao⁴-no³ ya⁴ cjoa⁴te¹xo³ma³-le⁴ cao⁴ cjoa⁴tse³jta³-le⁴ Jesucristo. An³ tsa³ca²te⁴jna³ ya⁴ ˀnte³ xi³ ti¹jna³jin³ nta¹chi³con³, ya⁴ jña³ nca³ isla Patmos ˀmi², xi³ tˀa³tsˀe⁴ en¹-le⁴ Ni³na¹, cˀoa⁴ xi³ tˀa³tsˀe⁴ en¹-le⁴ Jesucristo.

Apocalipsis 11:7

Cˀia⁴ nca³ je² jao² testigo cjoe⁴ tsjoa¹ en¹-le⁴, je² cho⁴ xi³ vi³tjo³mi³-ni³ nti⁴tjan⁴ jña³ nca³ ti⁴xˀa⁴jin³sen¹, cjoa⁴jchan¹ sˀin⁴² co²ntran⁴-le⁴ nca³ je². Si⁴²qui³njen³-le⁴, cˀoa⁴ si⁴²cˀen³.

Apocalipsis 12:16

Cˀoa⁴ je² na³nqui³ tsa³ca³sen¹cao⁴ je² chjon⁴²-ve⁴, je² na³nqui³ qui³tjo³ˀai², ya⁴ qui³sˀen³ nta¹je⁴ xi³ tsa³cˀa³sje³-ni³ tsˀoa³ je² cho⁴toan¹.

Apocalipsis 13:7

Qui³tsˀai²ˀnte³-le⁴ nca³ qui³si³toan¹cao⁴ cho⁴ta⁴-le⁴ Cristo, cˀoa⁴ nca³ qui³si³qui³njen³-le⁴. Cˀoa⁴-ti⁴ qui³tsˀai²-le⁴ cjoa⁴te¹xo³ma³ xi³ tˀa³tsˀe⁴ nca³yi³je³ ntje⁴, cao⁴ nca³yi³je³ na⁴xi⁴na³nta¹, cao⁴ nca³yi³je³ en¹, cao⁴ nca³yi³je³ ˀnte³.

Apocalipsis 14:12

Xi³ to⁴coi³ cjoa⁴-vi⁴ nca³ cjoa⁴tse³jta³ xi³ ma³chjen¹-le⁴ cho⁴ta⁴-le⁴ Cristo. Ma³chjen¹-le⁴ nca³ si¹tjo³son² cjoa⁴te¹xo³ma³-le⁴ Ni³na¹, cˀoa⁴ nca³ ma³cjain¹-le⁴ tˀa³tsˀe⁴ Jesús.

Apocalipsis 17:14

Je² xi³ cˀoa⁴-sˀin² scan³cao⁴ je² Va³rre², cˀoa⁴ je² Va³rre² si⁴²qui³njen³. Je² ni¹ je² Nai³ti¹tjon²-le⁴ xi³ nai³ ma³, cˀoa⁴ nca³jco⁴-le⁴ je² xi³ cho⁴ta⁴ti¹tjon². Je² xi³ tjio¹cao⁴ cˀoa⁴-sˀin² qui³no²cjoa⁴-le⁴, cˀoa⁴-sˀin² qui³tjo³jin³, cˀoa⁴ nˀion¹tˀa³con³.

Apocalipsis 17:6

Tsa³ˀve³ chjon⁴²-ve⁴ nca³ chˀi⁴ cao⁴ njin¹-le⁴ cho⁴ta⁴-le⁴ Cristo, cao⁴ njin¹-le⁴ je² xi³ cˀen³ xi³ tˀa³tsˀe Jesús. Cˀia⁴ nca³ tsa³ˀve³ jo³ to⁴coan³xcon¹-na³.

Apocalipsis 18:20

Ti⁴tsjoa³ya³-lao⁴³ ta³con²³ xi³ tˀa³tsˀe⁴ na⁴xi⁴na³nta¹-ve⁴, ji³ ncˀa³jmi³, cˀoa⁴ jon² xi³ cho⁴ta⁴-le⁴ Cristo, cˀoa⁴ jon² xi³ pa²stro⁴, cˀoa⁴ jon² xi³ no²cjoa⁴yao³ tˀa³tsˀe⁴ Ni³na¹, nca³ Ni³na¹ cˀoa⁴-sˀin² qui³si³jnta³-le⁴ je² na⁴xi⁴na³nta¹ xi³ to⁴tˀa³tsaon⁴³.

Apocalipsis 19:10

An³ qui³sca³nquia³ ntso⁴co⁴ nca³ tsa³ˀve³xcoan¹³. Cˀoa⁴ je² qui³tso²-na³: A³li² cˀoa⁴-jin² nˀiain²³. Cˀoa⁴-ti⁴ an³ cho⁴ˀnta³ nia¹³ jo³-ni³ ji³, cao⁴ je² ntsˀai³ xi³ tjin¹-le⁴ je² en¹ xi³ tˀa³tsˀe⁴ Jesús. Jcha⁴xcoin¹³ Ni³na¹, nca³ je² en¹ xi³ tˀa³tsˀe⁴ Jesús coi³ cjoa⁴ xi³ no²cjoa⁴ya³-ni³.

Apocalipsis 19:19

Tsa³ˀve³ je² cho⁴, cao⁴ cho⁴ta⁴ti¹tjon² xi³ tsˀe⁴ son³ˀnte³ cao⁴ so³nta²do⁴-le⁴, xi³ to⁴jnco³ tjio¹ nca³ cˀoa⁴-sˀin² sˀin⁴² cjoa⁴jchan¹. Co²ntran⁴ coai⁴-le⁴ je² xi³ ti¹jna³son² na⁴xin¹, cˀoa⁴ co²ntran⁴ coai⁴-le⁴ je² so³nta²do⁴-le⁴.

Apocalipsis 20:4

Tsa³ˀve³ ya¹xi²le⁴, cˀoa⁴ tsa³ca³tio²son² je² xi³ qui³tsˀai²-le⁴ nca³ tsjoa¹ cjoa⁴ñˀain³. Tsa³ˀve³ ni⁴ma⁴-le⁴ je² xi³ qui³ti³sin³ xi³ to⁴tˀa³tsˀe⁴ je² en¹-le⁴ Jesús, cˀoa⁴ xi³ to⁴tˀa³tsˀe⁴ en¹-le⁴ Ni³na¹, xi³ tsi² tsa³ve³xcon¹ je² cho⁴-ve⁴, ni⁴je²-jin² xco¹son²-le⁴jin², xi³ tsi² tsa² qui³sˀe³choa⁴ tjen³, ni⁴ya⁴ ntsja³-jin². Tsa³cˀe¹yo³con², jnco³ jmi³ no¹ tsa³ca³te¹xo³ma³ cao⁴ Cristo.

Apocalipsis 22:14

Jo¹ to⁴nta³-le⁴ je² xi³ va³ne¹ na³jño³-le⁴, jme¹-ni³ nca³ tjin¹-si¹ni³le⁴ ˀnte³ cao⁴ ya¹-le⁴ cjoa⁴vi³jna³chon³, cˀoa⁴ cjoa⁴ˀa³sˀen³-si¹ni³ ya⁴ xo⁴ntjoa⁴-le⁴ na⁴xi⁴na³nta¹.

Apocalipsis 6:9

Cˀia⁴ nca³ je² tsa³cˀa³sje³tˀa³ je² xi³ ma³ˀaon²-ni³ sello, tsa³ˀve³nqui³-le⁴ son²xta² ni⁴ma⁴-le⁴ je² xi³ qui³ni²cˀen³ xi³ to⁴tˀa³tsˀe⁴ en¹-le⁴ Ni³na¹, cˀoa⁴ xi³ to⁴tˀa³tsˀe⁴ je² en¹-le⁴ xi³ qui³tsjoa³.