ZÔELA 2:14 - Mara Bible RV (BSI)

¹⁴ Abeipa nama Khazohpa cha, A ngiapachhi leipa aw ta, A palôh panano aw vei tahpa ahy ma a pahno ei chi? Niepa hlâna nata dopa hlânazy Ano lâ nama hlâ thei nawpa ta, Byhnâzy cha siesaipa aw veih ei tahpa chhao, Ahy ma a pahno ei chi?

ZÔELA 2:14 ပူးပေါင်းရင်းမြစ်များ

2 SAMUELA 12:22

Dâvi ta, “Hawtipa a hro thlâh ha chy no kha cha, ‘Abeipa ta na ngiachhie aw ta, hawtipa he a hroh thei mâh tâh, ahy a pahno,’ tah na ta, kâhvileipa ta y na ta, ei cha tlai.

2 SAMUELA 16:12

Abeipa ta ei chô liata â doleipa ta a hmotaopa he hmô aw ta, tanoh ta ei chô liata chhie a sapa he a phapa lâta Abeipa ta eina thô thei mâh tâh,” tah ta.

2 ABEIZY 19:4

Khazohpa hrohpa pasipasawh awpa ta, a zibeipa Asuria bei ta a kaw tuapa Râbâsake bie zydua kha, Abeipa na Khazohpa ta thei ta, a biereipa a theipazy vâna chata Abeipa na Khazohpa ta a ra tlai aw. Chavâta laibâhpa a y tlakaihpazy châta na thlahchhâna avâ lâ pakiasa mah y,’ a cha tah,” tah ei ta.

PUASAINA 32:30

A mylâ ta Mawsi ta zawpi hnohta, “Moleina lai ngaitapa nama tao haw. Tahmâ he Abeipa lâ khy aw na ta, nama moleina chatlaina ei tao thei aw tly ma,” tah ta.

ISAI 65:8

Abeipa ta hetana heta a tah: “Kresawhti thiehpa cha kre sao liata y ta, ‘Parao khah u, byhnâ a hnei khawh,’ ama tahpa hawhta; Nâ chakaotuhpazy vâta, He hmo he tao aw na ta, Pahleipadia khai aw veih ei na.

ZEREMIAH 18:8

cha phopi chata a châna awpa ei phuahpa vâna chata, a moleina â heihsai khiahta cha, a chô liata chhiena patlôsa ei chhuahpa cha ei pathleih aw.

ZEREMIAH 26:13

Chavâta tahmâ nama hroziezy nata nama hmotaoziezy a taopathi u la, Abeipa nama Khazohpa bie zyh teh u. Chatanachata nama chô liata chhiena a vaw tlô awpa a phuah hapa kha, Abeipa ta a pathleih aw.

ZEREMIAH 26:3

Nathlie aw ei ta, chyhsa to ama hrozie pha leipa ama siesai thei ngyu aw lah. Chatanachata ama hmotaopa pha leipazy vâta ama chô liata chhiena tao ei chhuahpa cha ei pathleih aw.

ZÔELA 1:13

Nâmo, theihthaipazy saih u, Latho poh a bupa ta chaphôh tu u la, Nâmo, maisâh chakaotuhpazy saih u, A hrô teh u. Hy ei Khazohpa chakaotuhpazy saih u, A vy u la, latho poh a bupa ta Azozâkhihdei a zia teh u! Niepa hlâna nata dopa hlânazy Nama Khazohpa o liata pachhâsapa a châ ha hih.

ZÔELA 1:16

Eima mohmô lia tlai ta, Niepa pachhâsapa châ ta; Eima Khazohpa o liata Alyna nata thaphana chhâ ha vei ma?

ZÔELA 1:9

Niepa hlâna nata dopa hlânazy Abeipa o liata dia ha ta; Theihthaipazy mâchhiesa ei ta, Abeipa chakaotuhpazy mâchhie ama sa.

AMÔSÂ 5:15

Chhiena a haopa ta phana khoh u la, Thokhy chhikao liata ryureina dopa padua teh u; Cha hawhta nama tao khiahta cha, Zehôvâh, Pheisaihzy Khazohpa ta Zawsi chi laibâhpazy cha, A ngiachhie thei ngyu aw.

ZAWNA 1:6

Balyh hyutuhpa cha ano lâ a vy ta, a hnohta, “Nâ a môpa, kheihtazie ta e? Thyu la, na khazoh pado teh! Khazoh chata eima leidia lei nawpa ta, miah a pachâ ngyu aw mâh tâh,” tah ta.

ZAWNA 3:9

Ahy ma a pahno tly? Eima leidia lei nawpa ta, Khazohpa cha a palie thei ta, a palôh pananopa ta, a hiehâhna ru ngaitapa tawhta â palie thei mâh tâh,” tah ta.

ZEPHANIA 2:3

Nâmo, khizaw liata areisipa zydua saih u, Abeipa cha pado u la; Nâmo, a biepiepa a zyhpa zydua saih u, Abeipa cha pado teh u. Siana tlua u la, Nawhna tlua teh u; Chatanachata Abeipa hiehâhna noh liata Nyupa nama châ aw.

HÂKAI 2:19

Sawvâ liata chi a y chy ma? Hmeiseihta cha, Kre zôh, theiku kô, pawmikarânâ nata ôli kô zy pathei tlâ khao veih ei. Tanoh tawhta deikua cha, byhnâ ei cha pie aw ei,” tah ta.

2 TIMAWTHY 2:25

Khazohpa ta ano a dyuhtuhpazy chhao parosa thei ta, biehmeiseihpa pahnona lâ â chhi thei ei tahpa a ngiapâpa ta, Abeipa chakaotuhpa cha nônai kawpa ta taopathina rai a hria awpa a châ.

ZAWSUA 14:12

Chavâta Abeipa ta na pie awpa ta, kha noh ta a reipa tlâh râh he kei na pie mah y. Cha liata Anâki mo y ei ta, ama khihpizy lai ngaita ta, thokhyzy ta dôh khaipa ama châ tahpa chhao, kha noh ta pahno ha chi ta. Abeipa ta na bao aw ta, Abeipa ta a reipa hawhta, âmo cha ei papua aw ei,” tah ta.

1 SAMUELA 6:5

Nama kheihluh nothlahpazy nata nama râh a paraotuhpa siahloh nothlahpa zy tao u la, Izarei Khazohpa cha palyupalih teh u. Cha hawhta nama tao khiahta cha, nâmo chô liata nata nama khazohzy nata nama râh chô liata a ku a pahua thei ngyu aw.