ZEREMIAH 6:19 - Mara Bible RV (BSI)

¹⁹ Hy leilô y, nathlie teh; Ei biezy nathlie leipa ei ta, Ei ryhpa ama dythapa vâta, Ama hmotaopa theilâpa chhiena cha, He phopi chô liata ei vaw patlôsa aw.

ZEREMIAH 6:19 ပူးပေါင်းရင်းမြစ်များ

BIESOZY 15:26

Moleipazy pachâna cha Abeipa châta pasichhihpa châ ta, Mopathaihpazy bie deikua cha khochhihpa a châ.

BIESOZY 28:9

Ryhpa nathlie khoh leipa ta a nah su hro lâ a paheipa cha, A thlahchhâna chhao pasichhihpa a châ.

ISAI 1:2

Hy avâzy saih u, nathlie u la, Hy leilô, na nah pachô teh; Abeipa ta hetana heta a tah: “Sawzy a kuhkheipa ta palaiseihsa ei na ta, Châhrasala einâ chariah ha ei.

ISAI 5:24

Chavâta mei ta sâhkô chuahmi charôh ta, Meipaleih vâta sibie raohpa â chahkaopa hawhta, Ama thari hmy aw ta, Ama paw chhao doh hawhta â zaw aw; Pheisaihzy Abeipa ryhpa dytha ei ta, Izarei Mo Pathaihpa bie ama mohnaopa vâta.

ISAI 59:7

Ama pheizy cha, Hmo pha leipa tao nawpa lâ a râ ta; Thaileina a hnei leipa thisaih palo awpa ta, Ama phei a chatlie kaw tyh. Ama pachânazy cha, Moleina hmo pachânazy châ ta; Ama lâlaizy liata Roryhrana nata paraona zy a y.

ISAI 66:18

“Ama hmotaopazy nata ama pachâpazy ei pahno. Râh to nata reih to ei chhipakhy nawpa daihti a vaw tlô hai. A vy aw ei ta, ei rônahna ama hmô aw.

ZEREMIAH 11:11

Chavâta Abeipa ta hetana heta a tah, moh teh u, chhiena ama chô liata vaw patlôsa na ta, khôkhâh thei aw veih ei. Na aw hra ei sala, a chhy aw veih ei na.

ZEREMIAH 15:6

Na thy ha chi ta, Hnôh nâ sy lymâ. Chavâta na chô liata ei ku hy na ta, Ei cha pahleipadia haw; A ngiapachhi tiah khao va na, Abeipa ta a tah.

ZEREMIAH 17:10

“Kei, Abeipa he chyhsa to ama hrozie hawhta thôpa ta, Ama hmotaopa thei hawhta thô awpa ta, Palôh a mohtuhpa châ na ta, Pachâna a pasiatuhpa ei châ.”

ZEREMIAH 19:15

“Pheisaihzy Abeipa, Izarei Khazohpa ta hetana heta a tah, moh teh u, ama kuh a pachhasa ei ta, ei biezy ama nathlie khoh leipa vâta, he khihpi chô liata nata a khichapeih zydua chô liata chhiena patlôsa awpa ta ei phuahpa kha ei vaw patlôsa aw.”

ZEREMIAH 19:3

Hetana heta na tah aw: ‘Hy Zudâh beizy nata Zerusale khihsawzy saih u, Abeipa bie he thei teh u. Pheisaihzy Abeipa, Izarei Khazohpa ­ta hetana heta a tah: Pachâ teh u, he su liata chhiena rarôh ypa vaw patlôsa aw na ta, a theipa maihta ama nah a khai aw.

ZEREMIAH 21:14

“Nama hmotaopa theilâpa lymâ hawhta cha hrie aw ei na ta, A râhmâhpa liata mei patih aw na ta, A chheipâh liata a ypa zydua a kâ khai aw,” Abeipa ta a tah.

ZEREMIAH 22:29

Hy râh, râh, râh y, Abeipa bie he thei teh!

ZEREMIAH 29:19

Ei biezy ama nathlie leipa vâta, cha cha ama chô liata ei tao aw,’” Abeipa ta a tah. “Nâ chakaotuhpa hrohsopazy nâmo lâ vaw tuah chanei ngâ thlâh ha ei na ta, châhrasala ama bie nathlie veih ei chi,” Abeipa ta a tah.

ZEREMIAH 4:14

Hy Zerusale, pachhapa ta na y thei nawpa ta, Hmo pha leipa tawhta na palôh pasi ha mah y. Khachâ taih ma pachâna moleipa nâ vao aw?

ZEREMIAH 4:16

Phopizy zikyu a râ u la, Zerusale liata phuah teh u. Dôhtuhpazy râh hlapi tawhta vaw tlô ei ta, A pahôpahâhpa ta Zudâh khihpizy ama phyh chie.

ZEREMIAH 4:4

Hy Zudâh râhsawzy nata Zerusale khihsawzy saih u, Abeipa lâta nama chopaw tai u la, Nama palôh chopawzy tai teh u; Chataleipatala moleina hmo nama taopazy vâta, Ei hiehâhna mei hawhta pua aw ta, Ahy hmahta pachhai thei leipa ta a kâ pathlei aw na.”

ZEREMIAH 49:37

Ama chariahpazy nata ama hrona la a chhuahpazy hmiakô liata, Elâmi mo cha chipa ta paysa aw ei na ta, ei hiehâhna ru ngaitapa lei thlupa ta, ama chô liata chhiena ei patlôsa aw,” Abeipa ta a tah. “Ei pahleipadia khai hlâlei ei cha, zaozi ta ei chadaisa lymâ aw ei.

ZEREMIAH 6:10

Ahyzy ma zikyurâna bie he chho aw ei na ta, A nathlie aw ei tly i? Moh teh u, nakhaoh chopaw tai leipa châ ei ta, Nathlie thei veih ei. Âmo châta la Abeipa bie he zakheichhihpa hmo châ ta, Abeipa bie liata alyna hnei veih ei.

ZEREMIAH 6:18

Chavâta Hy phopizy saih u, Nathlie u la; Hy zawpizy saih u, Ama chô liata a tlô awpa pahno teh u.

ZEREMIAH 8:5

Cha hawhta a châpa tlai ta, Khazia ma he phopi heta lâpi tlei ei ta, Hnôh amâ sy pathlah ha tly i? Dôveina khâchâ patu ei ta, Kua khoh khao veih ei.

ZEREMIAH 8:9

Chyhsa sopazy maophyuh aw ei ta, Chihuhpa ta ypa ta patupa ama châ aw. Pachâ teh u, Abeipa bie ama thy ha tawhta cha, Âmo liata khâpa sona cha ma a y khao aw?

DÂNIAH 9:11

Izarei zydua ta na ryhpa parao ei ta, tleisai ei ta, na ao nathlie khoh veih ei. Chavâta châ chakaotuhpa Mawsi Ryhpa liata chhiesana nata bietai zy kha eima chô liata patlai thlupa ta eima y ha hih. Abeipa chô liata na eima vaw molei haw tlai.

HÔSIA 10:13

Nâma pachâna liata a pahnieh chi ta, Pasaipha hluhpi na hneipa na ngâpa vâta, Moleina lei paliepa ta, Adoleina sâh hria chi ta, Haiphiana theilâpa na nie.

HÔSIA 4:6

Pahno leina vâta Ei phopi cha paraopa a châ; Pahnona na dythapa vâta, Ei theihthaipa na châna tawhta Ei cha dytha ha hra. Na Khazohpa ryhpa na mypa vâta, Kei chhao ta na sawzy ei my hra aw.

AMÔSÂ 2:4

Abeipa ta heta na heta a tah: “Zudâh moleina miathôh vâta, Âh, miapalih vâ chhao rai ta, Hriena chalihsa aw va na; Abeipa ryhpa dytha ei ta, A bieraopazy ama zyh leipa vâta. Âmo pathlatuhzy lâpi a chhih ei ta, Ama haipa biezy ta a paviasa ei.

MIKÂ 1:2

Hy phopizy saih u, thei u la, Nama zydua ta thei teh u; Hy leilô y, nathlie la, A chhôh lia a ypa zydua chhao nathlie teh u. Abeipa Zehôvâh ta cha leih ei ta, Abeipa ta Achhyna o pathaihpa tawhta a cha leih ei.

MIKÂ 6:2

Nâmo, tlâhpizy saih u, Nâmo, leilô abôna hlôpazy saih u, Abeipa ta a phopi a leihna bie he nathlie tua u; Abeipa ta ano phopi leih nawpa hnei ta, Izarei cha â dyuh aw.

ZAWHÂNA 12:48

Ahy rai nâ khoh leipa nata ei bie a zyh leipa cha, pachiatuhpa pakha a hnei. Ei bie reipa, kha bie tlai khata, noh chhâna noh liata ano cha a pachia aw.

HMOTAOPAZY 8:22

Chavâta na moleina ro la, na palôh phaozie a châ ngiahthai thei nawpa ta, Abeipa lâ thlahchhâ mah y.

RYHPACHANEINA 30:19

Nama hmiakô liata hrona nata thina soh na ta, byhnâ nata chhiesana ei soh tahpa pahnokheituhpa châta tanoh he avâ nata alei ei aw ei. Hrona a tlyh u la, chatanachata nâmo nata nama chipathlazy nama hroh aw.

RYHPACHANEINA 32:1

“Hy avâzy saih u, Nah pachôh teh u, Bie ei reih aw; Ei pakah tawhta biezy he Alei ta thei mawh sy.

RYHPACHANEINA 4:26

nâmo pazei nawpa ta pahnokheituhpa châta avâ nata alei tanoh ei aw ei. Zawdâh chakapa ta nama kei hnei awpa râh tawhta thlai leidia aw ei chi ta, cha râh liata hroh pareih leipa aw ei chi ta, pahleipadia khaipa nama châ aw.

1 SAMUELA 15:23

Chhoruna cha pachaopa moleina nata a lyu ta, Akhotlâhna chhao nothlah a chhypa thaileichâna hawh a châ. Abeipa bie na khoh leipa vâta, Ano chhao ta bei châta cha khoh khao vei,” tah ta.

1 SAMUELA 15:26

Samuela ta Sawla hnohta, “Châ liekhei aw va na. Abeipa bie na khoh leipa vâta, Abeipa ta nâ chhao Izarei chô liata bei châta cha khoh khao hra vei,” tah ta.