ZEREMIAH 50:9 - Mara Bible RV (BSI)

⁹ Pachâ teh u, maw lâ râh phopi rônahpazy pahmaoh aw ei na ta, Babylaw a dyuh awpa ta pathyu aw ei na ta ei vaw chhi aw ei. Babylaw a dyuh awpa ta a paziah aw ei ta, Babylaw cha maw lâ tawhta pahniepa a châ aw. Ama châtaizy cha, Chariah a dyuh thaipa pasaipha lyu ei ta, Ku ruapa ta a kua leipa a châ.

ZEREMIAH 50:9 ပူးပေါင်းရင်းမြစ်များ

2 SAMUELA 1:22

“Hmaphaohpazy thisaih tawhta, Pasaiphazy thaw tawhta, Zawnathâ libaw kua beih leipa ta, Sawla zaozi chhao a ruapa ta a lie beih vei.

HLAZY HLA 3:8

Ama zydua ta zaozi a vao ei ta, Riah tu a thaipa sai ama châ. Ama byhpi liata zaozi a vao chyu ei ta, Zâ chariah chichhihpazy amâ dyuh.

ISAI 21:2

Aluahna rarôh ypa ei hnohta phuahpa a châ; Paphasaituhpa ta a paphasai ta, Paraotuhpa ta a parao. Hy Elâmi, khy la, Hy Media, dôh teh. Chyhsa a pahrôsa tyhpa zydua kha Ei pachhâsa haw.

ISAI 41:25

Maw lâ tawhta chyhsa pakha pathyu na ta, A vaw tlô haw; Nochhi lâ tawhta ei moh na vaw pado aw ta, Ryureituhpazy cha chiatlao hawhta tlypâ aw ta, Beihvituhpa ta beihlei a tlypa hawhta a tly aw ei.

ZEREMIAH 15:14

Ei hiehâhna ta mei patipa châ ta, chhâzaw ta a kâ awpa vâta, na pahno leipa râh liata na chariahpazy chakao awpa ta ei cha tao aw.”

ZEREMIAH 25:14

Phopi hluhpi nata bei rônahpazy ta Babylaw mo chhao tlai cha sei ta tao aw ei ta, ama hmotaopa lymâ hawhta nata ama ku rai hriapa lymâ hawhta ei thô aw ei,” Abeipa ta a tah.

ZEREMIAH 25:26

maw lâta bei zydua, lâhla nata lâhnia a pazi lymâpa ta, hiehâhna nyu cha padosapa châ ei ta, alei chô liata a ypa khizaw khinarâh zydua chhao padosapa ama châ. Âmo khai tawhta Babylaw bei ta a doh awpa a châ.

ZEREMIAH 50:14

“Libaw a keituhpa zydua saih u, Babylaw chadôpa ta a paziah u la, Châtaizy chado leipa ta Babylaw cha ka teh u; Abeipa chô liata a molei haw.

ZEREMIAH 50:21

“Merâthai râh siehnao u la, Pekô mo siehnao teh u. Âmo cha thiepa ta tlokhuh pahleipadia u la, Bie ei cha piepa zydua ei kha tao khai teh u,” Abeipa ta a tah.

ZEREMIAH 50:26

Râhri chhâna su to tawhta vaw siehnao u la, A sawpâhzy pahy khai teh u; Sâh pathlupa hawhta Babylaw cha pathlu u la, Tlokhuh pahleipadia teh u; Khâpa hmah pahlôh khuh vy.

ZEREMIAH 50:29

“Babylaw a dyuh awpa ta, Likathaipazy aw u la, Libaw a keipa zydua aw teh u. Babylaw chadôpa ta riehmozy paryh u la, Ahy hmah papua khuh vy. A hmotaopa lymâ hawhta viarithô u la, A taopa zydua hawhta a chô liata tao teh u; Sâlâ kawpa ta Abeipa a dyuh ta, Izarei Mo Pathaihpa a dyuhtuhpa a châ.

ZEREMIAH 50:3

“Maw lâta phopi ta za siehnao aw ta, A râh roryhrapa ta a tao aw; Chyhsapa nata râhsa zydua a râ khai aw ei ta, Râh liata a pahrâpa y khao aw veih ei.

ZEREMIAH 51:11

“Châtaizy chata u la, Vyhphaozy a chaba teh u! Abeipa ta Babylaw parao a chhuah ha ta, Chavâta Media beizy palôh a pathyu haw; Cha cha Abeipa phuh lana châ ta, Achhyna o phuh a lana a châ.