ZEREMIAH 5:1 - Mara Bible RV (BSI)

¹ Zerusale khiliah liata a râhreih u la, Moh u la, ngia teh u! A tlyliahzy liata tlua u la, Adona tao ta ngâchhihna a tluapa Pakha chhâ nama hmô khiahta cha, Zerusale cha ei ngiahthai aw.

ZEREMIAH 5:1 ပူးပေါင်းရင်းမြစ်များ

1 ABEIZY 19:10

Elaizâh ta, “Abeipa, Pheisaihzy Khazohpa châta phahnai a ngiah ngaita tyh na ta. Izarei sawzy hra ta na biehrai tleisai ei ta, na maisâhzy pacho ei ta, na hrohsopazy zaozi ta chhawhsao ei ta, keima, keima deita he a laibâhpa y na ta, keima chhao he ei hrona na la amâ chhuah,” tah ta.

2 THÂTIHZYRONA 16:9

Abeipa mo cha, ano lâta palôh tlokhuh a paheihpazy thatlôpa ta bao awpa ta, khizaw zydua a tawpâ thlâh ha mâh tâh. Hru kawpa ta hmo tao chi ta, tahmâ tawhta cha, chariah a dyuh awpa khâ na hnei aw,” tah ta.

HLAZY 12:1

Hy Abeipa, na bao mah y, Khazohpa a pachâpazy y khao leipa ei ta, Ngâchhihpazy cha chyhsa sawzy hry tawhta ama lei ha hih.

HLAZY 14:2

Abeipa ta vârâh tawhta chyhsa sawzy za sai ta, Novâhna hneipa ta, Khazohpa a tluapa ama y ma tahpa a za moh tyh.

HLAZY 14:3

Pavia khai ha ei ta, Avyuhna liata amâ ngia khai haw; Hmo pha a taopa rai y veih ei, Pakha hmah y veih ei.

HLAZY 94:16

Ahy ma moleipa cha nâ thyuhnaopa aw? Ahy ma hmoparaopazy a dyuhpa ta ei châta a duah aw?

BIESOZY 20:6

Mo hluhpi ta chyhsa phapa hawhta âmosasyh a reih ei ta, Chyhsa ngâchhihpa deikua ahy a hmô thei aw?

BIESOZY 23:23

Biehmeiseihpa chalei la zuah khao leipa la, Sona nata pachuna nata pahnona zy chalei mah y.

BIESOZY 8:3

Khih thokhy chhikao kiah liata zy, Hawka liata zy a duah ta, Hetana heta ao paro ngaitapa ta a awh tyh:

HLAZY HLA 3:2

Thyu aw na ta khihpi chahryhpa ta, Lâlaizy nata tlyliahzy chahryh laih aw na ta, Lôh rie ei ngiabâh chaipaw cha ei tlua laih aw. Tlua laih na ta, châhrasala hmô va na.

ISAI 59:4

Ryureina liata adona a duakheipa y leipa ei ta, Biedopa a reihpa y veih ei. Bie ruapa a duakheipa ta, Haipa biezy reih ei ta; Adoleina saw phaoh ei ta, Moleina saw ama sa tyh.

ZEREMIAH 2:29

Khazia einâ dyuh ei chi tly? Nama zydua ta ei chô liata hmo nama parao haw,” Abeipa ta a tah.

ZEREMIAH 44:15

Ama lapinôzy ta khazoh hropazy lâ ropahâhpa ama raopa a pahnopa chapaw zydua nata cha liata a duahpa chanô zydua nata Izi râh Pâtharô liata a pahrâpa chyhsa zydua, zawpi hluh ngaitapazy ta Zeremiah cha a chhy ei ta, a hnohta,

ZEREMIAH 8:6

A phapa ta nathlie na ta, Ama biereipa ei thei; Biedopa reih leipa ei ta, Ahy hmahta, ‘Khâpa ma ei vaw tao ha tly?’ Tahpa ta ama paraona ro a chhuah veih ei. Chyhsa to ta âmo lâpi lâ sai a heih ei ta, Adyuhna su liata arâ a thluah ngâpa ama lyu.

ZEREMIAH 9:2

Râhchawhpa liata khichhai riebu ei hnei mawh sala, Ei phopi he siesaipa ta, Âmo tawhta ei pua syulyu ha awpa tlai! Ama zydua ta apheipazy châ ei ta, Haiphiahpa ypakhypa ama châ.

ZEREMIAH 9:7

Chavâta Pheisaihzy Abeipa ta hetana heta a tah: “Ei phopi cha pathaisa aw ei na ta, Ei pasia aw ei. Cha hawhta tao thlâh ha leipa ta cha, Ei phopi châta khâpa hropa ma ei tao aw tly?

EZEKIA 22:30

“Râh cha ei parao lei nawpa ta, a dôhna thokhy a tao awpa nata ei hmiakô liata râh châta apyupa liata a duah awpa chyhsa ama hry liata tlua na ta, châhrasala pakha hmah hmô veih ei na.

EZEKIA 9:9

Abeipa ta ei hnohta, “Izarei nata Zudâh pathlazy moleina rarôh a y tu haw. Râh cha thisai ta bie ta, khihpi chhao avyuhna ta a bie. ‘Abeipa ta râh siesai ha ta, Abeipa ta hmô vei,’ ama tah.

DÂNIAH 12:4

Nâ deikua cha, Hy Dâniah y, chhâna daihti a tlô hlâlei cha, bie cha nyu la, châbu kha pakuh la khâchâ baipâ ha mah y. Chyhsa hluhpi a râhreih aw ei ta, pahnona a pôh aw,” tah ta.

ZÔELA 2:9

Khihpi chô liata a zaw ei ta, Thokhyzy ama kiah; Ozy chhao kiah ei ta, Parutuhpa hawhta opyzy lâ tawhta amâ ngia.

AMÔSÂ 8:12

Tilaipi tawhta tilaipi hropa lâ sie aw ei ta, Maw lâ tawhta nochhi lâ ama sie aw; Su to lâta a râ aw ei ta, Abeipa bie ama tlua aw; Châhrasala hmô aw veih ei.

ZEKARIA 2:4

a hnohta, “A râ la, kha thyutliapa hnohta, ‘Zerusale cha a chhôh liata a pahrâpa chyhsa nata sahrohzy ama hluh ngaita awpa vâta, thokhy ta dôh byuh leipa khihpi châ aw ta,

LUKA 14:21

Chakaotuhpa cha a vy ta, cha biezy cha a zibeipa chho ta. O hneituhpa cha a pathi ia kaw ta, a chakaotuhpa hnohta, ‘A chatliepa ta pua la, khihpi lâlai nata lâpizy lâ vawh la, dyhchhiepazy, pihpasipazy, mochaopazy, pheisypazy a vaw chhi teh,’ tah ta.

2 THYSALAWNIKA 2:10

Leidia haipazy cha pachha châ nawpa biehmeiseihpa khoh leipa ta ama dythapa vâta, ryhpa paraotuhpa cha dôveina pha leipa to chhaota âmo lâ â vy aw.