ZEREMIAH 32:23 - Mara Bible RV (BSI)

²³ Bie nâ taih râh lâ cha a ngia ei ta, râh cha ama hnei. Châhrasala na bie a ngiah leipa ei ta, na ryhpa a chhih hra leipa ei ta, tao awpa ta bie na piepazy tao veih ei. Chavâta he chhiena zydua he ama chô liata na patlôsapa a châ hih.

ZEREMIAH 32:23 ပူးပေါင်းရင်းမြစ်များ

EZRÂ 9:7

Miah pathlatuhpazy daihti tawhta tanoh taihta thata thailei a châpa eima châ. Eima paraonazy vâta, keimo nata eima beizy nata eima theihthaipazy cha, râh hropa beizy ku liata nata zaozi ta thie awpa ta hlâpa châ pi ta, seichâna lâta a chhi awpa nata hrao awpa ta hlâpa eima châ. Tanoh taihta noza hmiachhiepa ta eima y.

NEHEMIAH 9:15

Ama nodi nota avâ tawhta viahchhâ pie chi ta, ama dâhphi nota lôpanô tawhta ti papua chi ta, âmo pie awpa ta na bâh avâ lâ pazawhpa ta bie nâ taihpa râh a ngia ta, hnei awpa ta na chho ei.

HLAZY 78:10

Khazohpa biehrai zyh leipa ei ta, A ryhpa lâpi a chhih veih ei.

ZEREMIAH 2:7

A râh kôvei nata hmo phapazy nie awpa ta, Râh pha ngaitapa lâ ei cha chhihtha ei. Châhrasala nama tlô nahta, Ei râh cha papuapalei ei chi ta, Ei ryuto cha hmo pasichhihpa ta nama tao.

ZEREMIAH 26:4

“Ama hnohta hetana heta na chho aw ei, ‘Abeipa ta hetana heta a tah: Na nathlie leipa u la, nama hmiakô liata ei sopa ei ryhpa zyh leipa u la,

ZEREMIAH 44:10

Tanoh taihta a panawh to leipa ei ta, nâmo nata châ pathlatuhpazy hmiakô liata ei sopa ei ryhpa nata ei bieraopazy a chhih khoh leipa ei ta, chi hra veih ei.

ZEREMIAH 7:26

Châhrasala na nathlie khoh leipa ei ta, ama nah pachôh hra leipa ei ta, ama kuh tlao amâ pachhasa. Âmo a pathlatuhpazy hlâ chhao ta ama paru via.

CHAPHÔHTUNA 1:18

“Abeipa cha a siapa châ ta, A bie a zyh leipa cha keima he ei vaw châ; Chatahrasala Hy phopi zydua saih u, nathlie u la, Ei pasataona he moh tua u; Ei satlia laihsa zy Seichâna lâ ama sie khai ha hih.

CHAPHÔHTUNA 1:8

Zerusale cha thata molei ta, Chavâta a pualei haw; A thluahruana ama hmô hapa vâta, A za kaw tyhpazy chhao ta ama mohnao bâ; Ano chhao ta a hrô ta, Hiakha lâ tlâ â heih bâ.

EZEKIA 20:18

“Chatawhcha râhchawhpa liata ama y nona chata ama pathlazy hnohta, ‘Châ pathlatuhpazy bieraopazy a chhih leipa u la, ama ryhpazy zyh hra leipa u la, ama khazoh nothlahpazy ta a papuapalei hra khuh vy.

EZEKIA 20:21

Châhrasala ama pathlazy ta nâ dyuh ei ta, chyhsapa ta zyh sala a hro nawpa ta ei piepa ei bieraopazy a chhih leipa ei ta, ei ryhpazy zyh hra leipa ei ta, ei Pahânohzy ama papuapalei. Chavâta râhchawhpa liana khata ei pathiiana lei thlupa ta, ei hiehâhna cha âmo chô liata papai thlu awpa a chhuah na ta.

EZEKIA 20:8

“Châhrasala na chakhia ei ta, na nathlie khoh veih ei. Ama mo ta a pasô kawpa hmo pasichhihpazy cha thy leipa ei ta, Izi râh khazoh nothlahpazy chhao a heihsai veih ei. Chavâta Izi râh liana chata ei pathiiana lei thlupa ta, ei hiehâna âmo papai thlu awpa a chhuah na ta.

LUKA 17:10

Cha hawhna hra chata nâmo chhao, nama hnohta biepiepa zydua nama tao khai tita, ‘Chakaotuhpa phahnai leipa eima châ, eima tao awpa na tlâ eima tao,’ tah muh vy,” tah ta.

ZAWHÂNA 15:14

Bie ei cha piepa maih nama tao khiahta la, ei viasazy nama châ.

KALATIA 3:10

Ryhpa hmotaopazy liata a pahniehpa zydua cha, chhiesana ry liata ama y, “Ryhpa châbu liata bie ropa zydua a tao leipa nata a zyh leipa maih cha chhiesapa ta y mawh sy,” tahpa ropa châ tlôh ta.

ZÂMIE 2:10

Ahy rai ryhpa zydua zyh paki hra sala, kyh kha a parao khiahta cha, a zydua liata thaileipa a châ.

ZAWSUA 21:43

Cha hawhna chata Abeipa ta Izarei sawzy cha, ama pathlatuhpazy hnohta pie awpa ta bie â vaw taihpa râh zydua pie ta. Chatanachata râh cha hnei ei ta, cha liata pahrâ ei ta.

ZAWSUA 23:16

Abeipa nama Khazohpa ta bie a cha piepa ei, a biehrai paraopa ta, khazoh hropazy pangaipa ta âmo cha chakaopa ta namâ chhy khiahta cha, nama chô liata Abeipa pathi ia aw ta, râh phapa a cha piepa tawhna ei heta thlai nama leidia aw,” tah ta.