ZEREMIAH 28:4 - Mara Bible RV (BSI)

⁴ Babylaw bei raopaky thlie aw na ta, Zehôki sawchapawpa Zudâh bei Zekôniah nata Zudâh tawhta Babylaw lâ sei ta a siepa zydua kha, he su lâ he ei vaw chhi pakhua heih aw ei, Abeipa ta a tah,” tah ta.

ZEREMIAH 28:4 ပူးပေါင်းရင်းမြစ်များ

ÂTHAONA 27:40

Na zaozi ta hroh aw chi ta, Na unawhpa na chakao aw; Na pua tita deikua cha, A raopaky na rao tawhta na pahluh aw,” tah ta.

2 ABEIZY 24:14

Zerusale khihsaw zydua, beimachâ zydua nata pasaipha zydua siekhei khai ta, sei 10,000 tlai a siekhei ei. Zôthaipa nata syudaihpa zydua chhao a siekhei khai ha ei. Chyhsa dyhchhie chaipazy tah leipa ta cha, râh liata ahy hmah y khao veih ei.

ISAI 9:4

Midia mo pahnie noh hawhna khata, A raopaky phaohri thlie pachhô chi ta, A ngiatlâh liata sômasi chhao thlie pachhô chi ta, A tlybaituhpa chôchahrei chhao na thlie pachhô khai haw.

ZEREMIAH 13:19

Neke khihpizy khawpa châ ei ta, A pahy awpa y veih ei; Zudâh pôhpalôhpa sei ta a chhipa châ ei ta, Ama siekhei khai haw.

ZEREMIAH 2:20

“Hlâno tawhta na raopaky thliepa ta, Na bâliazy chhie na ta, Châhrasala, ‘Cha chakao aw va na,’ tah chi ta, Tlâh sâhpa to nata tho hrohpa ry to liata, Âzuahnô hawhta nâ bôh tyh.

ZEREMIAH 22:10

A thi hapa chakhei leipa u la, Mâchhie sapa hra khah u. Â paih hapa deikua cha, Vaw kua khao leipa aw ta, A pina râh a hmô heih khao lei awpa vâta, Thata cha­khei teh u.

ZEREMIAH 22:24

“Ei hrona reipa ta ei reih,” Abeipa ta a tah. “Zudâh bei Kôniah, Zehôki sawchapawpa cha ei ku chachâh lâta chahnaona kusadi châ hra la, cha pahluh aw na ta,

ZEREMIAH 24:1

Babylaw bei Nebukaneza ta Zehôki sawchapawpa Zudâh bei Zekôniah cha, Zudâh beimachâzy nata zôthaipazy nata syudaihpazy chhaota Zerusale tawhta Babylaw lâ sei ta â chhi tawhta, he aluahna he Abeipa ta eina pahmôsapa a châ: Abeipa Achhyna o hmiakô liata patyupa theiku hrâbyh miano hmô na ta.

ZEREMIAH 24:5

“Izarei Khazohpa Abeipa ta hetana heta a tah: Zudâh râh tawhta seichâna lâ a siepa, he râh tawhta Kaldia mo râh lâta ei tua hapazy cha, theiku phapa hawhna khata ei pachâ aw ei.

ZEREMIAH 27:8

“‘“Phopi kheihawhpa tlyma, khinarâh kheihawhpa tlyma ta Babylaw bei Nebukaneza cha chakao khoh leipa sala, Babylaw bei raopakypa â ky khoh leipa khiahta cha, Babylaw bei ku ta ei thie khai hlâlei ei cha, zaozi, chakâhna nata potlana zy hmâpa ta, cha phopi cha ei hrie lymâ aw,”’” Abeipa ta a tah.

ZEREMIAH 28:10

Hrohsopa Hânaniah ta hrohsopa Zeremiah a kypa raopaky cha la ta, thlie pachhô ta.

ZEREMIAH 28:2

“Pheisaihzy Abeipa, Izarei Khazohpa ta hetana heta a tah: Babylaw bei raopakypa ei parao haw.

ZEREMIAH 29:1

He he Nebukaneza ta Zerusale tawhta Babylaw lâ sei ta â chhipazy hry liata a hrohpa ta a ypa machâzy, theihthaipazy, hrohsopazy nata zawpi zydua hnohta hrohsopa Zeremiah ta châ a paphaopa liata a ropa biezy a châ.

ZEREMIAH 29:2

Cha châ cha Bei Zekôniah, abei nô, hrilyupazy, Zudâh nata Zerusale beimachâzy, zôthaipazy nata syudaihpazy Zerusale ama puasai tawhta Zeremiah ta a ropa a châ.

ZEREMIAH 30:8

“Chatawhcha hetana heta a vaw châ aw. Cha noh liata ama raopaky thlie pachhô aw na ta, ama rao tawhta ei pahluh aw. Ama bâliazy chhao chhie aw na ta, chihropazy ta sei ta tao khao aw veih ei.

THEIHTHAINA 26:13

Kei he Abeipa nama Khazohpa, Izi mo sei nama châ khao lei awpa ta, Izi râh tawhta nâmo châ chhi papuatuhpa ei châ. Nama raopakyzy thlie pachhô na ta, â patlâpa ta ei cha pasiesa ei.

NÂHU 1:13

Tahmâ cha a raopaky cha thliepa aw na ta, Na bâliazy ei chhie pachhô bâ aw.”