ZEREMIAH 27:10 - Mara Bible RV (BSI)

¹⁰ Nama râh tawhta lâhlapi lâ a chhipa nama châ thei nawpa ta, haipa ta hrohsona bie nama hnohta a phuahpazy ama châ. Cha to papua aw ei na ta, nama leidia aw.

ZEREMIAH 27:10 ပူးပေါင်းရင်းမြစ်များ

PUASAINA 22:18

“Dyuthaipa chanô na pahlôh awpa châ vei.

ZEREMIAH 14:14

Abeipa ta hetana heta einâ chhy: “Hrohsopazy ta ei moh ta haipa ta hrohsona biezy ama phuah tyh. Âmo cha ei tuapa châ leipa ei ta, biepie hra leipa ei na ta, ama hnohta bie reih hra va na. Aluahna phichhyhpa, pachaona hraoleipa nata ama palôh liata dôveina biezy ama cha chhopa a châ.

ZEREMIAH 23:16

Pheisaihzy Abeipa ta hetana heta a tah: “Nama hnohta hrohsona bie a phuahpa hrohsopazy bie nathlie khuh vy. Hnabeiseihna hraoleipazy ta châ pabietuhpazy deita ama châ. Abeipa pakah tawhta a puapa châ leipa ta, âmo palôh liata hmo a lâpazy ama reih tyh.

ZEREMIAH 23:25

“‘Mâ ei sa, mâ ei sa!’ tah ei ta, ei moh ta haipa ta hrohsona bie a phuahtuhpa hrohsopazy bie reipa ei thei.

ZEREMIAH 27:14

‘Babylaw bei nama chakao awpa châ vei,’ châ tahtuhpa hrohsopazy bie nathlie khuh vy. Haipa ta hrohsona bie ama cha chhopa a châ.

ZEREMIAH 27:15

Ei tuapa châ leipa ei ta, ei moh ta haipa ta hrohsona bie ama phuah. A theilâpa cha, nâmo nata nama hnohta hrohsona bie a phuahpazy râh tawhta cha to papua aw ei na ta, nama leidia aw,” Abeipa ta a tah.

ZEREMIAH 27:16

Theihthaipazy nata zawpi zydua hnohta chhao hetana heta ei chho ei: “Abeipa ta hetana heta a tah: ‘Pachâ teh u, Abeipa o hmobaohzy cha Babylaw tawhta thlai vaw tlôkheipa a châ aw,’ tahpa ta nama hnohta hrohsona bie a phuahpa hrohsopazy bie nathlie khuh vy. Haipa ta hrohsona bie ama cha chhopa a châ.

ZEREMIAH 28:11

Chatawhcha Hânaniah ta zawpi zydua hmiakô liata bie reih ta, “Abeipa ta, ‘Kha hawhna khata Babylaw bei Nebukaneza raopaky cha, kô no chhôh ta phopi zydua rao tawhta pahluh aw na ta ei thlie pachhô aw,’ a tah” tah ta. Hrohsopa Zere­miah deikua cha, a sie nawpa lâ sie syulyu ha ta.

ZEREMIAH 28:16

Chavâta Abeipa ta hetana heta a tah: ‘Pachâ teh, alei cho tawhta ei cha thy aw. Abeipa chakhiana bie na reipa vâta, atakô lia tlai ta na thi aw,’” tah ta.

ZEREMIAH 32:31

He khihpi he ama padua tua noh tawhta tanoh taihta ei hie na pahâhpa ta, ei ru nâ pachhôtuhpa a châ. Chavâta ei mohmô tawhta ei pahlei syulyu ha aw ei.

ZEREMIAH 8:19

Râh do nata hâ liata, Ei phopi zuah chana ao he nathlie tua u: “Zaio liata Abeipa y vei ma? A chhôh liata ano Bei y vei ma?” “Khazia ama nothlahpa taopazy ta ei hie na pahâh ei ta, Chihropa khazoh nothlahpazy ta ei hie eina pahâh ei?”

CHAPHÔHTUNA 2:14

Na hrohsopazy ta na châta Aluahna phichhyhpa nata dôveina zy ama hmô; Vânoh na to heih thei nawpa ta, Na moleina palâhâh veih ei; Aluahna phichhyhpa nata paviana zy Na châta tlao ama hmô tyh.

DÂNIAH 4:7

Moliethaipazy, dyuthaipazy, awhsithaipazy nata pachaothaipazy a vy ei ta, ei mâsapa cha âmo chho ei na ta, châhrasala a chhopasiana na chho thei veih ei.

ZEKARIA 10:2

Nothlahpa khazohzy ta dôveina bie reih ei ta, Pachaothaipazy ta aluahna doleipa ama hmô; Mâsathaipazy ta haipa mâzy sa ei ta, Thlalôhna bie ruapazy ama reih tyh. Chavâta chyhsazy cha, Mietaku hawhta viavi ei ta; Vaituhpa hnei leipa vâta Pasa ama tao tyh.

MALAKHAI 3:5

“Pachia awpa ta châ vaw hnia aw ei na ta, dyuthaipazy, apheipazy, haipa ta bie â taihpazy, ama raihriatuhpazy hlao â dopa ta a pie leipazy, nôhmei nata hara a tlybaipazy, chihropa nama hry liata a ypazy chô liata adoleipa ta hmo a taopazy nata nâ chi leipazy châta, a chatliepa ta âmo a leihtuhpa ei châ aw,” Pheisaihzy Abeipa ta a tah.

RYHPACHANEINA 18:10

Ama sawchapaw nata sawchanô mei liata a hlâpazy, pachaothaipazy, kulâmohthaipazy, moliethaipazy nata peihthaipazy nama hry liata ama y awpa châ vei.