ZEREMIAH 25:9 - Mara Bible RV (BSI)

⁹ pachâ teh u, maw lâta chipho zydua bieta aw ei na ta, na chakaotuhpa Babylaw bei Nebukaneza chhao bieta aw na ta, âmo cha he râh nata a chhôh liata a pahrâpazy nata he chheipâh liata phopi zydua a dyuh awpa ta ei vaw chhi aw ei. Tlokhuh pahleipadia khai aw ei na ta, rarôh ypa nata hmaotô chiepa nata roryhrapa ta chhâzaw ta y awpa ta ei tao aw ei,” Abeipa ta a tah.

ZEREMIAH 25:9 ပူးပေါင်းရင်းမြစ်များ

2 ABEIZY 24:2

Abeipa ta Kaldia pheisaihzy, Aramia pheisaihzy, Môabâ pheisaihzy nata Amawna pheisaihzy cha Zehôki a dyuh awpa ta tuah ta. Abeipa ta a chakaotuhpa hrohsopazy hmâpa ta a vaw rei hapa Abeipa bie hawhta, Zudâh siehnao ta parao awpa ta a tuapa ei a châ.

2 THÂTIHZYRONA 29:8

Chavâta Abeipa pathiiana cha Zudâh nata Zerusale chô liata vaw tlô ta, nama mo ta nama hmôpa hawhna heta, chichhihpa nata noâhpa nata hmaotô chie awpa ta a tao ha ei.

2 THÂTIHZYRONA 36:21

Cha hmo cha râh ta Pahânohzy a hmâh thei nawpa ta, râh cha kô sysari chhôh roryhrapa ta a y awpa kyh, Zeremiah pakah ta a reipa Abeipa bie a vaw tlôpaki nawpa a châ.

BIESOZY 21:1

Abei palôh cha Abeipa ku liata y ta, Vahtie ti hawhta a khona lâ maih a palosa tyh.

ISAI 10:5

Asuria cha a hu a po na! Ano cha ei pathiiana sômasi châ ta, A ku liata ei hiehâhna chôchahrei a y.

ISAI 13:3

Ei pathaisapazy cha keima tlai ta biepie ha ei na ta, Ei pasaipha, ei ly kawpa nata ei palaikhei kawpazy cha, Ei hiehâhna pi patloh nawpa ta ei aw ha ei.

ISAI 39:7

Na sawchapawpa, na chhôh tawhta a pua awpa, nâ ta na sa awpazy tlai chhao siekheipa châ aw ei ta, Babylaw abei o liata hrilyupa ta ama y aw, a tah,” tah ta.

ISAI 44:28

Kôresâ kyh liata, ‘Ano cha ei mietaku vaituhpa châ ta, Ano ta ei chhuahna zydua pi a patloh aw,’ A tahtuhpa ei châ. Zerusale kyh liata, ‘Paduapathipa a châ aw,’ tah na ta, Achhyna o kyh liata, ‘Nâ bôna lôbô bôpa a châ aw,’ A tahtuhpa ei châ.”

ZEREMIAH 1:14

Abeipa ta ei hnohta, “Râh liata a pahrâpa zydua chô liata maw lâ tawhta chhiena a vaw tlô aw.

ZEREMIAH 1:15

Pachâ teh, maw lâta abeinarâhzy liata chipho zydua aw ei na ta, a vy aw ei ta, Zerusale thokhy chhikaozy liata ama beidyuchhai patyuh chyu aw ei ta, a thokhy zydua nata Zudâh khihpi to liata ama patyu thlu aw, Abeipa ta a tah.

ZEREMIAH 10:22

Nathlie tua u, bie pathâhpa vaw tlô ta, Maw lâ râh tawhta tyhreihna rarôh ypa a vaw pathâh hai. Zudâh khihpizy roryhrapa ta paysapa ta, Savaizy pahrâna ta tao awpa ta a vaw pathâh.

ZEREMIAH 12:14

Abeipa ta hetana heta a tah: “Ei phopi Izarei hnohta ryuto râh ei piepa a chhutuhpa ei chheipâh râh moleipa zydua cha, moh teh u, ama râh tawhta phia aw ei na ta, Zudâh pathlazy chhao ama hry tawhta ei phia aw ei.

ZEREMIAH 18:16

Ama râh cha roryhrapa ta paysa ei ta, Chhâzaw ta hmaotô chie awpa ta ama tao. A chapiapa maihta noâh tah ei ta, Ama luh ama chahuah.

ZEREMIAH 2:15

Chakeibarôhneipa lochopazy ta a rôh thlu ei ta, A paro ngaitapa ta amâ rôh thlu lymâ. A râh roryhrapa ta tao ei ta, A khihpizy chhao ry khai ha ta, A chhôh liata a pahrâpa y khao veih ei.

ZEREMIAH 20:4

Abeipa ta hetana heta a tah: Pachâ teh, Nâma châta nata na viasa zydua châta chichhihpa ta ei cha tao aw. Âmo cha eina moh thlâh ha no ei ta, ama chariahpazy zaozi ta ama pao aw. Zudâh mo zydua cha Babylaw bei ku liata hlâ khai aw ei na ta, Babylaw lâ sei ta a chhi aw ei ta, zaozi ta a thie aw ei.

ZEREMIAH 24:9

Khizaw khinarâh zydua ta ama moka awpa ta tao aw ei na ta, âmo ei tona su to liata ama reipachhiepa, chhiena lâta pakhopâna ta ama hmâpa, ama pasipasawhpa nata chhie ama sa thlupa ta ei tao aw ei.

ZEREMIAH 25:8

“Chavâta Pheisaihzy Abeipa ta hetana heta a tah: Ei bie nama nathlie leipa vâta,

ZEREMIAH 29:18

Zaozi nata chakâhna nata potlana zy ta a chadai aw ei na ta, alei chô liata khinarâh zydua châta rarôh ypa ta tao aw ei na ta, âmo ei to papuana phopi zydua hry liata chhiesapa, chichhihpa, hmaotô chiepa nata reipachhiepa châ awpa ta ei tao aw ei.

ZEREMIAH 35:11

Châhrasala Babylaw bei Nebukaneza ta râh a kaw siehnao tita deikua cha, ‘A vy teh u, Kaldia pheisaihzy nata Aramia pheisaihzy riahchipa vâta Zerusale lâ sie ei suh u,’ tah pi ta. Chavâta Zerusale liata a pahrâpa eima châ,” tah ei ta.

ZEREMIAH 36:2

“Châbu la la, na hnohta bie ei rei pathaona Zôsia daihti tawhta tanoh taihta Zerusale nata Zudâh nata phopi zydua thâtih na hnohta ei reipa zydua kha, châbu liata roh khai mah y.

ZEREMIAH 36:29

Zudâh bei Zehôki kyh liata cha, hetana heta na tah aw, ‘Abeipa ta hetana heta a tah, “Khazia Babylaw bei a vy tlai aw ta, râh he pahleipadiapa ta, râh tawhtapa he chyhsapa nata râhsazy a chhawh pathlah khai aw ei, tahpa ta châbu liata na roh,” tah chi ta, châbu cha mei ta na vaw rao hapa kha a châ.

ZEREMIAH 4:7

 nyuna sipopa tawhta chakeibarôhneipa vaw pua ha ta, Râhzy paraotuhpa a vaw pua haw; Na râh roryhrapa ta tao awpa ta, A yna su tawhta a vaw pua haw; Na khihpizy cha khihpi rypa châ aw ei ta, A chhôh liata a pahrâpa y khao aw veih ei.

ZEREMIAH 40:2

Pheisaih hyutuhpa ta Zeremiah cha a chhi ta, a hnohta, “Abeipa na Khazohpa ta he chhiena he, he su liata a vaw tlô awpa ta vaw phuah ha ta.

ZEREMIAH 43:10

Chatawhcha ama hnohta hetana heta na chho aw ei: ‘Pheisaihzy Abeipa, Izarei Khazohpa ta hetana heta a tah: Pachâ teh u, nâ chakaotuhpa Babylaw bei Nebukaneza a vaw chhi aw na ta, alô ei pabupazy chô liana heta a beidyuchhai patyuh aw na ta, ano ta a chô liata abei poh o a parai aw.

ZEREMIAH 46:20

“Izi cha viahchao zeinô sabia pha kawpa châ ta, Châhrasala matli ta maw lâ tawhta a za by haw.

ZEREMIAH 49:19

“Pachâ teh u, chakeibarôhneipa ta sibiepa su phapa liata mietakuzy Zawdâh râhmâhpa tawhta eikhapi ta a vaw puahnaopa hawhta, Edômâ chhao a râh tawhta eikhapi ta parâsa aw na ta, ei khopa maih a chô liata biehneituhpa ta ei rao aw. Kei hawhpa ahy y tly? Ahy ma a hmiakô liata a luah awpa ta nâ aw thei tly? Kheihawhpa mietaku vaituhpa ma ei hmiakô liata a duah thei aw tly?

ZEREMIAH 6:1

Hy Benzami pathlazy saih u, Abohna su lâ a râ u la, Zerusale tawhta pua teh u! Tekô liata chiahmie tô u la, Behakere liata ngiana poh chaluah teh u! Maw lâ tawhta chhiena vaw pua ta, Raona rarôh y ngaitapa a vaw pua.

ZEREMIAH 8:16

“Ama arâzy hnaphipa pyu cha, Dânâ tawhta theipa châ ta; Ama arâ tôhpazy sâpa pyu vâta, Râh pôhpalôhpa â chalyu. Vaw tlô ei ta, Râh nata a chhôh liata a ypa zydua nie khai ei ta; Khihpi nata a chhôh liata a pahrâpazy ama nie khai haw.

EZEKIA 12:20

Chyhsa pahrâna khihpizy cha, khih rypa lâta taopa châ aw ei ta, râh cha roryhrapa ta y aw. Chatanachata Abeipa ei châ tahpa nama pahno aw,’ tahpa ta reih mah y,” tah ta.

EZEKIA 16:40

Châ dyuh awpa ta zawpi a vaw chhi aw ei ta, alô ta cha vawh aw ei ta, zaozi ta na chhitlyuna taihta ama cha vieh aw.

EZEKIA 21:11

Chavâta zaozi cha padiehsapa châ ta, a chaba awpa ta piepa a châ haw. Thietuhpa ku liata pie awpa ta, zaozi cha a tiahpa ta chatapa châ ta, padiehsapa a châ haw.

EZEKIA 26:7

“Abeipa Zehôvâh ta hetana heta a tah: Moh teh u, Babylaw bei Nebukareza, beizy bei cha arâzy, talailihzy, arâ pheisaihzy nata pheisaih hluhpi chhaota, Tyre a dyuh awpa ta maw lâ tawhta ei vaw chhi aw.

EZEKIA 36:5

Chavâta Abeipa Zehôvâh ta hetana heta a tah: Ei hiatlia pasana ta phopi hropazy nata Edômâ mo zydua chô liata hiehâh ngaitapa ta bie vaw reih ha na ta. Âmo cha palôh a ly ngaitapa nata papeisana rai hnei leipa ta ei râh nâ chhupazy châ ei ta, râh sibie phana suzy cha ama hraona sôh ta a taopazy ama châ.

DÂNIAH 5:18

Hy abei y, Khazohpa Chônôchaipa ta na paw Nebukaneza hnohta khinarâh zy, laina zy, rônahna zy, abeina zy pie ta.

HABAKU 1:12

Hy Abeipa ei Khazohpa, Ei Mo Pathaihpa, Nâ cha tlyzaw tawhtapa châ va chi ma? Thi aw ma pi. Hy Abeipa, âmo cha Pachiatuhpa châta rao chi ta; Hy Lôpanô, âmo cha, Chhoreituhpa châta na chahnao ei.

HABAKU 1:17

Cha hawhta a châ khiahta cha, A sao cha paruapa ta Chôh chanei lymâ aw ta ma, Ngiachhiena rai hnei leipa ta, Phopizy khâ a thie aw ei?

RYHPACHANEINA 28:37

Chatanachata Abeipa ta a châ chhi nawpa phopi zydua hry liata, chichhihpa nata bieso nata hmo chhiepa lâta pakhopâna nama châ aw.