ZEREMIAH 23:8 - Mara Bible RV (BSI)

⁸ ‘Maw lâ râh tawhta nata âmo a tona râh zydua tawhta Izarei pathla sawzy chhihtha ta a pakuasatuhpa Abeipa hrona reipa ta ei reih,’ tlao tah bâ aw ei ta, âmo râh lia tlai ta ama pahrâ aw,” Abeipa ta a tah.

ZEREMIAH 23:8 ပူးပေါင်းရင်းမြစ်များ

ISAI 11:11

Cha noh liata, Abeipa ta a ei nona ta a ku pazawh heih aw ta, a phopi laibâhpazy cha Asuria, Izi, Pâtharô, Kusi, Elâmi, Sinâ nata Hâmathi râhzy tawhta nata tilaipi kiah râhzy tawhta â vaw chhipakhy heih aw ei.

ISAI 14:1

Abeipa ta Zakaw ngiachhiepa ta, Izarei a tlyh heih aw ta, ama râh tlai liata a paysa heih aw ei. Chihropazy ta âmo cha a bai aw ei ta, Zakaw pathlazy cha amâ pazao aw.

ZEREMIAH 16:14

“Chavâta pachâ teh u, nohzy a vaw tlô hai, Abeipa ta a tah. Cha tita cha ‘Izarei sawzy Izi râh tawhta a kaw chhi papuatuhpa Abeipa hrona reipa ta ei reih,’ tah khao leipa aw ei ta,

ZEREMIAH 16:15

Izarei sawzy cha âmo pathlatuhpazy hnohta ei piepa âmo râh lâ ei chhi pakhua heih awpa vâ ei ta, ‘Izarei sawzy Maw lâ râh tawhta nata âmo a chadai paina râh zydua tawhta a vaw chhi papuatuhpa Abeipa hrona reipa ta ei reih,’ ama tah tyh bâ aw.

ZEREMIAH 23:3

“Ei mietaku zaw laibâhpazy cha âmo ei tona râh zydua tawhta a vaw chhi heih aw na ta, ama sadô liata pangia heih aw na ta, chi hluhpi pathla aw ei ta, ama pôh aw.

ZEREMIAH 29:14

Eina hmô aw ei chi,” Abeipa ta a tah. “Vânoh cha patosa heih aw ei na ta, ei cha pasiesana phopi to nata su to tawhta cha pakhy aw ei na ta, sei ta ei cha patusana su lâ tlai kha ei châ chhi pakhua heih aw ei, Abeipa ta a tah.

ZEREMIAH 30:10

“Chavâta Hy nâ chakaotuhpa Zakaw y, chi leipa la, Hy Izarei y, ngiarohpa ta y khah y,” Abeipa ta a tah. “Pachâ teh, lâhlapi tawhta cha pachha aw na ta, Na pathlazy ama seichâna râh tawhta ei pachha aw ei. Zakaw cha kua heihpa ta sidiapa nata chhôhmohpa ta y aw ta, Ahy ta hmahta pachisa khao aw veih ei.

ZEREMIAH 30:3

Moh teh, ei phopi Izarei nata Zudâh vânoh tona ei paduapathi heih nawpa nohzy a vaw tlô hai. Âmo pathlatuhpazy ei piepa râh lâ a chhi pakhua heih aw ei na ta, cha râh cha ama hnei heih aw,’ Abeipa ta a tah.”

ZEREMIAH 31:8

Pachâ teh u, maw lâ râh tawhta a vaw chhi aw ei na ta, Alei su lâhla chaipazy tawhta ei vaw chhi aw ei; Ama hry liata mochaopa nata pheisypazy a hlao aw ei ta, Saw phaohpa nata nawh zeihpazy amâ hlao aw; Chatanachata zawpi hluh ngaita pa ta, He su lâ he ama vaw kua aw.

ZEREMIAH 32:37

Moh teh u, ei hiehâhna, ei pathiiana nata ei ruchhôna ru ngaitapa ta âmo ei to papua hana râh zydua tawhta pakhy heih aw ei na ta, he su lâ he a vaw chhi pakhua aw ei na ta, â bohpa ta ei paysa aw ei.

ZEREMIAH 8:3

“Ei papaipatla hapa phopi moleipa laibâhpazy cha, ama pahrâna su lia maihta, hro awpa hlâta thi awpa tlao amâ tlyh via aw,” Pheisaihzy Abeipa ta a tah.

EZEKIA 28:25

“Abeipa Zehôvâh ta hetana heta a tah: Izarei pathlazy cha hiepatlapa ta ama yna phopizy tawhta a chhi pakhy heih aw ei na ta, râhzy mohmô ta ei pathaihna ama chô liata ei palâsa tita, nâ chakaotuhpa Zakaw hnohta ei piepa ama râh lia tlai ta ama pahrâ heih aw.

EZEKIA 34:13

Phopizy tawhta a chhi papuapa ta, râh to tawhta pakhy aw ei na ta, ama râh lâ tlai ei chhi aw ei. Chatanachata Izarei tlâhpizy, chavah kiahzy nata chyhsa pahrâna su zydua liata ei pasa aw ei.

EZEKIA 36:24

Phopizy hry tawhta cha lapa ta, râh to tawhta cha pakhy aw ei na ta, nama râh lâ tlai ei châ chhi aw ei.

EZEKIA 36:35

Chatanachata, ‘He râh, roryhrapa ta a y hapa râh he, Idâh sadô hawhta vaw châ ha ta, khihpi rypa nata roryhrapa nata a rao hapazy cha chyhsa pahrâna thokhy khihpizy ama vaw châ ha heih,’ ama tah awh.

EZEKIA 37:25

Nâ chakaotuhpa Zakaw hnohta râh ei piepa, châ pathlatuhpazy vaw pahrâ tyhna râh liata ama pahrâ aw. Cha liata âmo nata ama sawzy nata ama samohzy chhâzaw ta pahrâ aw ei ta, nâ chakaotuhpa Dâvi cha chhâzaw ta ama bei a châ aw.

EZEKIA 39:28

Phopizy hry liata seichâna lâ pasiesa ei na ta, châhrasala ama râh lâ ei chhi pakhua heihpa vâ ei ta, kei he Abeipa ama Khazohpa ei châ tahpa ama pahno aw. Phopizy hry liata a ngua awpa ta pakha hmah siesai khao aw veih ei na.

ZÔELA 3:7

Moh teh u, nama zuana suzy tawhta âmo cha pathyu aw ei na ta, nama viarithôna cha nâmo luh chô lia tlai ta ei vaw pakuasa aw.

MIKÂ 7:15

Izi râh tawhta na kaw puana nohzy hawhna khata, Hmo noâhpazy ei pahmô aw ei.

ZEPHANIA 3:20

Cha daihti liata châ chhi pakhua aw ei na ta, Cha daihti liata ei cha pahmaohpakhy aw ei. Nama mohmô lia tlai ta Vânoh ei cha patosa heih ti ei ta cha, Khizaw phopi zydua hry liata Moh phapa ta cha tao aw ei na ta, Palyupalihpa ta ei cha tao aw ei,” Abeipa ta a tah.