ZEREMIAH 22:22 - Mara Bible RV (BSI)

²² Thlih ta na mietaku vaituhpa zydua vaih aw ta, Na kyhpachâpazy sei ta ama sie aw; Nâ chhao na moleina zydua vâta, Nozapa nata nohzaopa ta na y aw.

ZEREMIAH 22:22 ပူးပေါင်းရင်းမြစ်များ

ISAI 64:6

Chyhsa pathaih leipa hawhta châ khai ha pi ta, Eima siana hmotaopa zydua chhao, Chysia pua­pa hawhta a châ haw. Eima zydua ta chhohna hawhta uah pi ta, Eima paraonazy ta thlih hawhta miah a phaoh.

ISAI 65:13

Chavâta Abeipa Zehôvâh ta hetana heta a tah: “Pachâ teh u, nâ chakaotuhpazy cha nie aw ei ta, Nâmo deikua cha nodipa ta nama y aw; Nâ chakaotuhpazy cha doh aw ei ta, Nâmo deikua cha dâhphipa ta nama y aw; Nâ chakaotuhpazy cha a ly aw ei ta, Nâmo deikua cha nozapa ta nama y aw;

ZEREMIAH 10:21

Mietaku vaituhpazy cha ahrupa châ ei ta, Abeipa a saohiahna châh pahno veih ei. Chavâta vânoh to leipa ei ta, Ama mietaku zawzy ama pai khai haw.

ZEREMIAH 12:10

Mietaku vaituhpa hluhpi ta Ei kre sadô parao ei ta, Ei tovyuh ama tlypâ; Ei tovyuh pha ngaitapa cha, Râhchawhpa roryhrapa ama pachâsa haw.

ZEREMIAH 2:36

“Khazia na yzie pananopa ta, Nâ khiekhâ ngâ thlâh haw? Asuria ta maophyuhpa ta a cha sopa hawhna khata, Izi ta maophyuhpa ta a cha soh aw.

ZEREMIAH 2:37

Abeipa ta nâ ngâchhâpazy dytha ha ta, Âmo vâta vânoh na to khao lei awpa vâta, Na kuzy na luh liata khaihpa ta, Cha su tawhta na pua aw.”

ZEREMIAH 2:8

Theihthaipazy ta, ‘Abeipa khataih liata a y?’ Tah leipa ei ta; Ryhpa a hmâhtuhpazy chhao ta, Na pahno veih ei. Ryureituhpazy ta nâ dyuh ei ta, Hrohsopazy ta Bâlâ moh ta hrohsona bie phuahpa ta, Hmo phahnai leipazy amâ chadai.

ZEREMIAH 20:11

Châhrasala Abeipa cha, Pasaipha chichhihpa hawhta ei hnohta y ta, Nâ taolatuhpazy cha pao aw ei ta, Na pahnie aw veih ei. Ama hlao a tloh lei awpa vâta, Nozapa ta ama y aw. Ama chhâzaw nohzaona cha, Mypa ta y beih aw vei.

ZEREMIAH 30:14

Na kyhpachâpazy ta cha my khai ha ei ta, Cha pachâ khao veih ei; Na thaileichâna lai tu ha ta, Na moleina a hluh tupa vâta, Chariah tu ta cha tu na ta, Zawngiahna a hnei leipa khakhaipa hawhta ei cha hrie.

ZEREMIAH 4:30

Hy nâ, roryhrapa khihpi, Khâpa hmo ma tao nâ chhuah? Poh saihlawpa a bupa ta, Ngôh atobinazy ta a tobi chi ta, Na mozy hlyu na hniapa kha, Khâpa hmo ma tao nâ chhuah? Hraoleipa ta nâ tobipa a châ. Na khopawzy ta cha mohnao pyly ei ta, Na hrona la amâ chhuah pyly.

ZEREMIAH 5:13

Hrohsopazy chhao ziza dei châ aw ei ta, Âmo liata bie y aw vei. Cha hawhna chata ama chô liata taopa a châ aw!” ama tah.

ZEREMIAH 7:19

Keima hie pahâhpa hawhta ma ama pachâ? Âmosasyh ta ama no amâ pazapa tlao châ vei ma? Abeipa ta a tah.

HÔSIA 12:1

Epharai cha ziza chahâpa ta, Noh y ta nochhi thlih a chadai ta, Haiphiana nata atudaina ama papôhsa. Asuria nata biehrai tao ei ta, Izi râh lâ sathaw ama paphao tyh.

HÔSIA 13:15

A unawhzy hry liata Thlaochhipa ta y hra sala, Râhchawhpa lâ tawhta Abeipa thlih, Nochhi thlih a vaw pathli aw; A chavah kua aw ta, A tihnawh a hi aw; A ryusôhpa hmo pha tozy chhao, Hrao khaipa a châ aw.

HÔSIA 4:19

Chavâta thlih ta âmo cha a mathlaw liata chahry ha ta, Amâ theihnazy vâta nozapa ta ama y aw.

ZEKARIA 11:17

“Sahroh zaw a siesaipa Vaituhpa dyutlai leipa cha, A hu a po na! Zaozi ta a bâh chhawh sala, A mo chachâh lâ dy mawh sy! A bâh sy khai sala, A mo chachâh lâ tlokhuh chao mawh sy!” tah ta.

ZEKARIA 11:8

Châhrasala thla kha chhôh ta vaituhpa pathôh ei pabâh ha ei. Ama chô liata ei palôh chhâ kaw ta, âmo chhao ta eina ai kaw hra ei.