ZEKARIA 8:23 - Mara Bible RV (BSI)

²³ Pheisaihzy Abeipa ta hetana heta a tah: Cha nohzy liata, râh to nata reih to tawhta chyhsa pahrawhzy ta Zu chyhsa pakha cha a poh pai patupa ta, ‘Khazohpa nama hnohta a y tahpa thei ha pi ta, chavâta nama hnohta bâh sie hra ei suh u,’ ama tah aw.”

ZEKARIA 8:23 ပူးပေါင်းရင်းမြစ်များ

ÂTHAONA 31:41

Kha kô kih chhôh zydua kha na o liata y na ta. Na sawchanô panozy hnei awpa ta kô hrawh hleipalih cha chakao na ta, na sahrohzy hlao awpa ta kô charu ei cha chakao. Ei hlao ei hrawh tlai na panano.

ÂTHAONA 31:7

Chatanachôta nama paw ta na dôvei ta, ei hlao ei hrawh tlai a panano. Châhrasala eina pasasa awpa deikua Khazohpa ta pasaih vei.

2 ABEIZY 2:6

Elaizâh ta Elaisâh hnohta, “He liata vaw y mah y, ei châ haw na. Kei cha Abeipa ta Zawdâh lâ sie awpa ta eina tuah,” tah ta. Châhrasala ano ta, “Abeipa hrona nata na hrona rei­pa ta ei reih, cha siesai cheita aw va na,” tah ta. Chatanachata ama pano ta sie lymâ ei ta.

1 THÂTIHZYRONA 12:18

Sythôh chô liata hyutuhpa Amasai chô liata Thlahpa vaw tlô ta, ano chata, “Hy Dâvi y, na chyhsazy châ pi ta, Hy Zese sawchapawpa y, Na chhâh a châpazy eima châ hih! Thlalôhna, na chô liata thlalôhna y sala, Châ baotuhpazy chô liata thlalôhna y mawh sy! Na Khazohpa ta a cha bao lymâ hih,” tah ta. Chatawhcha Dâvi ta âmo cha a ly ta, a pheisaih hyutuhpazy ta a tao ha ei.

2 THÂTIHZYRONA 15:9

Zudâh nata Benzami pathla zydua nata ama hnohta khih a sa hrapa Epharai nata Manase nata Simeôna pathlazy awpakhy ta. Zehôvâh Khazohpa a hnohta a y tahpa ama hmô nahta, Izarei maw lâ râh tawhta chyhsa hluhpi ano lâ a bai ei ta.

ESTHERI 8:17

Abei biepiepa nata abei châpapuapa tlôna râh to nata khihpi to liata Zuzy cha thaphana nata alyna ta ama bie. Kyhchhizy taopa ta, apahâna nohzy phuah ei ta. Cha râh liata a ypa phopizy hry tawhta chyhsa hluhpi cha, Zuzy china ta a tla thlupa vâ ei ta, Zu chyhsa lâta amâ palie hôlô.

ZAWBÂ 19:3

Ei hrawh tlai na maochhie ha ei chi ta, Ei chô liata hmo doleipa nama taopa he nama noza vei tly ma?

BIECHHOTUHPA 11:2

Alei chô liata chhiena a vaw tlô thei awpa na pahno leipa vâta, Chyhsa pasari hnohta tovyuh pie la, Pacharie hnohta chhao pie mah y.

ISAI 3:6

Chyhsa ta a unawhpa cha a paw o liata patu aw ta, “Nâ cha chysia hnei chi ta, Chavâta eima chhituhpa ta y mah y; He raona â pathlupa he, Na ryureina ry liata a y aw,” tah aw ta,

ISAI 4:1

Cha noh liata, chanô pasari ta chapaw pakha patu aw ei ta, “Keimo pati nie aw pi ta, keimo chysiazy eimâ tao aw, na moh deita miah paphaosa la, eima nozana miah chhiehruhpa mah y,” ama tah aw.

ISAI 45:14

Abeipa ta hetana heta a tah: “Izi hneirôna nata Kusi sôdaohna zy nâ lâ a vy aw ei ta, Sâbia doh seihpazy nâ lâ amâ vy aw; Na eih châ aw ei ta, Nâ ama cha pazi aw. Bâlia chhaota nâ lâ a vy aw ei ta, Na hmiakô liata amâ bôh aw. ‘Khazohpa cha na hnohta y tlai ta, Khazoh hropa y veih ei, Nâ leipa ta Khazohpa hropa rai y veih ei,’ Tah aw ei ta, Ngiachhiena ama châ haw aw.”

ISAI 45:24

Hetana heta ei thâtih ama reih aw: ‘Abeipa lia deita ta pahniena y ta, Ano lia deita ta thatlôna a y; Chyhsazy ano lâ a vy aw ei ta, A chô liata a ru a chhôpa zydua cha, Maophyuhpa ta ama y aw.

ISAI 55:5

Abeipa na Khazohpa ta cha parônahsa ta, Izarei Mo Pathaihpa ta a cha parônahsapa vâta, Na pahno beih leipa phopi aw aw chi ta, Châ pahno beih leipa phopi ta nâ lâ â vaw râ aw.

ISAI 60:14

Pasa châ pataosatuhpa sawchapawzy cha, A bôhpa ta nâ lâ a vy aw ei ta; Châ mohnaotuhpa zydua chhao, Na phei thaby liata amâ bôh aw. “Abeipa Khihpi” cha tah aw ei ta, “Izarei Mo Pathaihpa Zaio Khihpi” ama cha tah aw.

ISAI 60:3

Phopizy na khaihna lâ a vy aw ei ta, Beizy na nohchhi khaihpa lâ amâ vy aw.

ISAI 66:18

“Ama hmotaopazy nata ama pachâpazy ei pahno. Râh to nata reih to ei chhipakhy nawpa daihti a vaw tlô hai. A vy aw ei ta, ei rônahna ama hmô aw.

MIKÂ 5:5

Ano cha ama thlalôhna a châ aw. Asuria ta eima râh lâ a vypa ta, Eima abei ozy a tlypâ khiahta cha, Ano a dyuh awpa ta, Mietaku vaituhpa pasari pathyu aw pi ta, Beimachâ pacharie eima pathyu aw;

ZEPHANIA 3:19

Pachâ teh, cha daihti liata cha, Châ tlybaituhpa zydua ei hrie aw ei; Pheisypazy pachha aw ei na ta, Paipatlapazy ei chhi pakhy heih aw ei. Chatanachata nozapa ta ama paysana râh zydua liata, Palyupalihna nata moh phana ei patosa aw ei.

MALUHREINA 14:22

Izi râh nata râhchawhpa liata ei rônahna nata ei hmonoâhpa taopazy hmô ha ei ta, chatana chôta ei bie a zyh leipa chyhsa zydua heta, ei hrawh tlai na pasia ei ta, ei ao nathlie veih ei.

LUKA 8:44

Cha chanô cha Zisu hnôh lâta pazi ta, a poh pai hria ta, a thi lopa cha thlai a hâh ha ta.

HMOTAOPAZY 19:12

Pawla pôhpa a hria hapa rumâ nata hruna poh hawhpazy taihta tlâhleipazy lâ cheih ei ta, ama hriiahzy ta âmo cha puasai ta, thlahpa chhiepazy chhao ama chhôh tawhta pua lymâ ei ta.

1 KAWRINI 14:25

A palôh liata nyupazy palâsapa châ aw ta, â khu lâta pao aw ta, Khazohpa a chhypa ta, Khazohpa cha nama hry liata a y hmeiseih tlai tahpa ta a phuah aw.

ZAWSUA 8:35

Mawsi biepiepa zydua kha Zawsua ta Izarei zawpi zydua hnohta a rei leipa y vei. Chanôzy nata hawtizy nata ama hry liata chihropa a ypazy hnohta Zawsua ta a rei leipa ryhpa bie miakha hmah y vei.