ZEKARIA 10:6 - Mara Bible RV (BSI)

⁶ “Zudâh pathlazy cha, Thapatlô aw ei na ta; Zawsi pathlazy chhao, Ei pachha aw ei. Ei ngia eina chhie kawpa vâ ei ta, Ei chhi pakhua heih aw ei; Ei thy beih leipa hawhta y heih aw ei ta, Abeipa ama Khazohpa ei châpa vâta, Ei chyh-ei aw ei.

ZEKARIA 10:6 ပူးပေါင်းရင်းမြစ်များ

HLAZY 89:21

Ei ku ta ano cha padua aw ta, Ei bâh ta tha a patlô aw.

ISAI 11:12

Râhzy lâta ngiana poh chaluahpa ta, Ama râh tawhta papuapa Izarei sawzy pahmaoh aw ta, Zudâh paipatlapazy cha, Alei ki palih tawhta a pakhy aw.

ISAI 14:1

Abeipa ta Zakaw ngiachhiepa ta, Izarei a tlyh heih aw ta, ama râh tlai liata a paysa heih aw ei. Chihropazy ta âmo cha a bai aw ei ta, Zakaw pathlazy cha amâ pazao aw.

ISAI 41:10

Chavâta chi khah y, Na hnohta ei y mâh tâh; Ngiarohpa ta y hra khah y, Na Khazohpa ei châ hih. Tha cha patlôpa ta cha bao aw na ta, Ei siana ku chachâh lâta khâchâ ei cha patu aw.

ISAI 54:4

“Chi khah y, Maophyuh khao aw va chi; Na no za khah sy, Hmiachhiepa ta y khao aw va chi. Na thyutlia nota na maophyuhna kha my aw chi ta, Na nôhmeina moh chhiena a thei khao aw va chi.

ISAI 54:8

Bohpi leipa hiehâhna chyhta vâta, Ei hmia cha vaw nyu sai ha na ta, Châhrasala chhâzaw nôphana ta Ei cha ngiachhie heih aw,” Abeipa, châ Chatlaituhpa ta a tah.

ZEREMIAH 23:6

“Zudâh cha ano ryureina daihtizy liata pachhapa châ aw ta, Izarei chhao â bohpa ta a y aw. A moh cha Zehôvâh Sede a châ aw.

ZEREMIAH 3:18

Cha nohzy liata, Zudâh pathlazy cha Izarei pathlazy a pahlyh aw ei ta, maw lâ râh tawhta ama pathlatuhpazy hnohta ryuto châta ei piepa râh lâ hmaohkha ta amâ zu aw.

ZEREMIAH 30:18

“Abeipa ta hetana heta a tah: Moh tua, Zakaw poh ozy cha, Vânoh patosa heih aw na ta, A pahrâna suzy ei ngiachhie aw; Khihpi cha a raona â pachona su liata padua pathipa châ aw ta, Abei o chhao a y tyhna su liata â duah heih aw.

ZEREMIAH 30:20

Ama sawzy hlâno daihtizy hawhna khata y heih aw ei ta, Ama pakhypi ei hmiakô liata paduapa châ heih aw ta, Âmo a tlybaituhpa zydua ei hrie aw ei.

ZEREMIAH 31:1

“Cha daihti liata, kei he Izarei pho zydua châta Khazohpa cha aw na ta, âmo cha ei phopi ama châ aw,” Abeipa ta a tah.

ZEREMIAH 31:20

Epharai cha ei sawchapaw kho ngaitapa châ ta, Ei saw mopakiapa châ vei ma? A pha leina kyh ei rei tyhpa chhao ta, Khâ ei thei ngâ thlâh ha tyh. Chavâta ei palôh ta ano cha vâ kaw tyh ta, A chô liata zawh ei ngiah tlai aw,” Abeipa ta a tah.

ZEREMIAH 31:31

“Pachâ teh u, Izarei pathlazy nata Zudâh pathlazy hnohta biehrai thiehpa ei tao nawpa nohzy a vaw tlô hai,” Abeipa ta a tah.

EZEKIA 36:11

Nama chô liata chyhsapa nata sa zy papôhsa aw ei na ta, pôh aw ei ta, thei ama pathei aw. Hlâno hawhna khata nama chô liata chyhsa pahrâsa heih aw ei na ta, khahlâ ta nama duahmo hlâta pha via syulyupa ta ei cha tao aw ei. Chatanachata kei he Abeipa ei châ tahpa nama pahno aw.

EZEKIA 36:37

“Abeipa Zehôvâh ta hetana heta a tah: Izarei pathlazy ta ama phopi maluh sahroh zaw hawhta papôhsa awpa ta ama hia awpa ei pasaih aw.

EZEKIA 37:16

“Chyhsa sawchapawpa y, masô miakha la la, a chô liata, ‘Zudâh nata a sahlao Izarei pathlazy châta,’ tahpa ta roh teh. Masô hropa la heih la, a chô liata, ‘Epharai masô Zawsi nata a sahlao Izarei pathla zydua châta,’ tahpa ta roh teh.

EZEKIA 39:25

“Chavâta Abeipa Zehôvâh ta hetana heta a tah: Tahmâ cha Zakaw vânoh patosa heihpa ta, Izarei pathla zydua zawh a ngiah heih aw ei na ta, ei moh pathaihpa cha liahsa ei pabohsa ha bâ aw.

HÔSIA 1:11

Zudâh chyhsa nata Izarei chyhsazy a hmaohpakhy aw ei ta, chhituhpa pakha rao aw ei ta, râh tawhta ama khy aw. Zezari noh rônahzie awpa rimâ cha!”

HÔSIA 1:7

Zudâh chhôhkha hnohta deikua cha ei kyhpachâna ei palâsa aw. Pahniena pie aw ei na ta, libaw ta tlyma, zaozi ta tlyma, adyuhna ta tlyma, arâ nata a kiahtuhpazy vâta tlyma pahniena châ leipa aw ta, Abeipa ama Khazohpa vâta pahniena a châ aw,” tah ta.

HÔSIA 14:9

“Chyhsa sopa ta He hmozy he a novâh sala, Chyhsa novâhpa ta Pahno thai mawh sy! Abeipa lâpizy cha a do ta, Mosiapazy ta amâ chhih thei; Moleipazy deikua cha, Amâ chapia aw.”

HÔSIA 2:23

Cha chanô cha, Ei châta alei liata loh aw na ta, Lôruhâmâ cha ‘Ei kyhpachâpa’ ei tah aw; Lôami chhao ‘Ei phopi na châ’ tah aw na ta, Ano ta, ‘Ei Khazohpa na châ’ eina tah aw.”

ÔBADIA 1:18

Zakaw pathlazy cha, Mei châ aw ei ta; Zawsi pathlazy chhao, Meipaleih ama châ aw; Esaw pathlazy cha, Sawphao châ aw ei ta; Mei ta rao aw ei ta, Ama pakâ khai aw; Esaw pathlazy cha, Ahrohpa rai y aw veih ei,” Abeipa ta a tah.

MIKÂ 4:13

Hy Zaio sawchanô y, Thyu la, sâh tly teh; Thua ta na ki tao aw na ta, Dawh ta na chakiezy ei tao aw; Chatanachata phopi hluhpizy cha, Na pakeichheih aw ei. Ama sâhzy Abeipa lâ hlâ aw chi ta, Ama sôhzy khizaw zydua Abeipa lâ na hlâ aw.”

MIKÂ 4:6

Abeipa ta hetana heta a tah: “Cha noh liata, Pheisypazy ei pakhy aw ei; Ama yna su tawhta papuapazy pahmaoh aw ei na ta, Pasataopazy ei pahmaohpakhy aw ei.

MIKÂ 5:3

Chavâta sawzeihpa ta saw a sa hlâlei cha, Abeipa ta âmo cha a heihsai chy aw ta, Cha khai tawhta a unawh laibâhpazy cha, Izarei sawzy lâ ama kua heih aw.

MIKÂ 5:8

Zakaw laibâhpazy cha, Râhsazy hry liata chakeibarôhneipa hawhta Râhzy hry liata y aw ei ta, Mietaku zaw hry liata chakeibarôhneipa lochopa hawhta Phopizy hry liata ama y aw. A chapia ti ei ta, Âmo cha alei liata a tlypabai aw ei; Âmo cha hriechheih khai aw ta, A pachha thei awpa y veih ei.

MIKÂ 7:16

Phopizy ta hmô aw ei ta, Thatlô amâ tah kawna zydua ama zakhei aw; Ama pakahzy a chahu aw ei ta, Ama nahzy a pâ aw.

ZEKARIA 1:16

Chavâta Abeipa ta hetana heta a tah: Zawngiahpa ta Zerusale lâ kua heih aw na ta, cha liata ei o sapa châ aw ta, Zerusale chô liata thliena ri parai heihpa a châ aw,’ Pheisaihzy Abeipa ta a tah.

ZEKARIA 10:12

Zudâh pathlazy cha, Abeipa liata thatlôpa ta tao aw ei na ta, Ano moh ta hmo ama tao aw,” Abeipa ta a tah.

ZEKARIA 13:9

A su thôhna cha mei ta ei pasia aw ei; Tâkâ pathaisapa hawhta pathaisa aw ei na ta, Ngôh pasiapa hawhta ei pasia aw ei. Ei moh pado aw ei ta, Ei chhy aw ei. Kei ta, ‘Ei phopi ama châ,’ tah aw na ta, Âmo ta, ‘Abeipa cha eima Khazohpa a châ,’ ama tah aw,” Abeipa ta a tah.

ZEKARIA 8:11

Tahmâ deikua cha, he phopi laibâhpazy chô liana heta, kha hlâta ei vaw taopa hawhna khata tao khao aw va na,” Pheisaihzy Abeipa ta a tah.

ZEKARIA 9:16

Cha noh liata, A phopi mietaku zaw hawhta, Abeipa ama Khazohpa ta Âmo cha a pachha aw ei; Chatanachata beilakho liata lôsôhpazy hawhta, A râh liata ama khaih aw.