ZAWSUA 6:17 - Mara Bible RV (BSI)

¹⁷ Khihpi he a chhôh liata a ypa zydua chhaota Abeipa lâ hlâ ta, parao khai awpa a châ. Âzuahnô Rahâbi deikua cha, eima tuapa lyuhchâpazy a vaw nyupa vâta, ano nata a o liata a ypa zydua pahlôh awpa a châ.

ZAWSUA 6:17 ပူးပေါင်းရင်းမြစ်များ

ÂTHAONA 12:3

Byhnâ châ awpatuhpa maih byhnâ awpa aw na ta, Chhie châ sapatuhpa maih chhie ei sapa aw; Alei chô liata chi to pho to, Nâma vâta byhnâ topa ta ama y aw,” tah ta.

EZRÂ 10:8

Ahy rai chhituhpazy nata machâzy biepiepa hawhta, noh thôh chhôh ta a vaw tlô leipa cha, a hmohneipa zydua patu khaipa châ aw ta, ano chhao seichâna tawhta a vaw kuapazy py tawhta papuapa a châ aw tahpa bie papuapa a châ.

ISAI 34:6

Abeipa ta Bôzrâ khihpi liata atheihna hlâ awpa hnei ta, Edômâ râh liata thietuna rarôh ypa tao awpa a hneipa vâta, Abeipa zaozi cha thisaih ta bie ta, Thaw ta a khu; Mietakutawzy nata miezy thisaih ta bie ta, Mietaku tôhpazy lôpo thaw ta a khu.

ZEREMIAH 46:10

“Cha noh cha Pheisaihzy Abeipa Zehôvâh noh châ ta, Phuh a lana noh a châ; A khakhaipazy chô liata phuh â lana noh a châ. Pheisaihzy Abeipa Zehôvâh ta Maw lâ râh Ufrâti chavah kiah liata atheihna hlâ ha ta, Chavâta zaozi ta Izi mo cha, Lôhrâtlôna taihta palâ aw ta, Dâhphi paina taihta ama thisaih a doh aw.

EZEKIA 39:17

“Hy chyhsa sawchapawpa y, Abeipa Zehôvâh ta hetana heta a tah: Pavaw chi to nata râhsa chi to hnohta bie reih la, ‘A pahmaoh u la, a vy teh u. Nâmo châta atheihna kyhchhi ei chhuanohpa lâ a vy awpa ta, su to tawhta a pahmaoh u la, Izarei tlâhpizy liata atheihna kyhchhi rônahpa ei taopa lâ a vypa ta, sa nie u la, thisaih doh teh u.

THEIHTHAINA 27:21

Lyu cha Zubili kô liata papuapa a châ tita, hlâ hapa lyu hawhta Abeipa châta pathaihpa châ aw ta, theihthaipa eih a châ aw.

MIKÂ 4:13

Hy Zaio sawchanô y, Thyu la, sâh tly teh; Thua ta na ki tao aw na ta, Dawh ta na chakiezy ei tao aw; Chatanachata phopi hluhpizy cha, Na pakeichheih aw ei. Ama sâhzy Abeipa lâ hlâ aw chi ta, Ama sôhzy khizaw zydua Abeipa lâ na hlâ aw.”

MATHAI 25:40

Abeipa ta âmo cha a chhy aw ta, ama hnohta, ‘Hmeiseihta ta ei cha chho ei, he ei unawhpa chyh chaipazy hry liata pakha chô liata nama taopa cha, ei chô liata a taopa nama châ,’ a tah aw ei.

1 KAWRINI 16:22

Ahy rai Abeipa kyh a pachâ leipa cha chhiesapa ta y mawh sy. Mârânâthâ! Eima Beipa, a vy mah y!

1 KAWRINI 2:7

Eima rônah nawpa ta Khazohpa ta khizaw y hlâta a vaw rao chhielie hapa, Khazohpa sona bieru nata bienyupa tlao eima pachu tyh.

KALATIA 3:10

Ryhpa hmotaopazy liata a pahniehpa zydua cha, chhiesana ry liata ama y, “Ryhpa châbu liata bie ropa zydua a tao leipa nata a zyh leipa maih cha chhiesapa ta y mawh sy,” tahpa ropa châ tlôh ta.

KALATIA 3:12

Ryhpa cha ngiapâna tawhta a puapa châ vei, “Ryhpa a zyhpa cha, ryhpa vâna chata a hroh aw,” tahpa tlao a châ.

RYHPACHANEINA 20:17

Abeipa nama Khazohpa ta bie a cha piepa hawh ei ta, Hiti mo, Amawri mo, Kâna mo, Perizi mo, Hivi mo nata Zebu mozy cha tlokhuh nama pahleipadia khai awpa a châ.

HEBRAI 11:31

Ngiapâna ta âzuahnô Rahâbi cha, mohparutuhpazy a phapa ta â lypa vâta, ngiapâleipazy hry liata leidia vei.

HEBRAI 6:10

Nama raihria tyhpa nata a moh vâta kyhpachâna palâsapa ta mopathaihpazy nama chakao tyhpa, tahmâ taihta nama taopa he, mopakhô awpa ta Khazohpa cha adoleipa châ vei.

ZÂMIE 2:25

Cha hawhna chata âzuahnô Rahâbi chhao kha, lyuhchâpazy a vaw ly ta, lâpi hropa lâta a pasiesapa liana khata, hmotaopa vâta thai pachâsapa a châ!

ZAWSUA 2:1

Nunâ sawchapawpa Zawsua ta mohparutuhpa pano Siti tawhta arulâta tuah ta, ama hnohta, “Sie u la, râh kaw moh u la, a eih pachaipa ta Zerikô khihpi kaw moh muh vy,” tah ta. Mohparutuhpazy cha sie ei ta, Rahâbi ama tahpa âzuahnô o liata a ngia ei ta, cha liata tlô ei ta.

ZAWSUA 2:22

Mohparutuhpazy cha pua ei ta, tlâhpi lâ cha sie ei ta, a vaw chadaipazy ama kua hlâlei, cha liata noh thôh y ei ta. Chadaituhpazy ta lâpi tlykha tlua ei ta, châhrasala hmô leipa ei ta.

ZAWSUA 7:1

Châhrasala Izarei sawzy ta pahleipadia awpa hmozy kyh liata hmo parao ei ta. Zudâh chi Zerâ sawchapawpa Zabidi, Zabidi sawchapawpa Kâmi, Kâmi sawchapawpa Âkhâ ta pahleipadia awpa hmo vaw la ha ta. Chavâta Abeipa cha Izarei sawzy chô liata a pathi ia ta.

1 SAMUELA 15:3

Chavâta tahmâ sie la, Amale a kei dyuh la, a hneipa zydua kei pahleipadia khai teh. Khâpa hmah na pahlôh awpa châ vei. Chanô nata chapaw, hawti nata hawsaih, viahchao nata mietaku, râraoseihpa nata alâ zy na thie khai awpa a châ,’” tah ta.

1 SAMUELA 15:6

Sawla ta Keni mo hnohta, “Sie u la, Amale mo kha puasai teh u. Chataleipatala ei cha thie pâ pathlei aw ei na. Nâmo la Izarei sawzy Izi râh tawhta ama kaw pua nota, ama zydua chô liata phana a palâsatuhpa châ tlôh ei chi ta,” tah ta. Chatanachata Keni mo cha Amale mo hry tawhta pua ei ta.