ZAWSUA 18:16 - Mara Bible RV (BSI)

¹⁶ Cha tawhna chata râhri cha Hinô Sawchapawpa Saikao dady ta a ypa tlâh thaby lâta chô ta. Cha tlâh cha Rephai Saikao maw lâta a ypa a châ. Râhri cha Zebu mo khihpi chho baikhaihpa chapiapa ta Hinô Saikao lâta chô ta, Erôke liata a pua.

ZAWSUA 18:16 ပူးပေါင်းရင်းမြစ်များ

2 SAMUELA 17:17

Zawnathâ nata Ahimazi cha Erôke liata y ei ta. Khihpi amâ ngiapa ahy hmahta ama hmô awpa a pha leipa vâta, chakaotuhnô pakha ta âmo cha bie kei chho tyh ta, âmo ta Bei Dâvi ama chho pachhuah tyh.

2 SAMUELA 5:18

Philistinâ mo cha a vy ei ta, Rephai saikao liata a paziah ei ta.

1 ABEIZY 1:9

Adôniza cha mietakuzy, viahchao tôhpazy nata sahroh dawpa pathawhpazy ta Erôke chheipâh ta a ypa Zôhele Lô liata atheihna hlâ ta. Abei sawchapawpa a unawhpa zydua nata Zudâh râh liata beimachâ zydua hrua khai ta.

2 ABEIZY 23:10

Chatawhcha ahy hmahta ama sawchapaw tlyma, ama sawchanô tlyma, Môleka atheihna châta ama hlâ khao lei nawpa ta, Hinô Sawchapawpa Saikao ama tahpa liata Tôphe chhao a parao haw.

1 THÂTIHZYRONA 14:9

Philistinâ mo cha a vy ei ta, Rephai Saikao vaw chho ei ta.

2 THÂTIHZYRONA 28:3

Hinô Sawchapawpa Saikao liata atheihnazy hlâ ta, Abeipa ta Izarei phopi hmiakô liata a papua hapa phopizy ta pasichhihpa ama taopazy tao hra ta, a sawchapawzy mei ta raopa ta atheihna ta hlâ ta.

2 THÂTIHZYRONA 33:6

A sawchapawzy cha raopa hlâna atheihna ta Hinô Sawchapawpa Saikao liata hlâ ta, kulâmopa, pachaopa nata molietaopa zy hmâh ta, peihthaipa nata athihpa bie a chho thaipazy â saohiah tyh. Cha hawhna chata Abeipa mohmô liata hmo molei ngaitapa taopa ta, Abeipa hie pahâh ha ta.

ISAI 30:33

Hlâno tawhta mei raona su a chhuanoh hapa a châ. Abei châta chhao a chhuahdy hapa châ ta, tho ti nawpa â thu ngaitapa nata a kawh ngaitapa ta taopa châ ta, mei nata tho hluhpi pahmaohpa a châ. Cha cha kaih vahtiepa hawhta a lohpa Abeipa hu ta a pakâsa.

ZEREMIAH 19:11

ama hnohta hetana heta na tah aw, ‘Pheisaihzy Abeipa ta hetana heta a tah: Chyhsa ta beihvituhpa beihlei titheih pakei ta, taopathi thei awpa a châ khao leipa hawhta, he phopi nata he khihpi he pakei aw na ta, taopathi theipa châ khao aw vei. Athipa rizy cha su hro liata pabu nawpa su a y lei awpa vâta, Tôphe liata tlâ ama pabu khai aw.

ZEREMIAH 19:2

Hârâsi Chhikao angiana kiah liata Hinô Sawchapawpa Saikao lâ sie la, cha liata na hnohta bie ei cha chhopa he kei phuah mah y.

ZEREMIAH 19:6

Chavâta moh teh u, nohzy a vaw tlo hai, Abeipa ta a tah. Cha nohzy liata cha, he su he Tôphe tahpa châ khao leipa aw ta, Hinô Sawchapawpa Saikao tahpa châ khao hra aw vei. Thiena Saikao tahpa tlao a châ ha aw.

ZEREMIAH 32:35

Hinô Sawchapawpa Saikao liatapa Bâlâ achhyna su sâhpazy padua ei ta, ama sawchapawzy nata ama sawchanôzy Môleka lâ ama hlâ tyh. Zudâh pamoleisa nawpa ta, he hmo pasichhihpa tao awpa heta, biepie leipa ei na ta, ei palôh liata chhao a lâ beih vei.

ZAWSUA 15:63

Zerusale liata a pahrâpa Zebu mo deikua cha, Zudâh pathlazy ta papua thei veih ei. Chavâta Zebu mo cha tanoh taihta Zerusale liata Zudâh pathlazy nata hmaohkha ta ama pahrâ.

ZAWSUA 18:28

Zelâ, Helepha, Zebu khihpizy chhao amâ hlao. Zebu cha Zerusale a châ. Kiria­ziari nata Kibi khihpizy chhao a hlao ei ta, khihpi miahrawh hleipalih y ta, khichapeihzy ama hnei. Chazy cha Benzami pathlazy ta a pho pho ta ama to awpa ryuto râh a châ.

RYUREITUHPAZY 1:21

Benzami pathlazy deikua, Zerusale khih liata a pahrâpa Zebu mo papua veih ei. Chavâta Zebu mo cha tanoh taihta Zerusale liata Benzami pathlazy nata hmaohkha ta ama pahrâ lymâ.

RYUREITUHPAZY 1:8

Zudâh pathlazy ta Zerusale a dyuh ei ta, la ei ta, zaozi ta chhawhsao ei ta, khihpi cha mei ta rao ei ta.

RYUREITUHPAZY 19:10

Châhrasala Livai chyhsa cha a rie khoh khao leipa ta, thyu ta, sie ta, Zebu khih dady kei tlô ta. Cha cha Zerusale khih a châ. Alâ pô no, ky padia chiehpa a chhi ta, a nôtho chhao cha a hnohta sie hra ta.