ZAWHÂNA 5:39 - Mara Bible RV (BSI)

³⁹ Biehrai bie nama tlua tyh, a chhôh liata chhâzaw hrona a y tahpa nama pangiasapa vâta. Cha Biehrai tlai cha nâ pahnokheituhpa a châ.

ZAWHÂNA 5:39 ပူးပေါင်းရင်းမြစ်များ

HLAZY 1:2

 lyna cha Abeipa ryhpa liata châ ta, A ryhpa bie cha chhô nah zâ ta a pachâ tyh.

HLAZY 119:11

Na bie ei palôh liata a vao na ta, Chavâta na chô liata molei khao aw va na.

HLAZY 133:3

Adyhna cha Hâmaw diati lyu ta, Zaio tlâhzy liata a tlapa diati tlai a lyu. Adyhna liana cha Abeipa ta byhnâ tona bie pie ta, Tlyzaw hrona bie a pie.

HLAZY 16:11

Hrona lâpi na pahmôsa chi ta, Na yna liata lyna kipa y ta, Na ku chachâh lâta tlyzaw thaphana a y.

HLAZY 21:4

Hrona cha hiah ta, pie chi ta, Chhâzaw nata tlyzaw ta noh pasina na pie.

HLAZY 36:9

Nâma liata hrona hnawh y ta, Na khaihna liata khaihna eima hmô.

BIESOZY 6:23

Biepiepa cha meiôh châ ta, Pachuna cha khaihna châ ta, Chhoreina rana cha hrona lâpi a châ.

ISAI 34:16

Abeipa châbu liata tlua u la, reih teh u: Chazy hry liata pô kha hmahta a ki leipa y leipa aw ta, Kaolâh a hnei leipa pô kha hmah y aw vei. Abeipa pakah ta biepie ha ta, A Thlahpa ta a pahmaoh ha ei.

ISAI 8:20

Ryhpa nata bieraopa hawhta bie a reih leipazy cha, âmo châta khih a deih mâh leipazy ama châ.

ZEREMIAH 8:9

Chyhsa sopazy maophyuh aw ei ta, Chihuhpa ta ypa ta patupa ama châ aw. Pachâ teh u, Abeipa bie ama thy ha tawhta cha, Âmo liata khâpa sona cha ma a y khao aw?

DÂNIAH 12:2

Chatawhcha alei dohlei liata â môpa chyhsa hluhpi a vaw hra aw ei ta, thokha tlyzaw hrona lâ sie aw ei ta, thokha nozana nata tlyzaw thaileichâna lâ ama sie aw.

MATHAI 22:29

Zisu ta âmo cha a chhy ta, “Biehrai nata Khazohpa hmotaotheina nama pahno leipa vâta nama pachâpasipa a châ.

MÂKA 10:3

Zisu ta ama hnohta, “Mawsi ta kheihta ma bie a cha pie ei?” tah ta.

MÂKA 12:10

Biehrai liata, “‘O satuhpazy alô kho leipa kha, A ki lô a vaw châ haw;

LUKA 16:29

Abarahâ ta, ‘Mawsi nata hrohsopazy ama hnei mâh tâh. Âmo bie nathlie mawh ei sy,’ tah ta.

LUKA 16:31

Abarahâ ta a hnohta, ‘Mawsi nata hrohsopazy bie ama nathlie vei khiahta cha, athihpa hry tawhta a thyupa y hra sala, a bie zo hlei aw veih ei,’” tah ta.

LUKA 24:25

Zisu ta ama hnohta, “Hy ahrupa saih u! Hrohsopazy bie reipa zydua a ngiapâ nawpa kyh liata nainôsôpazy saih u!

LUKA 24:27

Chatanachata Mawsi nata hrohsopa zydua tawhta pathaopa ta, Biehrai liata ano thâtih ropa zydua cha âmo chhopasia lymâ ta.

LUKA 24:44

Chatawhcha ama hnohta, “Hezy he ei rei tyhpa, Mawsi Ryhpa liata nata Hrohsopazy Châbu liata nata Hlazy liata ei thâtih ropa zydua a vaw tlô khai awpazie nama hnohta ei y nota ei cha chho tyhpa ei kha a châ,” tah ta.

ZAWHÂNA 1:45

Phili ta Nâthaniah a hmô nahta, a hnohta, “Ryhpa châbu liata Mawsi ta a thâtih a ropa nata hrohsopazy ta ama ropa kha eima hmô haw. Ano cha Zawsi sawchapawpa Nâzari Zisu a châ,” tah ta.

ZAWHÂNA 5:32

Ei thâtih nâ pahnokheituhpa pakha y ta, ei thâtih a pahnopa cha â do tahpa ei pahno.

ZAWHÂNA 5:36

Châhrasala pahnokheina ei hneipa he Zawhâna pahnokheina hlâta rônah viapa a châ.

ZAWHÂNA 5:40

Chatanachôta hrona hnei awpa ta kei lâ a vy khoh veih ei chi.

ZAWHÂNA 5:46

Mawsi nama zo khiahta cha, kei chhao eina zo awpa ei chi a châ. Mawsi cha keima thâtih a rohpa a châpa kha.

ZAWHÂNA 7:52

Âmo ta a chhy ei ta, “Nâ chhao cha Kâlili chyhsa châ hra khiah chi? Patuapalua la, pachâ tua, Kâlili tawhta hrohsopa pua beih veih ei tahpa pahno châh chi,” tah ei ta.

HMOTAOPAZY 13:27

Zerusale liata a ypazy nata ama ryureituhpazy ta ano cha pahno leipa ei ta, Pahânoh maihta rei tyhpa hrohsopazy bie chhao ama pahno leipa vâta, ano cha thailei pachâsapa ta, hrohsopazy bie ama patlôsapa a châ.

HMOTAOPAZY 17:11

Beria mo cha Thysalawnika mo hlâta pha via ei ta, pahâ ngaitapa ta bie cha dao ei ta, ama reipa cha â do nata do lei pasia nawpa ta noh chareih ta Biehrai a chu pasia tyhpa ama châ.

HMOTAOPAZY 26:27

Bei Akaripâ, hrohsopazy na zo ma? Na zo tahpa ei pahno,” tah ta.

RAWMA 1:2

Cha thâtihpha cha, Khazohpa ta a hrohsopazy hmâpa ta hlâno tawhta Biehrai pathaihpa liata bie â vaw taih hapa a châ.

RAWMA 3:2

Kyh to liata a phahnai. A phahnaina chaipa cha, Khazohpa biezy pavaosapa ama châpa he a châ.

RYHPACHANEINA 18:15

“Abeipa nama Khazohpa ta keima hawhpa hrohsopa nama unawhzy hry tawhta cha paduapa aw ei ta, a bie nama nathlie awpa a châ.

RYHPACHANEINA 18:18

Ama unawhzy hry tawhta nâ hawhpa hrohsopa paduapa aw ei na ta, a pakah liata ei biezy soh aw na ta, a hnohta bie ei piepa zydua ama hnohta a rei pachhuah tyh aw.

RYHPACHANEINA 29:29

“Hmo nyupazy cha Abeipa eima Khazohpa eih châ ta, hmo palâhâhpazy deikua keimo nata eima pathlazy eih a châ. Chatanachata he ryhpa bie zydua he eima zyh thei aw.

RYHPACHANEINA 32:47

Cha biezy cha nama châta bie thlâhthlipa châ leipa ta, nama hrona châ ta, cha biezy cha nama zyh khiahta cha, zawdâh chakapa ta hnei awpa ta nama pangaipa râh liata nama hro a pareih aw,” tah ta.

KAOLAOSÂ 3:16

Krista bie cha nâmo liata biepakhôpa ta y mawh sy. Sona to ta a pachupa ta a chhorei raihrie u la, palôh alyna chôta, reithaina hlazy nata thlahpa hlazy Khazohpa lâ sa teh u.

HEBRAI 11:16

Châhrasala tahmâ cha, râh pha viapa a saduthliepa châ ei ta, cha cha vârâh liata a ypa a châ. Chavâta Khazohpa ta ama Khazohpa châ awpa a noza vei, ama châta khihpi taih a chhuahdy ha tlôh ta.

HEBRAI 11:35

Chanôzy ta ama chyhsa athipa thyuheihpazy hmô ei ta. Thokhazy cha taolapa ta y hra ei sala, hro pha viapa lâta ama thyuheih thei nawpa ta, pua awpa khoh hlei veih ei.

ZAWSUA 1:8

Ryhpa Châbu heta na pakah a puasai awpa châ leipa ta, a chhôh liata bieropazy chhô nah zâ ta tlao na pachâ awpa a châ. Chatanachata ryhpa biezy cha pakhâta ta na zyh thei aw. Cha hawhta na tao khiahta cha, na lâpizy patlâ aw ta, na hlao a tloh aw.

BIEPHUAH 19:10

Ano a chhy awpa ta a phei thaby liata kei pao na ta. Châhrasala ano ta ei hnohta, “Khata tao khah y! Kei cha nâ nata na unawhpa, Zisu bie a pyhtuhpazy chakaolâhpa ei châ. Khazohpa tlao a chhy teh. Zisu bie cha hrohsona thlahpa châ tlôh ta,” tah ta.