RYUREITUHPAZY 20:6 - Mara Bible RV (BSI)

⁶ Hmo pasichhihpa nata nozachhihpa Izarei liata ama taopa vâta, ei nôtho ri cha la na ta, a vyuh vyuh ta pachhaih na ta, Izarei ryuto râh zydua lâ ei paphao ei.

RYUREITUHPAZY 20:6 ပူးပေါင်းရင်းမြစ်များ

ÂTHAONA 34:7

Thâtih ama pahnopa nahta, Zakaw sawchapawzy cha râh lâ tawhta vaw tlô ei ta. Sekhe ta Zakaw sawchanô a ziakhei ta, Izarei sahlao chô liata hmo molei ngaitapa, hmo tao chachei lei awpa a taopa vâta, ama palôh pasapa ta, ama hiehâh ngaita ta.

THEIHTHAINA 18:24

“Cha hawhpa hmozy taopa ta, nâmosasyh a papuapalei khah u. Cha hmozy ama taopa vâta, nama hmiakô liata ei papua laihpa phopizy kha amâ papuapalei hapa a châ.

THEIHTHAINA 18:30

Chavâta hmo pasichhihpa phoryhpa, nâmo y hlâta he râh liata a vaw y tuapa phopizy ta ama taopazy kha nama tao hra lei nawpa ta, ei biepiepa he zyh u la, cha hmozy liata a papuapalei khuh vy. Kei he Abeipa nama Khazohpa ei châ,” tah ta.

ZAWSUA 7:15

Ahy rai châ sala, pahleipadia awpa hmo a hnohta hmôpa a châ khiahta cha, Abeipa biehrai parao ta, Izarei liata hmo pha lei ngaitapa a taopa vâta, cha chyhsa cha, a chhôhkha nata a hneipa zydua chhaota mei ta rao awpa a châ,” tah ta.

RYUREITUHPAZY 19:22

Palôh thaphapa ta ama y hai nota, moh teh u, khihpi chyhsa moleipazy ta o cha vaw dôh ei ta, ochhi thata phy ei ta. O hneituhpa pawpipa hnohta, “Na o liata a vaw tlôpa chapaw kha vaw papua teh, eima ykhei aw,” tah ei ta.

RYUREITUHPAZY 19:23

O hneituhpa pawhrâhpa cha âmo lâ kei pua ta, ama hnohta, “Châ bao va, ei unawhzy saih u, ei châ haw ei, cha hawhpa moleina rarôh ypa cha tao cheita khah u. He chyhsa he ei o liata a vaw ngia hapa châ ta, cha hawhpa hmo pasichhihpa cha rie tao khuh vy.

RYUREITUHPAZY 19:29

O a tlô nahta, chaizôh la ta, a nôtho ri cha vyuh hrawh hleino ta pachhaih ta, Izarei chizy pahrâna râh zydua liata paphao ta.

RYUREITUHPAZY 20:10

Pheisaihzy niedo a hlâ awpa ta, Izarei chi zydua hry tawhta chyhsa za kha liata pahrawh, sâh kha liata za kha, thy kha liata sâh kha lymâ ta eima la aw. Chatanachata pheisaihzy ta Benzami chi Kibia khihpi cha siehnao aw ei ta, Izarei liata hmo pasichhih ngaitapa ama taopa cha viari ama vaw thô aw,” tah ei ta.