RYUREITUHPAZY 18:30 - Mara Bible RV (BSI)

³⁰ Dânâ pathlazy ta nothlahpa khaipa cha âmo châta patyu ei ta, Mawsi sawchapawpa Kesao sawchapawpa Zawnathâ nata a sawchapawzy cha, Dânâ pathlazy theihthaipazy châ lymâ ei ta, râh cha sei ta â tâh hlâ zydua cha theihthaipa ama châ lymâ.

RYUREITUHPAZY 18:30 ပူးပေါင်းရင်းမြစ်များ

2 ABEIZY 15:29

Izarei bei Pekâ â bei nota, Asuria bei Tikalâpilesa ta Izaw, Abelamâkâh, Zanô, Kedesâ nata Hâzaw khihpizy, Kilia nata Kâlili râhzy nata Nâthalai râh zydua la ta. Chyhsazy sei ta Asuria râh lâ a chhi ta.

2 ABEIZY 17:18

Chavâta Abeipa cha Izarei chô liata a pathi ia ngaita ta, a mohmô tawhta a papua ha ei. Zudâh chi tah leipa ta cha pahlôhpa y khao veih ei.

2 ABEIZY 17:20

Chavâta Abeipa ta Izarei pathla zydua cha dytha ta, ama rie patheipa ta, hraotuhpazy ku liata hlâpa ta, a mohmô tawhta a thy pathlah ha ei.

2 ABEIZY 17:22

Izarei sawzy ta Zerôbaw moleina taopa zydua tao hra ei ta, chazy cha a heihsai khoh veih ei.

2 ABEIZY 17:23

Chavâta Abeipa ta a hrohsopa zydua hmâpa ta a rei hapa hawhta, Izarei cha a mohmô tawhta a papua haw. Chatanachata Izarei cha ama râh tawhta Asuria lâ a chhipa châ ei ta, tanoh taihta cha su liata ama y.

PUASAINA 18:3

a sawchapaw panozy chhaota a o liata paysa ta. A sawchapaw pakhapa cha, Mawsi ta, “Chyhsa râh liata khichhaipa ta ei y,”tah ta a moh Kesao a bipa kha châ ta,

PUASAINA 2:22

Zipôrâ cha sawchapaw sa ta, Mawsi ta, “Râh hropa liata mapaihpa ta ei y” tah ta, a moh Kesao a bi.

PUASAINA 20:4

“Na châta nothlahpa khazoh na tao awpa châ vei. Chô lâ avâ liatapa a lyupa tlyma, ry lâ alei liatapa a lyupa tlyma, alei ry lâta ti liatapa a lyupa tlyma, kheihawhpa nothlahpa khazoh hmah na châta na tao awpa châ vei.

THEIHTHAINA 26:1

“Khazoh nothlahpa namâ tao awpa châ leipa ta, nothlahpa tao chhyhpa tlyma, lôbô tlyma, nama bô awpa châ hra leipa ta, a naoh awpa ta nama râh liata nothlahpa hawhta taopa alô nama bô awpa châ vei, kei he Abeipa nama Khazohpa châ tlôh na ta.

RYHPACHANEINA 27:15

“Khaipa ta tlyma, leihpa ta tlyma khazoh nothlahpa tao ta, cha hawhta zôthaipa ku ta taopa, Abeipa châta pasichhihpa khazoh nothlahpa arulâta a vaopa cha chhiesapa ta y mawh sy,” tah aw ei ta, zawpi ta, “Amen” ama tah aw.

RYHPACHANEINA 31:16

Abeipa ta Mawsi hnohta, “Pachâ teh, châ pathlatuhpazy hnohta nâ mô nawpa daihti â hnia haw. He phopi he thyu aw ei ta, pahrâ awpa ta ama pangaipa râh liata chihropa khazohzy liata amâ phei aw. Na pathlua aw ei ta, ama hnohta ei hraipa ei biehrai ama parao aw.

RYHPACHANEINA 31:29

Ei thi tawhta thata molei aw ei chi ta, bie ei cha piepa ei lâpi tawhta nama tleisai aw tahpa ei pahno. Noh a vaw tlô awpazy liata, nama ku hmotaopa ta Abeipa hie pahâhpa ta, a mohmô liata hmo pha leipa nama tao awpa vâta, hmo pha leipa ta a cha tla thlu aw ei,” tah ta.

RYUREITUHPAZY 13:1

Izarei sawzy cha Abeipa mohmô ta moleina hmo tao heih ei ta, chavâta Abeipa ta âmo cha Philistinâ mo ku liata kô sypalih paysa ta.

RYUREITUHPAZY 17:3

Mikâ ta tâkâ tlaw 1,100 cha a nô pie pakhua ta, a nô ta, “He tâkâ he nothlahpa khaipa nata nothlahpa leihpa tao nawpa ta, keima ku tawh tlai ta ei sawchapawpa châta Abeipa lâ ei hlâ. Chavâta tahmâ ei cha pie pakhua ha aw,” tah ta.

RYUREITUHPAZY 17:5

Mikâ ta khazoh achhyna su hnei ta, ephaw nothlahpa nata chhôhkha khazoh nothlahpazy tao ta, a sawchapaw pakha cha ano châta theihthaipa châ awpa ta chahnao ta.