RYHPACHANEINA 18:20 - Mara Bible RV (BSI)

²⁰ Bie rei awpa ei pie leipa tlai ta, ei moh ta bie a reihpa nata khazoh hropazy moh ta bie a reihpa hrohsopa cha a thi awpa a châ,’ tah ta.

RYHPACHANEINA 18:20 ပူးပေါင်းရင်းမြစ်များ

ZEREMIAH 27:15

Ei tuapa châ leipa ei ta, ei moh ta haipa ta hrohsona bie ama phuah. A theilâpa cha, nâmo nata nama hnohta hrohsona bie a phuahpazy râh tawhta cha to papua aw ei na ta, nama leidia aw,” Abeipa ta a tah.

MATHAI 7:15

“Hrohso pakheipazy tawhta a vaih muh vy. Chazy cha mietaku vo a bupa ta nâmo lâ a vy ei ta, ama chhôh lâ deikua cha changie chahraochatôhpazy ama châ.

ZEKARIA 13:3

Cha khai tawhta chhochhieliena bie a reihpa ama y thlah ha chy khiahta cha, a nô nata a paw, ano a satuhpazy cheingei ta a hnohta, ‘Hroh khao aw va chi, Abeipa moh ta haipa bie na reipa vâta,’ tah aw ei ta, chhochhieliena bie a rei hai no tlai ta ano a satuhpa a nô nata a paw cheingei ta amâ chôsao aw.

EZEKIA 13:6

Aluahna doleipa hmô ei ta, haipa ta ama pachaopadâh tyh. Abeipa ta a tuah leipa ei tlai ta, ‘Abeipa ta a phuah,’ tah ei ta, ama bie cha Abeipa ta a vaw patlôsa awpa ama hnabeiseih.

ZEREMIAH 23:31

“Âmo paleih hmâpa ta, ‘Abeipa ta a phuah,’ tahpa ta a phuah tyhpa hrohsopazy ei dyuh ei,” Abeipa ta a tah.

ZEREMIAH 2:8

Theihthaipazy ta, ‘Abeipa khataih liata a y?’ Tah leipa ei ta; Ryhpa a hmâhtuhpazy chhao ta, Na pahno veih ei. Ryureituhpazy ta nâ dyuh ei ta, Hrohsopazy ta Bâlâ moh ta hrohsona bie phuahpa ta, Hmo phahnai leipazy amâ chadai.

1 ABEIZY 18:27

Nohchhô locho a vaw châ na ta Elaizâh ta âmo cha pasipasawh ta, ama hnohta, “A paro kawpa ta awh teh u cha, khazoh mah a châ tâh. A rohpady ngâ kawpa chhao châ aw ta, lyupâh a pua ngâpa chhao châ thei ta, khitlyna lâ a sie hapa chhao châ thei ta, a mô ha ta pahra byuhpa chhao a châ ngyu aw,” tah ta.

2 PITY 2:12

Âmo deikua cha, pachâna a hmâh thai leipa râhsa, patuapaluana a hnei leipa hmohrohneipazy hawhta châ ei ta, patu awpa nata pahleipadia awpa ta a pihpazy ama châ. Ama pahno leipa kyhzy reipachhie ei ta, râhsazy hawhta âmo chhao pahleipadiapa ama châ hra aw.

1 ABEIZY 18:40

Elaizâh ta ama hnohta, “Bâlâ hrohsopazy kha patu teh u. Pakha hmah papuasa khah u,” tah ta. Bâlâ hrohsopazy cha patu ei ta, Elaizâh ta âmo cha Kisaw chavah lâ a chhi ta, cha liata a thie khai ha ei.

BIEPHUAH 19:20

Sahrâhpa cha patupa châ ta. Sahrâhpa ngiana a hneipa nata sahrâhpa nothlahpa a chhytuhpazy dôveina hmonoâhpa a mohmô liata a tao tyhpa hrohso pakheipa chhao, a hnohta patu pâpa châ ta, kaih ta a kâ ngâpa mei tipo liata ama pano ta ahrohpa ta thypa ama châ.

1 ABEIZY 18:19

Chavâta tahmâ Izarei saw zydua nata Bâlâ hrohsopa 450 nata Aseri hrohsopa 400, Zezebel tlâhkhai liata pati a dôh tyhpazy paawsa la, Kâmel tlâh liata keima lâta a vaw hmaoh mawh ei sy,” tah ta.

RYHPACHANEINA 17:12

Abeipa nama Khazohpa chakaotuhpa theihthaipa nata ryureituhpa bie nathlie leipa ta, a papeisa leipa chyhsa cha thie awpa a châ. Cha hawhna chata, moleina cha Izarei tawhta nama pahleipadia aw.

RYHPACHANEINA 18:21

“Nama palôh liata, ‘Abeipa ta a rei leipa bie cha kheihta ma eima pahno thei aw?’ nama tah thei.

RYHPACHANEINA 18:22

Hrohsopa ta Abeipa moh ta bie reih sala, a bie reipa cha vaw tlô leipa sala, â do leipa khiahta cha, cha cha Abeipa ta a rei leipa bie a châ. Hrohsopa ta a palai ngaitapa ta ano phichhyhpa bie a reipa châ ta, ano cha nama chi awpa châ vei.

ZEREMIAH 23:30

“Chavâta pachâ teh u, ei bie â parupa raihrie tyhpa hrohsopazy ei dyuh ei,” Abeipa ta a tah.

ZEREMIAH 26:11

Theihthaipazy nata hrohsopazy ta beimachâzy nata zawpi zydua hnohta, “Nama nah cheingei ta nama theipa hawhta, he chyhsa heta he khihpi rao nawpa kyh hrohsona bie phuah ta, chavâta thi awpa ta a thâtih pachia tlâh a châ,” tah ei ta.

RYHPACHANEINA 13:6

“Na nô sawchapawpa na unawhpa ta tlyma, na sawchapaw ta tlyma, na sawchanô ta tlyma, na kalachhôh liata na lapinô ta tlyma, na hrona tlu ta kyh na pachâpa na viasa pha chaipa ta tlyma ta, ‘Vawh sih la, khazoh hropazy chakao ei suh u,’ tahpa ta, nâ nata châ pathlatuhpazy ta nama pahno beih leipa khazoh a chhy awpa ta arulâta a cha reipasao khiahta cha,

RYUREITUHPAZY 2:15

Hrâ ama siena maihta, Abeipa ta a reipa nata ama hnohta bie â taihpa hawhta, Abeipa ku tlai ta âmo cha â dyuhpa vâta, pahniepa ama châ lymâ. Chavâta ama pachâ a rôh ngaita.

1 ABEIZY 13:19

Chatanachata Khazohpa chyhsa cha hrohsopa hnohna chata a lie ha ta. A o liata viahchhâ zy niepa ta, ti zy doh ta.

ZEKARIA 13:2

“Pheisaihzy Abeipa ta hetana heta a tah: Cha noh liata khazoh nothlahpa mohzy cha râh tawhta phie aw na ta, a thei thlâh khao aw veih ei. Hrohsopazy nata thlahpa puapazy chhao râh tawhta ei papua khai ha aw ei.