RAWMA 8:24 - Mara Bible RV (BSI)

²⁴ Cha hnabeiseihna vâna chata pachhapa eima châ. Hmô theipa hnabeiseihpa cha, hnabeiseihna châ vei. Hmô hapa cha, ahy ma hnabeiseihpa ta a hâ khao aw?

RAWMA 8:24 ပူးပေါင်းရင်းမြစ်များ

HLAZY 146:5

Zakaw Khazohpa cha baotuhpa ta hnei ta, Abeipa a Khazohpa liata hnabeiseihna a hneipa cha, A hu â hieh na!

HLAZY 33:18

Moh teh u, Abeipa mo cha ano a chituhpazy chô liata khaih ta, A kyhpachâna tleih beih leipa hnabeiseihtuhpazy chô liata a khaih tyh.

HLAZY 33:22

Hy Abeipa, eima hnabeiseihna na châpa hawhta, Na kyhpachâna tleih beih leipa cha eima chô liata y mawh sy!

BIESOZY 14:32

Moleipa cha a hmo chhie taopa vâta pao ta, Mosiapa deikua cha thina liata hnabeiseihna a hnei.

ZEREMIAH 17:7

“Abeipa a ngâchhâ ta, Abeipa liata a pahniehpa cha, A hu â hieh aw.

ZEKARIA 9:12

Hnabeiseihna a hneipa atâhpazy saih u, Nama thokhy lâ kua teh u; Tanoh tlai ta ei phuah, A lie no ta ei cha thô aw ei.

RAWMA 12:12

Hnabeiseihna liata a ly u la, rietheitaona liata tiama u la, thlahchhâ lylia muh vy.

RAWMA 15:13

Thlahpa Pathaihpa hmotaotheina zawhzi ta hnabeiseihna hluhpi nama hnei thei nawpa ta, hnabeiseihna Khazohpa ta, ano nama ngâpa hawhta, alyna nata thlalôhna ta cha pabie mawh ei sy.

RAWMA 15:4

Hlâno ta bie ropa zydua kha eimâ chu hra awpa ta ropa a châ. Chatanachata Biehrai bie hawhta tiamana nata thatlôna hneipa ta hnabeiseihna eima hnei thei aw.

RAWMA 4:18

“Cha hawhna chata na pathlazy ama y aw,” tahpa ta chhopa a châpa hawhta, phopi hluhpi paw châ awpa ta, hnabeiseih â chhih leipa chhao ta, ngiapâna ta khâchâ hnabeiseih lymâ ta.

RAWMA 5:2

Ano vâ lilaw ta tahmâ ta eimâ duana ngiachhiena liana heta ngiapâna ta a ngia ha pi ta, Khazohpa rônahna hnabeiseihpa ta a lypa ta eima y.

RAWMA 8:20

Hmotaopazy cha hraoleipa ta y awpa ta raopa châ ha ta, âmo khopa vâta châ leipa ta, a paysatuhpa vâta tlao a châ. Châhrasala hnabeiseihna a y.

1 KAWRINI 13:13

Ngiapâna zy, hnabeiseihna zy, kyhpachâna zy he khâ ama y thlâh ha aw. Cha miathôhzy hry liata a rônah chaipa cha kyhpachâna he a châ.

2 KAWRINI 4:18

Hmô theipazy sai leipa ta, hmô thei leipazy tlao eima sai. Hmô theipazy cha buakha châta châ ta, hmo hmô thei leipazy deikua cha chhâzaw châta a châ.

2 KAWRINI 5:7

hmô theipa ta sie leipa ta, ngiapâna ta eima sie.

KALATIA 5:5

Keimo deikua la, Thlahpa zawhzi ta, ngiapâna vâta siana to awpa hnabeiseihpa ta, a ngiatiah leipa ta eima hâ.

KAOLAOSÂ 1:23

Ngiapâna liata y thlâh ha u la, â ipa ta a duah teh u. Thâtihpha hnabeiseihna nama pahnopa tawhna khata nama tleisai leipa khiahta cha, cha hawhta nama châ thei aw. Cha thâtihpha cha avâ ry liata hmotaopa zydua hnohta phuahpa châ ta, kei, Pawla he, cha thâtihpha chakaotuhpa cha ei châ.

KAOLAOSÂ 1:27

Cha bienyupa rônahpa hneirônazie cha Zenitaizy hry liata pahnosa awpa ta, Khazohpa ta mopathaihpazy a tlyh ta, cha bienyupa cha nâmo liata a ypa Krista cha châ ta, rônahna hnabeiseihpa cha a châ.

KAOLAOSÂ 1:5

vârâh liata nama châta hnabeiseihna sopa a châpa vâta, nâmo vâta Khazohpa lâta alyna bie khâ eima reih tyh. Cha hnabeiseihna cha thâtihpha biehmeiseihpa tawhta nama theipa kha a châ.

1 THYSALAWNIKA 5:8

Keimo deikua cha, noh chyhsazy eima châpa vâta, ngiapâna nata kyhpachâna chachôhna vyhphao a kypa ta, pachhana hnabeiseihna lakhu a khu sih la, palôh pasohpa ta y suh u.

2 THYSALAWNIKA 2:16

Eima Beipa Zisu Krista nata Khazohpa eima Paw, kyh miah pachâ ta, ngiachhiena vâta chhâzaw thlalôhna nata hnabeiseihna phapa miah pietuhpa ta

TITU 3:7

Chatanachata a ngiachhiena vâta thai pachâsapa ta y aw pi ta, chhâzaw hrona a hnabeiseihpa ryutotuhpazy eima châ thei aw.

HEBRAI 11:1

Ngiapâna cha hmo hnabeiseihpazy a y tlai tahpa pahnona châ ta, hmo hmô leipazy pahnopasiana a châ.

1 PITY 1:21

Khazohpa ta Krista cha athihpa hry tawhta pathyupa ta rônahna patosa ta, Krista zawhzi ta Khazohpa ngiapâtuhpazy nama vaw châ haw. Chatanachata namâ ngiapâna nata hnabeiseihna cha Khazohpa liata a y thlâh ha aw.

1 PITY 1:3

Eima Beipa Zisu Krista Khazohpa nata Paw cha reithaipa ta y mawh sy! Ano cha zawngiahna rônah ngaitapa a hneipa a châpa hawhta, athihpa hry tawhta Zisu Krista thyuheihna zawhzi ta hnabeiseihna hrohpa hnei awpa ta miah papihpathisa ta,

1 ZAWHÂNA 3:3

Ahy rai ano liata hnabeiseihna a hneipa maih cha, ano a pathaihpa hawhta, anosasyh ta â pathaisa tyh.