RAWMA 11:36 - Mara Bible RV (BSI)

³⁶ Ano tawhta, Ano vâta, Ano châta, Hmo to a ypa a châ. A hnohta chhâzaw ta rônahna y mawh sy! Amen.

RAWMA 11:36 ပူးပေါင်းရင်းမြစ်များ

HLAZY 115:1

Keimo lâ châ leipa sala, Hy Abeipa, keimo lâ châ leipa sala, Na kyhpachâna tleih beih leipa nata na ngâchhihna vâta, Nâma moh rônah nawpa tlao châ mawh sy!

HLAZY 33:6

Abeipa bie ta avâzy khi taopa châ ta, A pakah hu ta avâ liata a ypa zydua khi taopa a châ.

BIESOZY 16:4

Abeipa ta hmo to a chhâpa hneipa ta tao ta, Moleipa chhao he chhiena noh châta a taopa a châ.

ISAI 42:12

Abeipa cha parônahsa ei sala, Ano reithaina cha, Tilaipi kiah râhzy liata phuah mawh ei sy.

DÂNIAH 4:3

A ngiana hmozy rônah ta, A hmonoâhpazy a thatlô ngaita! A khinarâh cha tlyzaw khinarâh châ ta, A ryureina chhâ zydua ta â duah aw.

DÂNIAH 4:34

Cha nohzy chhâna liata, kei, Nebukaneza cha avâ lâ ei mo kaw khaih na ta, chatanachata ei pahnona cha kei lâta vaw kua heih ta, Chônôchaipa cha reithai na ta, tlyzaw ta a hrohpa cha reithaipa ta ei palyupalih. A ryureina cha tlyzaw ryureina châ ta, A khinarâh chhâ zydua ta â duah.

MATHAI 6:13

Reipasaona lâta miah a chhi khah y, Moleipa tawhta miah pachha mah y. Khinarâh zy, hmotaotheina zy, rônahna zy, Chhâzaw nata tlyzaw ta na eih châ tlôh ta. Amen.’

LUKA 19:38

“Abeipa moh ta Bei a vypa cha reithaipa ta y mawh sy! Vârâh liata thlalôhna charei sala, chônôchaipa liana khita rônahna y mawh sy!” tah ei ta.

LUKA 2:14

“Khazoh Chônôchaipa hnohta rônahna y sala, Lei chô liata â lypa chyhsazy hnohta thlalôhna y mawh sy!” tah ei ta.

HMOTAOPAZY 17:28

“Ano vâta hroh pi ta, A pielyu pi ta, Eima ypa a châ.” Nama hlaphôh phi thaipa thokha chhao ta, “‘Keimo chhao he, A pathlazy eima châ,’ tahpa ta ama reih hra.

RAWMA 16:27

Khazohpa sopa a y chhôhpa hnohta, Zisu Krista vâta chhâzaw ta rônahna y mawh sy! Amen.

1 KAWRINI 11:12

Chanô cha chapaw tawhta a puapa a châpa hawhta, tahmâ cha chapaw chhao chanô tawhta a pihpa a châ hra. Ato zydua deikua cha Khazohpa tawhta a puapa a châ.

1 KAWRINI 8:6

keimo châta deikua cha, Paw Khazohpa pakha deita a y. Ano tawhta ato pua ta, keimo chhao ano châta a ypa eima châ. Abeipa pakha deita hnei pi ta, ano cha Zisu Krista a châ. Ano vâta ato y ta, keimo chhao ano vâta a ypa eima châ hra.

KALATIA 1:5

Khazohpa hnohta chhâzaw nata tlyzaw ta rônahna y mawh sy! Amen.

EPHESI 3:21

Awnanopa liata nata Krista Zisu liata rônahna cha, chhâ zydua hnohta chhâzaw nata tlyzaw ta y mawh sy. Amen.

PHILIPI 4:20

Eima Khazohpa nata Paw hnohta chhâzaw nata tlyzaw ta rônahna y mawh sy. Amen.

1 TIMAWTHY 1:17

Chhâzaw Beipa, thi thei leipa, hmô thei leipa nata Khazohpa a y chhôhpa hnohta chhâzaw nata tlyzaw ta palyupalihna nata rônahna y mawh sy. Amen.

1 TIMAWTHY 6:16

Ano deita cha thi thei leina hnei ta, khaihpa a hnia thei rimâ leipa liata a pahrâ. Ano cha ahy hmah hmô beih leipa nata hmô thei leipa a châ. Khazohpa hnohta palyupalihna nata hmotaotheina chhâzaw ta y mawh sy. Amen.

2 TIMAWTHY 4:18

Abeipa ta moleipa zydua tawhta na pachha aw ta, a vâ khinarâh lâ â bohpa ta eina tlôkhei aw. A hnohta chhâzaw nata tlyzaw ta rônahna y mawh sy. Amen.

HEBRAI 13:21

a khopa nama tao thei nawpa ta hmo pha to ta cha tobi ei sala, a mohmô liata â lynazie ta nama y lymâ thei nawpa ta, Zisu Krista zawhzi ta nâmo liata hria lymâ sala, Zisu Krista hnohta chhâzaw nata tlyzaw ta rônahna y mawh sy. Amen.

HEBRAI 2:10

Ano châta nata ano zawhzi ta ato a ypa Khazohpa ta, saw hluhpi rônahna lâ a chhipa ta ama pachhana a taotuhpa Krista cha, pasa taona siepahliepa ta pakina patosa â chhuahpa cha, a châna awpa rai a châ.

1 PITY 4:11

Ahy rai bie a reihpa maih Khazohpa bie hawhta reih sala, a chakaopa maih Khazohpa ta thatlôna a piepa lymâ hawhta chakao mawh sy. Chatanachata Zisu Krista vâta Khazohpa cha kyh to liata palyupalihpa ta a y thei aw. Rônahna nata hmotaotheina cha chhâzaw nata tlyzaw ta ano eih châ tlôh ta. Amen.

1 PITY 5:11

Hmotaotheina cha a hnohta chhâzaw nata tlyzaw ta y mawh sy. Amen.

2 PITY 3:18

Eima Beipa nata Pachhatuhpa Zisu Krista ngiachhiena nata pahnona liata laiseih lymâ teh u. Tahmâ nata chhâzaw ta Abeipa hnohta rônahna y mawh sy. Amen.

ZUDÂH 1:25

eima Beipa Zisu Krista zawhzi ta miah Pachhatuhpa Khazohpa a y chhôhpa hnohna chata rônahna zy, abeina zy, ryureina zy, biehneina zy cha, daihti khô chiehpa zydua nata tahmâ nata tlyzaw ta y thlâh ha mawh sy. Amen.

BIEPHUAH 19:1

Cha khai tawhta vârâh liata zawpi hluhpi ao paro ngaitapa a lyupa thei na ta, ao chata, “Haleluia! Pachhana zy, rônahna zy, hmotaotheina zy cha, Eima Khazohpa eih a châ.

BIEPHUAH 21:6

Chatawhcha ei hnohta, “A ngoh haw! Kei he Alphâ nata Ômekâ châ na ta, âthaona nata achhâna ei châ. Dâhphipa hnohta hrona tihnawh tawhta ti a saipa ta ei pie aw.

BIEPHUAH 7:10

Chazy chata ao paro ngaitapa ta, “Pachhana cha Beidyuchhai liata a tyuhpa eima Khazohpa nata Mietakutaw eih a châ!” tahpa ta awh ei ta.

BIEPHUAH 7:12

“Amen! Reithaina, rônahna, sona, alyna biereina, palyupalihna, hmotaotheina nata thatlôna zy cha chhâzaw nata tlyzaw ta eima Khazohpa hnohta y mawh sy! Amen,” tahpa ta Khazohpa a chhy ei ta.