PUASAINA 12:48 - Mara Bible RV (BSI)

⁴⁸ Chihropa nama hry liata a pahrâpa ta Abeipa Zawpakhô a chay khoh hra khiahta cha, a hnohta a ypa chapaw zydua chopaw tai khai tua awpa châ ta, cha khai tawhta a vaw hnia aw ta, a chay hra aw. Chatanachata ano cha râh liata a pihpa hawhta pachâpa a châ aw. Chopaw tai leipa chyhsa deikua cha a nie awpa châ vei.

PUASAINA 12:48 ပူးပေါင်းရင်းမြစ်များ

ÂTHAONA 17:11

Nama chopaw vo tai aw ei chi ta, cha cha kei nata nâmo likah liata biehrai ngiana a châ aw.

ÂTHAONA 17:12

Chhâ vaw y lymâ awpa zydua liata, nama hry liata chapaw maih, na o liata a pihpa nata na pathla a châ hlei leipa chihropa tawhta sôh ta na chaleipazy chhao, noh charie uhtheipa ama châ nahta chopaw tai khai awpa a châ.

PUASAINA 12:19

Noh sari chhôh nama o chhôh liata thinô rai a y awpa châ vei. Ahy rai thinô pahlaopa a niepa chyhsa cha, chihropa chhao, a râh chyhsa chhao, Izarei zawpi tawhta chhawh pathlahpa a châ aw.

PUASAINA 12:43

Abeipa ta Mawsi nata Arawna hnohta, “He he zawpakhô bieraopa a châ: Chihropazy ta Zawpakhô Kyhchhi pati ama nie hra awpa châ vei.

EZEKIA 14:7

Izarei pathla tlyma, Izarei râh liata chihropa a pahrâpa tlyma, kei tawhta a pananopa ta, a khazoh nothlahpazy a palôh liata soh ta, a paraona ahluana lô a hmia liata sona chôta, kei nâ saohiah awpa ta hrohsopa lâ a pangaipa maih cha, kei Abeipa tlai heta ei chhy aw.

EZEKIA 44:9

“Abeipa Zehôvâh ta hetana heta a tah: Pathipalôh nata sapa chopawtaileipa chihropa, Izarei phopi hry liata a ypa chihropa ahy hmahta ei supathaihpa liata amâ ngia awpa châ vei.

EZEKIA 47:22

Râh cha Izarei sawzy ta nama ryuto râh ta a rai aw ei chi ta, nama hry liata chihropa a pahrâpa, nama hry liata saw a hnei hapazy chhao nama rai hra aw. Âmo cha Izarei saw ta a pihpa hawhta châ aw ei ta, Izarei chizy hry liata, nâmo hawhta ryuto râh ama hnei hra awpa a châ.

THEIHTHAINA 19:34

Chihropa nama hnohta khih a sapa cha, nama râh chyhsa pakha hawhta nama pachâ awpa châ ta, nâma kyh nâ pachâpa hawhta a kyh na pachâ awpa a châ. Nâmo chhao Izi râh liata chihropa nama châpa kha a thei thlâh ha teh u. Kei he Abeipa nama Khazohpa ei châ.”

MALUHREINA 9:14

Chihropa chyhsa nama hnohta a pahrâpa ta Abeipa zawpakhô kyhchhi a chay khoh hra khiahta cha, zawpakhô kyhchhi bieraopa nata ryhpa hawhta a chay hra aw. A râh chyhsa nata chihropazy châta ryhpa miakha nama hnei awpa a châ,” tah ta.

KALATIA 3:28

Krista liata cha, Zu tlyma, Krikâh tlyma y leipa ta; sei tlyma, khotalaipa tlyma y hra leipa ta; chapaw tlyma, chanô tlyma y hra vei. Krista Zisu liata cha, nama zydua ta miakha nama châ.

KAOLAOSÂ 3:11

Cha chyhsa thiehpa hro liana cha, Krikâh chyhsa nata Zu chyhsa tahpa tlyma, chopawtaipa nata chopawtaileipa tahpa tlyma, chi hnohkhawpa tahpa tlyma, Skythia mo tahpa hawhpa tlyma, sei tahpa tlyma, khotalaipa tahpa tlyma, y khao vei. Krista cha ato châ ta, ato liata a ypa a châ.