PUASAINA 12:16 - Mara Bible RV (BSI)

¹⁶ Noh khana noh ta pakhypi pathaihpa hmâh aw ei chi ta, a noh sarina noh ta pakhypi pathaihpa a y heih aw. Chyhsa to nie awpa châta nama hriapa dei leipa cha, cha daihti chhôh cha khâpa rai hmah nama hria awpa châ vei.

PUASAINA 12:16 ပူးပေါင်းရင်းမြစ်များ

PUASAINA 16:23

Mawsi ta, “He he Abeipa biepiepa a châ: ‘Mylâ cha a pahâna noh, noh ziehpa, Abeipa châta Pahânoh pathaihpa a châ aw. Chavâta pakâh awpazy cha pakâh u la, chho awpazy chhoh u la, a laibâhpa zydua mylâ châta namâ so aw,’” tah ta.

PUASAINA 16:29

Pachâ teh u, Abeipa ta Pahânoh cha pie ei ta, chavâta noh charuna noh ta, noh no a khi awpa viahchhâ a cha pie ei. Chyhsa to âmo su chyu liata y khai mawh ei sy. Noh sarina noh cha ahy hmahta a yna su tawhta khô pua cheita khah sy,” tah ta.

PUASAINA 16:5

Noh charu noh liata deikua cha, noh chareih ta amâ huapa lie no ta a huah aw ei ta, nie awpa châta amâ patohpatia tyh aw,” tah ta.

PUASAINA 20:10

A noh sarina noh deikua cha, Abeipa na Khazohpa châta Pahânoh a châ. Cha noh liata cha, nâ chhao, na sawchapaw chhao, na sawchanô chhao, na seichapaw chhao, na seichanô chhao, na sahroh nata na o liata chihropa a ypazy ta khâpa rai hmah nama hria awpa châ vei.

PUASAINA 34:18

“Viahchhâ thinô pahlao leipa kyhchhi na chay awpa a châ. Bie ei cha piepa hawhna khata, Abi thla daihti raopa liata noh sari chhôh viahchhâ thinô pahlao leipa na nie awpa a châ, Abi thla liata Izi râh tawhta na kaw puapa vâta.

ISAI 1:13

Hraoleipa atheihnazy vaw cheih khao khah u; Ropahâhpa chhao ei châta pasichhihpa a châ. Thla thiehpa nata Pahânoh nama chay tyhpazy Chhyh thai khao leipa na ta; Noh peimawhpazy nama chay tyhpa chhao, Chhyh thai khao va na; Moleina chhaota pakhypi pathaihpa nama hmâ tyhpazy chhao Chhyh thei khao va na.

THEIHTHAINA 23:21

Cha noh lia tlai ta nama châta pakhypi pathaihpa phuah aw ei chi ta, rai rupa khâpa hmah nama hria awpa châ vei. Cha cha nama chhâ zydua châta nama pahrâna zydua liata chhâzaw bieraopa a châ aw.

THEIHTHAINA 23:27

“Thla sarina noh hrawhna noh cha Chatlaina Noh châ ta, nama châta pakhypi pathaihpa châ aw ta, a paky aw ei chi ta, Abeipa lâta mei ta hmohlâpa nama hlâ awpa a châ.

THEIHTHAINA 23:35

A noh khana cha pakhypi pathaihpa châ aw ta, rai rupa nama hria awpa châ vei.

MALUHREINA 28:18

Noh khana noh cha pakhypi pathaihpa châ aw ta, rai rupa nama hria awpa châ vei.

MALUHREINA 28:25

Noh sarina noh ta pakhypi pathaihpa hnei aw ei chi ta, rai rupa nama hria awpa châ vei.

MALUHREINA 28:26

“Nama hâta kyhchhi chhôh ta, Abeipa lâta niepa hlâna sâh thiehpa, thei hmiatuapazy nama hlâna noh ta, pakhypi pathaihpa hnei aw ei chi ta, rai rupa nama hria awpa châ vei.

MALUHREINA 29:1

“Thla sarina noh khana noh liata pakhypi pathaihpa hnei aw ei chi ta, rai rupa nama hria awpa châ vei. Nama châta chiahmiezy tôna noh a châ aw.

MALUHREINA 29:12

“Thla sarina, noh hrawh hleipangawhna noh liata pakhypi pathaihpa hnei aw ei chi ta, rai rupa nama hria awpa châ vei. Abeipa châta noh sari chhôh kyhchhi nama hmâh aw.

ZAWHÂNA 19:31

Pachynoh châ ta, rizy cha Pahânoh ta kraws liata y thlâh awpa a châ leipa vâta, cha Pahânoh cha noh rônahpa châ tlôh ta, Zuzy ta Pilâ hnohta ama pheizy thliepa ta, ama ri cha la ha awpa ta a haw ei ta.

RYHPACHANEINA 16:8

Noh charu chhôh viahchhâ thinô pahlao leipa nie aw ei chi ta, noh sarina noh cha Abeipa nama Khazohpa châta pakhypi pathaihpa a châ aw. Cha noh liata cha, rai na hria awpa cha vei.