PHILIPI 2:27 - Mara Bible RV (BSI)

²⁷ Thi daihmâna taihta a pasapa châ tlai ta, châhrasala Khazohpa ta ano cha ngiachhie ta, ano a ngiachhiepa dei châ leipa ta, pachârôhna chôta pachârôh via heihna ei tyh lei nawpa ta, kei eina ngiachhiepa a châ hra.

PHILIPI 2:27 ပူးပေါင်းရင်းမြစ်များ

2 ABEIZY 20:1

Cha nohzy liata Hezekia cha thi daihmâpa ta pasa ta. Amôza sawcha­pawpa hrohsopa Isai ano lâ a vy ta, a hnohta, “Abeipa ta hetana heta a tah: ‘Na chhôhkha khihsatôhtuzie awpa paryh teh, na thi aw, hroh aw va chi,’” tah ta.

ZAWBÂ 5:19

Tymâna miacharu tawhta cha pachha aw ta, Miasarina liata chhiena ta cha hria aw vei.

HLAZY 34:19

Mosiapa cha pasa hluhpi tao ta, Châhrasala cha zydua tawhta Abeipa ta a pachha lymâ.

ISAI 27:8

Izarei cha a dyuh chi ta, A râh tawhta papuapa ta, Na papaipatla haw. Nochhi thlih hrâhpa pathli no hawhta, Abeipa hu thatlôpa ta Izarei cha phaoh ta, A pasie haw.

ISAI 38:17

Pachâ tua, nôpona thata ei tyhpa kha, Keima pha nawpa châta tlao a vaw châ. Châhrasala kyhpachâna ta ei hrona na pachha chi ta, Raona khaohtlô tawhta eina pachha ha chi; Ei moleina zydua kha, Na hnohky lâ na thy khai haw.

ISAI 43:2

Tizy na chaka nota, Na hnohta y awh na ta; Chavahzy na chaka nota, Cha vao aw veih ei. Mei hry liata na sie nota, Cha kâ leipa aw ta, Meipaleih ta cha palâ aw vei.

ZEREMIAH 10:24

Chavâta Hy Abeipa y, Na pado mah y; Na hiehâhna ta deikua châ leipa sala, Adona ta na pado mah y; Chataleipatala eina pahlei pathlei aw chi na.

ZEREMIAH 45:3

‘Ei hu a po kaw dia! Abeipa ta ei sa pasana liata pachârôhna na baichha ha ta, ei hro chhao panao pâ khai ha ta, huhnona rai hmô thei va na,’ tah chi ta.

ZEREMIAH 8:18

Ei lyna lei ha ta, Pachârôhna na vaw tlô thlupa ta, Palôh pasana sai ta ei bie haw.

HABAKU 3:2

Hy Abeipa, na thâpha ama reipa thei na ta, Hy Abeipa, na hmotaopazy noâh ei tah ngaita. Keimo daihti liata pathieh heih la, Keimo chhâ liata pahnosa heih mah y! Pathiiana liata zawngiahna a thei tyh mah y!

HMOTAOPAZY 9:37

Cha daihti liata Dawkâsi cha pasa ta, thi ha ta. A ngai ama pasi khai nahta, o chô chhôhpadâhpa liata pazia ei ta.

1 KAWRINI 10:13

Chyhsa chô liata a tlô tyhpa reipasaonazy dei leipa ta cha, reipasaona hropa nama chô liata tlô beih vei. Khazohpa cha ngâchhihpa châ ta, nama pahnie lei awpa reipasaona namâ tyh awpa pasaih aw vei. Reipasaona nama pahnie thei nawpa ta, reipasaona raohpa ta a râ nawpa lâpi a cha taopa aw ei.

2 KAWRINI 2:7

Hrie via awpa hlâta cha, a ngiahthai u la, a thlah palôh teh u. Chataleipatala pachârôhna ta a vaosao pathlei aw na.

PHILIPI 2:26

Nama zydua ta cha vâ ngaita ei ta, a pasapa kyh nama vaw theipa vâta a palôh pha thai khao vei.

PHILIPI 2:28

Chavâta ano nama hmô heih tita namâ ly thei nawpa nata ei pachârôhna a chyh via thei nawpa ta, Epâpharôditâ cha nâmo lâ vaw pasiesa awpa a ngiatiah va na.

PHILIPI 2:30

Nâmo ta eina deichhy awpa vyuhpa nata namâ phahlanazy pabie awpa ta, a hrona sokhâhpa ta na chakao ta, Krista raihria vâta a thi daihmâpa a châ.