PHILIPI 2:12 - Mara Bible RV (BSI)

¹² Chavâta kho ngaitapazy saih u, bie nama zyh tyhpa hawhna khata, ei y nota dei hria leipa u la, tahmâ ei y vei chhôh ta tlao hria viapa ta, chipa nata chalyupa ta nama pachhana cha hria papua teh u.

PHILIPI 2:12 ပူးပေါင်းရင်းမြစ်များ

EZRÂ 10:3

Chavâta ei zibeipa nata eima Khazohpa biepiepa ta a chalyupazy ryhraokheipa hawhta, Izarei sawzy ta chihropa zuah lapinô ta ama hneipa zydua nata ama sawzy papua khai awpa ta, eima Khazohpa liata bie hraih ei suh u. Cha hawhta eima tao tita deikua cha, Ryhpa hawhta taopa châ mawh sy.

HLAZY 119:120

Ei pôhpa he nâma chipa ta a chalyu ta, Na pachianazy ei ngiaroh kaw tyh.

HLAZY 2:11

China chôta Abeipa chakao u la, Achalyuna chôta thaphapa ta y teh u.

BIESOZY 10:16

Mosiapa hriapasana cha hrona tlôkhei ta, Moleipa athôhna deikua cha paraona a tlôkhei tyh.

BIESOZY 13:4

Thathipa hro cha hmo khoh kaw ta, Châhrasala a hnei theipa y leipa ta; Tiamapa hro deikua cha, Lôhrâtlôna taihta a hnei.

ISAI 66:2

He hmo zydua he keima ku ta tao ta, Chatanachata he hmo zydua he a vaw ypa a châ,” Abeipa ta a tah. “A panawhpa ta a palôh liata a ngiapachhi ta, Ei bie liata a chalyupa chyhsa lâta ei mo ei padeih aw,” Abeipa ta a tah.

ISAI 66:5

Nâmo, a bie liata a chalyu tyhpazy saih u, Abeipa bie he thei teh u: “Châ hao ei ta, Ei moh vâta châ papuatuhpa nama unawhzy ta, ‘Namâ lyna eima hmô thei nawpa ta, Abeipa cha parônahsapa ta y mawh sy,’ ama tah; Châhrasala âmo chaipa cha, Nozapa ta paysapa tlao ama châ aw.

MATHAI 11:12

Bâtituhpa Zawhâna daihti tawhta tahmâ taihta vârâh khinarâh cha thachahra ta adyuhna vâta pasa tao lymâ ta, thachahra a hmâhpazy ta tararuahna ta ama la lymâ.

MATHAI 11:29

Ei raopaky a ky u la, kei tawhta a chu teh u. Kei cha areisipa nata palôh nônaipa ei châ. Nama thlahpazy châta apahâna nama hmô aw.

HMOTAOPAZY 16:29

Patâhna o vaituhpa cha meiôh pado ta, thlai a ngia ta, chipa ta a chalyuna chôta Pawla nata Sila hmiakô liata â khu lâta pao ta.

HMOTAOPAZY 9:6

Thyu la, khihpi liata a ngia teh, na tao awpa ama cha chho aw,” tah ta.

RAWMA 2:7

Hmopha tao hualuapa ta, rônahna nata palyupalihna nata thi khao leina a tluatuhpazy hnohta chhâzaw hrona a pie aw.

1 KAWRINI 15:58

Chavâta unawh kho ngaitapazy saih u, â ipa ta a duah u la, papie thei lei awpa ta a pachyu teh u. Nama hriapasana cha Abeipa liata hraoleipa châ vei tahpa pahnopa ta, Abeipa raihria cha phahnai ngiah ngaitapa ta hria lymâ teh u.

1 KAWRINI 2:3

Chiehleina, china nata thata achalyuna chôta nama hry liata ei y tyh.

1 KAWRINI 4:14

Nama noza nawpa ta he biezy he ei ropa châ vei, ei saw kho ngaitapazy hawhta cha chhorei nawpa ei ta ei ropa a châ.

2 KAWRINI 7:15

Nama zydua ta reingiah ngaitapa châ ei chi ta, china nata chalyuna chôta namâ vaw lyzie â thei thlâh hapa vâta, a cha tlaichhaina ei a pôh via lymâ.

EPHESI 6:5

Seizy saih u, Krista rei namâ ngiapa hawhta, palôh dopa phaopa ta, chipa nata a chalyupa ta, khizaw liata nama zibeipazy rei a ngiah teh u.

PHILIPI 1:27

Khâpa rai châ sala, nama hro cha Krista thâtihpha nata a hmie tua mawh sy. Chatanachata nâmo ei châ vaw hmô ei tlyma, hmô vei ei tlyma, thlahpa miakha liata â ipa ta a duahpa ta, palôh miakha phaopa ta thâtihpha ngiapâna bie a châhkhei ei chi ta, nama tei lymâ tahpa ei vaw pahno aw.

PHILIPI 1:29

Krista namâ ngiapâpa dei châ leipa ta, ano vâta pasa nama tao awpa chhao pasaipa châ tlôh ta.

PHILIPI 1:5

Thâtihpha raihria liata, noh khana noh tawhta tahmâ taihta eina hrialâh lymâ ei chi.

PHILIPI 1:6

Nâmo liata raihria phapa a pathaotuhpa khata, Zisu Krista noh liata a pangoh aw tahpa ei ngiapâ.

PHILIPI 2:19

Nama thâtih pahnopa ta, kei chhao thapatlôpa ta ei y thei hra nawpa ta, nâmo lâ Timawthy vaw tuah patoh awpa Abeipa Zisu liata ei hnabei a seih.

PHILIPI 4:1

Chavâta ei kho ngaitapa nata ei vâ ngaitapa ei unawhzy nata ei lyna nata ei lakhozy saih u, Abeipa liata â ipa ta a duah teh u.

PHILIPI 4:15

Nâmo, Philipi mo saih u, thâtihpha ei chho tua nota Mâsidônia râh tawhta ei pua nona kha, nâmo dei leipa ta cha, Awnanopa miakha hmahta hmopiena nata hmodaona kyh liata na hrialâh veih ei tahpa nâmo tlai ta nama pahno.

1 THYSALAWNIKA 1:3

Ngiapâna vâta nama hmotaozie zy, kyhpachâna vâta nama hriapasazie zy, eima Beipa Zisu Krista liata hnabeiseihpa vâta nama tiamazie zy kha, eima Khazohpa nata Paw hmiakô liata khâ eimâ thei tyh.

2 TIMAWTHY 2:10

Chavâta atlyhpazy ta Krista Zisu liata a ypa pachhana cha, chhâzaw rônahna chhaota ama hmô thei nawpa ta, âmo châta ato pasa ei tao lylia.

HEBRAI 12:1

Cha ngiapâna bie pahnokheituhpazy ta meihdo ru ngaitapa hawhta miah ama pahlypa vâna heta, miah pahny pakhawpa maih nata moleina keimo liata khâchâ a baipa cha soh sih la, eima hmiakô liata arâpasuana a ypa liata tiama ngaitapa ta a râ lymâ suh u.

HEBRAI 4:1

Chavâta â pahâna liata a ngia awpa bietai y thlâh ha tlôhpa ta, nama hry liata a ngia tlâh leipa nama y pathlei lei nawpa ta, chi ei suh u.

HEBRAI 4:11

Chavâta reingiah leina vâta ama paopa hawhna khata ahy hmah ama pao lei nawpa ta, cha apahâna liata a ngia awpa ta tei ei suh u.

HEBRAI 5:9

chavâta pakipa ta taopa vaw châ ta, a rei a ngiahpa zydua châta chhâzaw pachhana hnawh a vaw châ haw.

1 PITY 2:11

Kho ngaitapa saih u, khichhaipa nata khitlyhpa nama châpa vâta, thlahpa a dyuhtuhpa sapa aohraohnazy bâhsai awpa ta ei châ haw ei.

2 PITY 3:18

Eima Beipa nata Pachhatuhpa Zisu Krista ngiachhiena nata pahnona liata laiseih lymâ teh u. Tahmâ nata chhâzaw ta Abeipa hnohta rônahna y mawh sy. Amen.