NEHEMIAH 6:12 - Mara Bible RV (BSI)

¹² Kha chyhsa kha Khazohpa tuapa châ leipa ta, Tôbia nata Sanbâlâ ta tâkâ piepa ta hmâh ei ta, kha hrohsona biezy kha ei chô liata a reipa a châ tahpa a hnôhlâ ta vaw pahno na ta, ei hmôpasiapa a châ.

NEHEMIAH 6:12 ပူးပေါင်းရင်းမြစ်များ

NEHEMIAH 6:11

Châhrasala kei ta, “Kei he a râ thlâh awpa chyhsa ma ei châ? Kei hawhpa chyhsa heta Achhyna o chhôh lâ a ngiapa ta ma ei hro ei pabohsa aw? A ngia aw va na,” tah na ta.

NEHEMIAH 6:13

Chipa vâta Achhyna o chhôh lâ a ngia sah la, cha moleina hmo cha na pataosapa ta, ei moh pachhiepa ta eina pasipasawh thei nawpa ei ta, ano kha tâkâ piepa ta ama hmâpa a châ.

ISAI 56:11

Izy cha pahâpahaohpa châ ei ta, Â daih tahna rai hnei veih ei. Izarei vaituhpazy deikua cha, Mietaku vaituhpazy châ taraw ei ta, Novâhna hnei veih ei; Ama lâpi chyu lâta a heih ei ta, Âmo athôhna lâ a heihpa sai ama châ.

ZEREMIAH 14:14

Abeipa ta hetana heta einâ chhy: “Hrohsopazy ta ei moh ta haipa ta hrohsona biezy ama phuah tyh. Âmo cha ei tuapa châ leipa ei ta, biepie hra leipa ei na ta, ama hnohta bie reih hra va na. Aluahna phichhyhpa, pachaona hraoleipa nata ama palôh liata dôveina biezy ama cha chhopa a châ.

ZEREMIAH 23:16

Pheisaihzy Abeipa ta hetana heta a tah: “Nama hnohta hrohsona bie a phuahpa hrohsopazy bie nathlie khuh vy. Hnabeiseihna hraoleipazy ta châ pabietuhpazy deita ama châ. Abeipa pakah tawhta a puapa châ leipa ta, âmo palôh liata hmo a lâpazy ama reih tyh.

ZEREMIAH 23:25

“‘Mâ ei sa, mâ ei sa!’ tah ei ta, ei moh ta haipa ta hrohsona bie a phuahtuhpa hrohsopazy bie reipa ei thei.

ZEREMIAH 28:15

Chatawhcha hrohsopa Zeremiah ta hrohsopa Hânaniah hnohta, “Hânaniah, nathlie teh, Abeipa ta cha tuah vei, he phopi he haipa bie na pazosa hih.

EZEKIA 13:19

Haipa bie a nathliepa ei phopi hnohta haipa bie reih ei chi ta, bâli sâh pazah kha nata viahchhâ tlâ chyhta hmô nawpa ta, ei phopi hry liata na reipachhie ei chi ta, a thi tlâh a châ leipa chyhsazy thiepa ta, a hroh tlâh a châ leipazy tlao nama pahro.’

EZEKIA 13:22

Chyhsa siapa cha, kei ta a pachâ ei parôhsa leipa chhao ta, haipa bie ta a palôh pasasa ei chi ta, moleipa ku thapatlôpa ta, a hrona pachha nawpa ta lâpi pha leipa â heihsai awpa a byuh leizie nama chhopa vâta,

EZEKIA 13:7

Kei ta bie ei reih leipa tlai ta, ‘Abeipa ta a phuah,’ nama tahna maih liata, aluahna phichhyhpa hmô ei chi ta, haipa ta pachaopadâhpa bie na rei tyhpa châ vei ma?”

MIKÂ 3:11

Khihpi chhituhpazy ta Panaopapana ta ryureih ei ta, A theihthaipazy ta Ty hneipa ta ama pachu; Hrohsopazy ta tâkâ hmô nawpa ta Pachaona rai ama hria tyh; Chatanachôta Abeipa liata a pahnieh ei ta, “Eima hry liata Abeipa y vei ma? Eima chô liata chhiena vaw tlô aw vei,” Ama tah tyh.

HMOTAOPAZY 20:33

Ahy tâkâ, ngôh nata chysia hmah uahva beih va na.

1 KAWRINI 12:10

Thokha hnohta hmonoâhpa tao theina piepa châ ta, ahropa hnohta hrohsona bie phuah theina piepa a châ. Chyhsa hropa hnohta thlahpa nanopazy pahrua thaina piepa châ ta, mohropa hnohta reihtheileipa ta bie rei theina piepa châ ta, ahropa hnohta reihtheileipa chhopasia theina piepa a châ.

1 KAWRINI 2:15

Thlahpa chyhsa deikua cha, hmo to pahno pasia ta, ano cha sei thei awpa châ vei.

1 TIMAWTHY 3:3

kresawhti pari hmâh leipa, thachahra hmâh leipa chyhsa nônaipa, ahryuchhiana a tao leipa nata tâkâ sôh liata karâ y leipa a châ awpa a châ.

TITU 1:7

Awnanopa chhituhpa cha Khazohpa sôh mokhâhtuhpa a châpa vâta, seina hnei leipa a châ awpa a châ. Chyhsa apalaipa, pathichhiepa, kresawhti pari hmâhpa, thachahra a hmâhpa nata avyuhna ta athôhna a tluapa a châ awpa châ vei.

1 PITY 5:2

Nama hry liata Khazohpa mietaku zaw kha vaih u la, mohôh teh u. Tao awpa a châpa vâta tao leipa ta, Khazohpa bie hawhta byuh ngaitapa ta taopa châ mawh sy. Avyuhna puapa khopa vâta châ leipa sala, chakaona rai hria khohpa vâta châ mawh sy.

2 PITY 2:3

Sôh tlaichhaina vâta haipa biezy reih aw ei ta, sôhpalie nawpa ta ama cha hmâh aw. Ama thaileichâna cha hlâno tawhta y chakhyh thlâh ha leipa ta, ama leidiana chhao a mô vei.

1 ZAWHÂNA 4:1

Kho ngaitapa saih u, thlahpa momaih zo khuh vy. Hrohso pakheipa hluhpi khizaw liata ama vaw pua hapa vâta, thlahpazy cha Khazohpa tawhta a châ ma, châ vei ma tahpa pasia tyh muh vy.

BIEPHUAH 18:13

lôiasohpa, ia-ô, ropahâhpa raopa, myrâ, sathaw ropahâhpa, kresawhti, sathaw, viahdie dipa, âtâ sâh, viahchao nata mietaku, arâ nata talailih zy nata sei ta chyhsa hrona ama zuapazy a chalei awpa y khao veih ei.