NEHEMIAH 4:2 - Mara Bible RV (BSI)

² Chatanachata a unawhzy nata Samâri pheisaihzy hmiakô liata, “He Zu dyutlai leipazy heta khâpa ma ama tao hra tly? Khihpi amâ paduapathi heih aw ma? Atheihnazy ama hlâ aw ma? Noh kha ta patlô zua amâ chhuah hra ma? Mei ta a kâ hapa alôzy cha hnaihny tawhta thaopa ta ama pathieh heih aw ma?” tah ta.

NEHEMIAH 4:2 ပူးပေါင်းရင်းမြစ်များ

EZRÂ 4:4

Izarei râh liata a vaw y chiehpa chyhsazy ta Zudâh mo cha ama hnabei pady ei ta, o cha sa ngâh lei awpa ta pachhipary ei ta.

NEHEMIAH 12:27

Zerusale thokhy hlâna liata, paotlâzy nata tlaipihzy nata totâzy chhaota hlasapa nata alyna bie reipa ta, thokhy hlâna cha a ly ngaitapa ta hmâpa a châ thei nawpa ta, Livai pathlazy cha ama yna su chyu tawhta Zerusale lâ a vy khai awpa ta pahnosapa châ ei ta.

NEHEMIAH 12:43

Cha noh liata atheihna hluhpi hlâ ei ta. Khazohpa ta alyna rônahpa a patosapa vâ ei ta, chanô nata hawtizy chhaota a ly ngaitapa ta y ei ta. Zerusale alyna cha lâhlapi tawh chhao ta thei theipa a châ.

NEHEMIAH 4:10

Zudâh zawpizy ta, “Hmo phaohtuhpazy ama tha a chhâ haw. Hnaihny hra cha hluh tlôh ta, keimo ta la thokhy he padua thei aw ma pi,” tah ei ta.

NEHEMIAH 6:15

Chatanachata thokhy cha, noh sypangawh nata noh no chhôh sapa châ ta, Elul thla, noh kih nata noh pangawhna noh ta palohpa a châ.

HLAZY 83:4

“A vy u la, ama phopi he pamua ha ei suh u; Izarei moh he a thei thlâhpa ta y khao khah sy!” ama tah.

ZEREMIAH 26:18

“Môrese chyhsa Mikâ ta Zudâh bei Hezekia â beina daihti liata hrohsona bie phuah ta, Zudâh zawpi zydua hnohta, ‘Pheisaihzy Abeipa ta hetana heta a tah, “‘Zaio cha leipalie hawhta paliepa châ aw ta, Zerusale cha raona a pachona su a châ aw; Achhyna o tlâh chhao, Râhmâhpa tlâh lâta â lie aw,’” tah ta.

ZEREMIAH 33:24

“He chyhsazy ta, ‘Abeipa ta â tlyhpa phopi miano cha a thy ha ei,’ tahpa ta ama reipa pachâ beih va chi ma? Cha hawhna chata ei phopi cha mohnao ei ta, âmo mohmô liata la phopi tah tlâh chhao châ khao veih ei.

DÂNIAH 9:25

Chavâta he he pahno la, na novâh mawh sy. Zerusale padua pathi awpa nata sa pathi awpa ta bie a pua tawhta Mesia Bei â vyna taihta hâta ei sari a châ aw. Hâta ei sycharu nata ei no chhôh tlyliah nata khaohtlôzy taopathipa châ aw ta, châhrasala he chhôh he daihti rairuna a châ aw.

HABAKU 3:2

Hy Abeipa, na thâpha ama reipa thei na ta, Hy Abeipa, na hmotaopazy noâh ei tah ngaita. Keimo daihti liata pathieh heih la, Keimo chhâ liata pahnosa heih mah y! Pathiiana liata zawngiahna a thei tyh mah y!

ZEKARIA 12:8

Cha noh liata, Abeipa ta Zerusale liata a pahrâpazy pabohsa aw ta, ama hry liata chyhsa chiehlei chaipazy chhao, cha noh liata cha Dâvi hawhta châ aw ei ta, Dâvi pathlazy cha Khazohpa hawhta châ aw ei ta, ama hmia lâta a siepa Abeipa vâlyuhchâpa hawhta ama châ aw.

ZEKARIA 4:10

A nawraih kawpa ta pathao daihti a mohnao kawpazy khata, Zerubâbe ku liata thliena ri ama hmô tita la, amâ ly ngaita aw. Kha mokhaoh miasaripazy kha, alei chô zydua a hmô pahlie khaipa Abeipa mozy ama châ,” tah ta.

1 KAWRINI 1:27

Châhrasala Khazohpa ta asopazy maoh paphyuh nawpa ta, khizaw hmo hrupazy tlao a tlyh ta, thatlôpazy maoh paphyuh nawpa ta, chiehleipazy tlao â tlyh.