MIKÂ 7:2 - Mara Bible RV (BSI)

² Khazohpa chyhsa cha, Alei tawhta leidia ha ta; Chyhsapa hry liata Adopa rai y khao veih ei; Thisaih palo awpa ta a byhpa sai châ ei ta, Sao ta a unawhpa a chadipa sai ama châ.

MIKÂ 7:2 ပူးပေါင်းရင်းမြစ်များ

HLAZY 10:9

Chakeibarôhneipa hawhta chhohbuh hry liata a byupa ta a byh ta, Dyhchhiepazy patu awpa ta a byhpa ta, A sao liata a aopa dyhchhiepazy cha a patu lymâ ei.

HLAZY 12:1

Hy Abeipa, na bao mah y, Khazohpa a pachâpazy y khao leipa ei ta, Ngâchhihpazy cha chyhsa sawzy hry tawhta ama lei ha hih.

HLAZY 12:2

Chyhsa to ta ama vaihzy hnohta haipa bie reih ei ta, Reithai pakheina hmao ta reithaipa ta, Haidihaiduahna palôh ta bie ama reih tyh.

HLAZY 57:6

Ei sie nawpazy liata sao na parai khâh ei ta, Ei hro ta a ngiaroh ngaita. Ei lâpi liata khaohtlô na chao khâh ei ta, Âmo ta tlao ama tla tyh. Selah

BIESOZY 1:11

“Eima hnohta a vy la, Thisaih palo awpa ta a byh sih la, A chhâpa y leipa ta paraona a hnei leipazy a byh ei suh u.

BIESOZY 12:6

Moleipa biezy cha thisaih palo awpa ta a byh ta, Adopa pakah deikua cha âmo a pachha tyh.

ISAI 3:5

Chyhsazy amâ tlybai raihrie aw: Ama chyhsa châ lâhpazy tlybai aw ei ta, Ama vaihzy ama tlybai aw. Thyutliapa ta machâpa chô liata sâlâ kaw aw ta, Chyhsa nawhpa chhao zachhihpa chô liata a sâlâ kaw aw.

ISAI 57:1

Mosiapa leidia ta, A pachâ muaruapa y leipa ei ta; Khazohpa a pachâpazy lapa châ ei ta, A chhâpa a pahnopa y veih ei. Mosiapa cha chhiena a vaw tlô awpa tawhta lapa châ ta,

ISAI 59:7

Ama pheizy cha, Hmo pha leipa tao nawpa lâ a râ ta; Thaileina a hnei leipa thisaih palo awpa ta, Ama phei a chatlie kaw tyh. Ama pachânazy cha, Moleina hmo pachânazy châ ta; Ama lâlaizy liata Roryhrana nata paraona zy a y.

ISAI 9:19

Pheisaihzy Abeipa hiehâhna vâta, Râh cha kâ khai aw ta; Izarei phopi cha, Mei liata ti awpa thothu hawhta ama châ aw; A pachâ tlâ khao aw veih ei.

ZEREMIAH 16:16

“Moh teh u, nga patutuhpa hluhpi tuah aw na ta, âmo ta Izarei sawzy cha ama patu aw. Cha khai tawhta sakathaipa hluhpi tuah heih aw na ta, âmo ta tlâhpi to nata tlâhthlôh to liata Izarei sawzy cha tlua aw ei ta, lôpanô khaoh to liata ama tlua aw.

ZEREMIAH 5:16

“Ama châtai byh cha chhi a pahypa châ ta, Ama zydua ta pasaipha sai ama châ.

ZEREMIAH 5:26

Ei phopi hry liata moleipazy y ei ta, Pavaw a byhtuhpa hawhta, A bôhpa ta ama chadi tyh. Khoheih chôh ei ta, Chyhsazy ama pa-ao tyh.

ZEREMIAH 8:6

A phapa ta nathlie na ta, Ama biereipa ei thei; Biedopa reih leipa ei ta, Ahy hmahta, ‘Khâpa ma ei vaw tao ha tly?’ Tahpa ta ama paraona ro a chhuah veih ei. Chyhsa to ta âmo lâpi lâ sai a heih ei ta, Adyuhna su liata arâ a thluah ngâpa ama lyu.

CHAPHÔHTUNA 4:18

Chariahpazy ta eima hnie chathô ei ta, Chavâta eima khiliah liata chhao charei thei khao ma pi; Eima chhâna a hniapa ta eima nohzy reipati hapa châ ta, Eima chhâna a vaw tlô haw.

EZEKIA 22:12

Thisaih palo nawpa ta, panaopapana khihpi chhôh liata la ei ta, a pôhna nata â thôhna la chi ta, na vaihzy tlybaipa ta athôhna hmô chi ta, kei deikua cha eina my ha chi,” Abeipa Zehôvâh ta a tah.

EZEKIA 24:6

“Chavâta Abeipa Zehôvâh ta hetana heta a tah: Thisaih palo hmâhpa, beih upa khihpi, a upa pathai leipa khihpi cha a hu a po kaw dia! A tlyh hlei leipa ta, sa tlozy cha miakha miakha ta thaoh lymâ muh vy.

HÔSIA 5:1

Hy theihthaipazy saih u, He he thei teh u! Hy Izarei sawzy saih u, Nathlie teh u! Hy bei chhôhkhazy saih u, Nah pachôh teh u! Mizpâ châta khoheih châ ei chi ta, Tabaw liata sao nama paraipa vâta, Pachiana nama chô liata a vaw tlô.

HÔSIA 6:9

Hraotuhpazy ta chyhsa amâ byhpa hawhta, Theihthaipazy chhao ta ama tao hra; Sekhe lâpi liata chyhsa thie ei ta, Moleina pasichhih ngaitapazy ama tao.

MIKÂ 2:8

Châhrasala atlia tawhta cha, Ei phopi ta chariah hawhta thyu ei chi ta, Thlalôh kawpa ta châ chapiapazy cha, Ama chysia phapazy pahluhpa ei chi ta, Adyuhna lâ tawhta a vaw liepazy hawhta nama tao tyh.

MIKÂ 3:10

Thisaih ta Zaio padua ei chi ta, Moleina ta Zerusale a paduapazy saih u; He bie he thei teh u.

MIKÂ 3:2

Nâmo, hmo phapa a hao ei chi ta, Hmo chhiepa a pasôpazy; Nâmo, ei chyhsazy vo hlaih ei chi ta, Ama ruzy tawhta ama sa a kaopazy;

ZEKARIA 11:6

“Chavâta râh liata a pahrâpazy cha ngiachhie khao aw veih ei na,” Abeipa ta a tah. Chyhsa to a vaih ku liata nata ano bei ku liata ei pie aw. Râh parao khai aw ei ta, châhrasala râh cha ama ku tawhta pachha aw va na.

HMOTAOPAZY 24:9

Zuzy chhao ta, ama leihna cha â dopa tlai a châ tahpa a vaw pykhei ei ta.

1 SAMUELA 24:11

Ei pâ, moh tua, vaw moh tua rai, na poh pai chhao ei chaba thlâh ha hih. Na poh pai ei tai thei thlâh hapa ta, nâma ei cha thie leipa kha, ei ku liata paraona nata abei adyuhna rai y vei tahpa na hmô awpa nata na pahno awpa ei khopa vâta a châ. Ei hrona la a chhuahpa ta na tlua ngâ hra la, na chô liata molei va na.

1 SAMUELA 26:20

Chavâta ei thisaih cha Abeipa hmô leina alei liata tla khah sy. Chyhsa ta bykheihpa a byhpa ta, tlâh liata râh â khiepa hawhta ma, Izarei bei pi tlai ta ihlih miakha tluapa ta a vaw pua,” tah ta.