LUKA 7:38 - Mara Bible RV (BSI)

³⁸ Mothlih chhaota a hnôh lâta a phei thaby liata a duah ta, chanô mothlih ta Zisu phei cha padâ khai ha ta. A mothlih cha a sâ ta hru ta, Zisu phei cha a pahnâ ta, sathaw ropahâhpa ta a pheizy cha thu ta.

LUKA 7:38 ပူးပေါင်းရင်းမြစ်များ

ÂTHAONA 18:4

Ti chyhta cha vaw lapa aw ei na ta, nama pheizy a si u la, tho ry liana he a pahâ chy teh u.

EZRÂ 10:1

Ezrâ cha Khazohpa o hmiakô liata â khu lâta pao ta, chana chôta thlahchhâ ta, moleinazy palâhâh ta reihpha a chei hai nota, Izarei saw hluhpi, chapawzy, chanôzy nata hawtizy ano lâ a vaw hmaoh ei ta, aoh tlili ta cha ei ta.

HLAZY 38:18

Ei paraona palâhâh na ta, Ei moleina vâta pei ei tah ngaita.

HLAZY 51:17

Khazohpa khopa atheihnazy cha palôh keichheihpa châ ta, Hy Khazohpa, palôh keichheihpa nata ropa cha dytha aw va chi.

BIECHHOTUHPA 9:8

Na chysia khâ dieh sala, na luh liata sathaw hi beih khah sy.

HLAZY HLA 1:3

Na sathawzy chhao a roh a pahâh ngaita. Na moh cha sathaw ropahâhpa patlaipa hawhta châ ta, Chavâta laihsazy ta ama cha khoh ngaita.

ISAI 57:9

Sathaw chhaota abei lâ pangai chi ta, Na ropahâhpazy thata na papôh. Na lyuhchâpazy lâhlapi lâ tuah chi ta, Athihkhih lâ taihta na tuah ei.

ISAI 61:3

Zaio liata mâchhie a sapazy hnohta, Buchâh vyuhpa ta, Khutho pie awpa ta eina tuah; Mâchhiesana vyuhpa ta, Thaphana sa­thaw pie awpa ta tuah ta; Thachhâna thlahpa vyuhpa ta, Reithaina chysia pie awpa ta eina tuah. Abeipa lopa siana ôkâ thozy tahpa ta awpa châ aw ei ta, Abeipa cha palyupalihpa ta a y aw.

ZEREMIAH 31:9

Chana chôta ta a vy aw ei ta, Zawngiah awpa ta amâ hawna chôta Ei chhi pakhua aw ei. Izarei châta paw châ na ta, Epharai cha ei sawchapaw uhtheipa a châ; Chavâta vahtie ti lona kiahzy liata pasiesa aw ei na ta, Amâ chapia lei nawpa ta lâpi palâpa liata ei chhi aw ei.

ZÔELA 2:12

“Chatahrasala tahmâ tlai chhao he, Nama palôh tlokhuh ta kei lâ vaw kua teh u, Kâhvileipa ta y u la, Chana nata mâchhiesana chôta vaw kua teh u,” Abeipa ta a tah.

ZEKARIA 12:10

“Chatawhcha Dâvi pathlazy chô liata nata Zerusale liata a pahrâpazy chô liata ngiachhiena nata zawngiahna thlahpa ei hry aw. Chatanachata ama hriechheih hapa kei he na moh aw ei ta, sawchapaw matlupa mâchhie sapa hawhta keima châta mâchhiesa aw ei ta, sawchapaw uhtheipa pahleipa hawhta thata ama vâ â sâh aw.

MATHAI 5:4

“Pachârôhpazy ama nohlao na, thlapalôhpa ta ama y awpa vâta.

LUKA 22:62

Pua ta, aoh tlili ta cha ta.

LUKA 6:21

“Nâmo, tahmâ nota nodipazy saih u, nama nohlao na, nama rih a bie awpa vâta. “Nâmo, tahmâ nota a chapazy saih u, nama nohlao na, nama pahnei awpa vâta.

LUKA 7:37

Phârisaih o liata pati dôhpa ta â tyupa thâtih cha, cha khih liata chanô moleipa pakha ta a thei nahta, alabastâ sathaw ropahâhpa ôh a cheipa ta vawh ta.

LUKA 7:39

Cha hmo cha Zisu pati nie a hruatuhpa Phârisaih ta a hmô nahta, a palôh liata, “He chyhsa he hrohsopa a châ tlai khiahta cha, a hriatuhpa chanô he ahy ma a châ tahpa nata kheihawhpa chyhsa ma a châ tahpa a pahno thlyu awpa châ ta, ano he chanô moleipa châ tlôh ta,” tah ta.

ZAWHÂNA 11:2

Cha Mâri cha sathaw ropahâhpa Abeipa thu ta, a sâ ta a phei a hrutuhpa kha châ ta, tlâhleipa cha ano rilâhpa Lâzarâh a châ.

ZÂMIE 4:9

Pachârôhpa ta y u la, mâchhiesa u la, cha teh u. Nama pahneina cha mâchhiesana lâta a lie sala, namâ lyna chhao hnabeidyna lâta a lie mawh sy.