LUKA 14:15 - Mara Bible RV (BSI)

¹⁵ Tlâhkhai liata pati a dôhlâhpa pakha ta cha biezy cha a thei nahta, a hnohta, “Khazohpa khinarâh liata pati a nie awpa cha a nohlao kaw dia!” tah ta.

LUKA 14:15 ပူးပေါင်းရင်းမြစ်များ

MATHAI 25:10

Chalei awpa ta ama vawh chhôh ta myuhneituhpa cha vaw tlô ha ta, a mâ chiehpazy cha ano nata kialao nie awpa ta a ngia ei ta, ochhi khaw ha ei ta.

MATHAI 8:11

Ei cha chho ei, nochhi notla tawhta chyhsa hluhpi a vy aw ei ta, Abarahâ, Aisika nata Zakaw zy hnohta vârâh khinarâh liata amâ tyuh aw.

LUKA 12:37

Ama zibeipa â vy tita, ano hâpa ta a vaw hra thlâh hapa chakaotuhpazy cha ama nohlao na! Hmeiseihta ta ei cha chho ei, ama zibeipa cha chakaona chysia a tobipa ta, chakaotuhpazy cha tlâhkhai liata pati padôhsa aw ta, a vy aw ta, âmo cha a chakao aw ei.

LUKA 13:29

Nochhi nata notla, maw nata chho tawhta chyhsa a vy aw ei ta, Khazohpa khinarâh kyhchhi tlâhkhai ama vaw dôh aw.

LUKA 22:16

Ei cha chho ei, Khazohpa khinarâh liata a hmeiseihpa ta â ki hlâlei cha, he pati he nie heih khao aw va na,” tah ta.

LUKA 22:30

Chatanachata ei khinarâh liata ei tlâhkhai liata niepa ta doh hra aw ei chi ta, beidyuchhai liata a tyuhpa ta Izarei pho hrawh hleinozy chô liata ryu nama reih aw.

BIEPHUAH 19:9

Vâlyuhchâpa chata ei hnohta, “Mietakutaw myuh hneina kyhchhi liata hruapazy cha ama nohlao na, tahpa ta roh teh,” na tah ta. Chatawhcha ei hnohta, “Hezy he Khazohpa biehmeiseihpazy a châ,” tahpa ta na chho ta.