ISAI 9:18 - Mara Bible RV (BSI)

¹⁸ Paraona cha mei hawhta kâ ta, Diahsai nata ahlohzy cha ama tlôna taihta a kâ aw. Râhmâhpa chha kaluhpazy kâ aw ta, Meikhuh tôh a charihpa ta avâ lâ a kiah aw.

ISAI 9:18 ပူးပေါင်းရင်းမြစ်များ

1 ABEIZY 16:21

Izarei phopi cha py no ta a vaw pachhaih ha ta. Â khophie ta Kinâ sawchapawpa Tibani cha bei ta tao a chhuahpa ta pazi ei ta, â khophie ta Ômri pazi ei ta.

HLAZY 37:20

Moleipazy deikua cha leidia aw ei ta, Abeipa chariahpazy chhao sibiepa hawh dei ama châ aw; Leidia aw ei ta, Meikhuh hawhta ama pai aw.

HLAZY 68:2

Meikhuh phaoh pathlahpa ta a ypa hawhta, Âmo cha papua aw chi ta; Mei liata kheilôh a zaopa hawhta, Moleipazy cha Khazohpa hmia­kô liata ama leidia aw.

HLAZY 83:14

Mei ta râhmâhpa a kâpa hawhta, Meipaleih ta tlâhpizy a charôhpa hawhta,

ISAI 1:31

Thatlôpa cha meibu hawhta châ aw ta, A raihria meihlih hawhta a châ aw; A miano ta kâ khoh aw ta, A pachhai awpa y aw veih ei.

ISAI 1:7

Nama râh roryhrapa ta y ta, Nama khihpizy mei ta kâ ta; Nama mohmô lia tlai ta, Chihropazy ta nama râh ama palâ khai haw. Chihropazy ta râh parao khai ha ei ta, Roryhrapa ta a y.

ISAI 26:11

Hy Abeipa, na ku hy chi ta, Châhrasala hmô veih ei. Na phopi tha na pasana he hmô ei sala, Nozapa ta y mawh ei sy. Na chariahpazy châta mei nâ sopa ta Âmo cha kâ patlô khai mawh ei sy.

ISAI 27:4

Ei hiehâh khao vei. Ahloh nata diahsai zy a hrâh hra ei sala, Âmo cha siehnao aw ei na ta, Mei ta ei tô khai aw ei.

ISAI 3:5

Chyhsazy amâ tlybai raihrie aw: Ama chyhsa châ lâhpazy tlybai aw ei ta, Ama vaihzy ama tlybai aw. Thyutliapa ta machâpa chô liata sâlâ kaw aw ta, Chyhsa nawhpa chhao zachhihpa chô liata a sâlâ kaw aw.

ISAI 30:30

Chatawhcha hiehâhna ru ngaitapa nata meipaleih a kâ ngâpa hry liata nata, thlihpi nata vâsua nata pareih hry liata, Abeipa ta a ao rônahpa cha thei thei awpa ta papua aw ta, a ku pathlapa cha hmô thei awpa ta a tao aw.

ISAI 30:33

Hlâno tawhta mei raona su a chhuanoh hapa a châ. Abei châta chhao a chhuahdy hapa châ ta, tho ti nawpa â thu ngaitapa nata a kawh ngaitapa ta taopa châ ta, mei nata tho hluhpi pahmaohpa a châ. Cha cha kaih vahtiepa hawhta a lohpa Abeipa hu ta a pakâsa.

ISAI 33:12

Chinaih lô raopa hawhta, Phopizy cha mei ta raopa châ aw ei ta; Ahlohzy chhawh ta mei ta raopa hawhta, Âmo chhao taopa ama châ aw.

ISAI 33:14

Zaio liata moleipazy cha chipa ta y ei ta, Khazohpa a pachâ leipazy amâ chalyu; “Eima hry liata ahy ma Mei kâ haipa hnohta a pahrâ thei aw? Eima hry liata ahy ma Tlyzaw ta a kâpa hnohta a pahrâ thei aw?” ama tah.

ISAI 5:24

Chavâta mei ta sâhkô chuahmi charôh ta, Meipaleih vâta sibie raohpa â chahkaopa hawhta, Ama thari hmy aw ta, Ama paw chhao doh hawhta â zaw aw; Pheisaihzy Abeipa ryhpa dytha ei ta, Izarei Mo Pathaihpa bie ama mohnaopa vâta.

ISAI 50:11

Nâmo, mei patih ei chi ta, Meirei iapa ta â chadôsapazy saih u, Nama mei khaihna liata charei u la, Meirei nama chhipa khaihna liata charei muh vy! He he ei ku tawhta nama hmô awpa cha a châ: Riethei pasataopa ta namâ zia aw.

ZEREMIAH 9:3

“Ama paleih libaw hawhta pako ei ta, Biedopa hlâta haipa bie râh liata tlao a laiseih via. Moleina tawhta molei viana lâ tôh lymâ ei ta, Kei na pahno veih ei,” Abeipa ta a tah.

HÔSIA 13:3

Chavâta mydi ameih hawhta châ aw ei ta, My diati thlai ta a paipa hawhta ama châ aw. Sawhri tawhta sâh sihpa zie pathlahpa hawhta châ aw ei ta, Opy tawhta meikhuh a puapa hawhta ama châ aw.

ZÔELA 2:20

“Maw lâ tawhta â zupa cha, Nâmo tawhta lâhlapi lâta ei papai ha aw; Râh chawhkaraipa lâ to aw na ta, Roryhrapa râh lâ ei to ha aw. Hmia a sahpa cha, Nochhi tilaipi lâta to aw na ta; Hnôh a khawpa cha, Notla tilaipi lâta ei to aw. Abeipa ta hmo rônahpazy a tao awpa vâta, A thu roh pua aw ta, A roh chhiepa thata a pua aw.

ZÔELA 2:3

Mei ta ama hmia lâta palâ laih ta, Meipaleih ta ama hnôh lâta a kâ laih. Ama hmia lâta râh cha, Idâh sadô lyu ta; Ama hnôh lâta râh deikua cha, Râhchawhpa roryhrapa hawhta a châ; Âmo tawhta a boh theipa y vei.

AMÔSÂ 7:4

Abeipa Zehôvâh ta hetana heta na pahmôsa heih ta: Pachâ tua u, Abeipa Zehôvâh ta mei ta pachiana aw ta, mei chata ti athupa lai ngaitapa cha palâ khai ha ta, alei chhao nie lymâ ta.

ÔBADIA 1:18

Zakaw pathlazy cha, Mei châ aw ei ta; Zawsi pathlazy chhao, Meipaleih ama châ aw; Esaw pathlazy cha, Sawphao châ aw ei ta; Mei ta rao aw ei ta, Ama pakâ khai aw; Esaw pathlazy cha, Ahrohpa rai y aw veih ei,” Abeipa ta a tah.

NÂHU 1:10

Ahloh buh a chaviapa hawhta châ ei ta, Sahma doh ta a paripa ama lyu; Sâhkô raohpa hawhta pakâ khaipa ama châ.

NÂHU 1:6

A ruchhôna ahy ma a dao thei aw? A hiehâhna rupa ahy ma a tao thei aw? A pathiiana cha mei hawhta patlaipa châ ta, Lôpanôzy a patlaw khai haw.

MALAKHAI 4:1

“Moh teh u, noh cha a vaw tlô hai; patina mei hawhta a kâ aw. Apalaipazy nata moleina a taopazy cha sawphao châ aw ei ta, cha noh a vaw tlô haipa chata kâ aw ei ta, buchâh lâta a palie ha aw ei; a thari nata a chiah miakha dâhdei chhao pahlôhpa châ aw vei,” Pheisaihzy Abeipa ta a tah.

MATHAI 25:41

“Cha khai tawhta a chavei lâta a ypazy hnohta, ‘Chhiesapa ta a ypa saih u, ahripa nata a lyuhchâpazy châta a chhuahdypa chhâzaw mei lâ na siesai teh u.

RYHPACHANEINA 32:22

Ei hiehâhna ta mei papua ta, Athihkhih a thu chaipazy lâ taih kâ laih ta, Alei nata a kôveizy kâ khai ta, Tlâhpizy abôna chhao a kâ khai haw.

HEBRAI 6:8

Chhaohlei ta ahloh nata bôbawzy a papua khiahta deikua cha, hnypa ta y ta, chhiesa thlupa châ ta, a chhâ nawpa cha mei ta rao awpa a châ.

BIEPHUAH 14:11

Cha chyhsazy pasataona meikhuh cha chhâzaw nata tlyzaw ta pua aw ta, sahrâhpa nata a nothlahpa achhytuhpazy nata a moh ngiana a hneipa maihzy cha, chhô nah zâ ta apahâna rai hnei aw veih ei,” tah ta.