ISAI 9:12 - Mara Bible RV (BSI)

¹² Nochhi lâta Aramia mo ama pakah â aw ei ta, Notla lâta Philistinâ mo chhao ama pakah â hra aw ei ta, Izarei cha ama palâ khai aw. Cha zydua cha a tao hapa chhao ta, A hiehâhna pai to leipa ta, A ku a hy ngâ thlâh ha chy.

ISAI 9:12 ပူးပေါင်းရင်းမြစ်များ

2 ABEIZY 16:6

Cha daihti liata, Aramia bei Rezi ta Elâ khihpi cha Aramia râh châta la heih ta. Zu chyhsazy cha Elâ khihpi tawhta papua ta, Edômâ mo a vy ei ta, tanoh taihta Elâ khihpi liata ama pahrâ haw.

2 THÂTIHZYRONA 28:18

Philistinâ mo chhao ta Sephelâ nata Zudâh Neke râhzy vaw chho ei ta, Beseme, Aizalô, Kederaw, Sôkô nata a khichapeihzy, Timnah nata a khichapeihzy, Kimzô nata a khichapeihzy la ei ta, cha suzy liata ama pahrâ haw.

HLAZY 79:7

Zakaw palâ ha ei ta, A pahrâna roryhrapa ta ama tao haw.

ISAI 10:4

Atâhpazy hry liata a chakuhpazy tah leipa ta cha, Ahy hmahta pahlôhpa châ leipa aw ei ta, Thiepazy hry liata a paopazy tah leipa ta cha, Ahy hmahta pahlôhpa châ aw veih ei. Cha zydua cha a tao hapa chhao ta, A hiehâhna pai to leipa ta, A ku a hy ngâ thlâh ha chy.

ISAI 11:14

Epharai nata Zudâh cha, Notla lâta Philistinâ mo ngiatlâh liata a zâ zaw aw ei ta; Hmaohkha ta nochhi sawzy ama hrao aw. Edômâ nata Môabâ chô liata ama ku hy aw ei ta, Amawri mo ta ama rei amâ ngiah aw.

ISAI 31:1

Baona hia awpa ta Izi râh lâ zu ta, Arâzy liata a pahniehpazy cha, Ama hu a po na! Izarei Mo Pathaihpa lâ moh leipa ei ta, Abeipa a saohiah hra veih ei; Talailih hluhpi hneina liata ama ngâna tlao pahnieh ei ta, Arâ pheisaih thatlôpazy liata tlao amâ pahnieh.

ISAI 5:25

Chavâta Abeipa pathi cha a phopi chô liata ia ta, Ama chô liata a ku hy ta a tu ha ei. Tlâhpizy a chalyu ta, Ama rizy cha hnaihny hawhta Lâlaizy liata amâ thy hôlô. Cha zydua cha a tao hapa chhao ta, A hiehâhna pai to leipa ta, A ku a hy ngâ thlâh ha chy.

ISAI 9:17

Chavâta Abeipa cha ama satliazy chô liata a ly leipa aw ta, Ama harapazy nata nôhmeizy chhao ngiachhie hra aw vei. Chyhsa to Khazohpa a pachâ leipa nata moleipa sai châ ei ta, Pakah to hruna bie a reihpa sai ama châ. Cha zydua cha a tao hapa chhao ta, A hiehâhna pai to leipa ta, A ku a hy ngâ thlâh ha chy.

ISAI 9:21

Manase ta Epharai nie aw ta, Epharai ta Manase a nie aw; Ama pano ta Zudâh amâ dyuh khoh aw. Cha zydua cha a tao hapa chhao ta, A hiehâhna pai to leipa ta, A ku a hy ngâ thlâh ha chy.

ZEREMIAH 10:25

Châ pahno leipa râhzy chô liata na hiehâhna lei thlu la, Na mo a pado leipa phopizy chô liata chhao lei thlu mah y. Zakaw cha palâpa ta nie khai ha ei ta, A pahrâna râh roryhrapa ta ama tao ha hih.

ZEREMIAH 15:7

Râh thokhy chhikaozy liata, Âmo cha ziena ta zie ei na ta; Saw luh pahleipa ta ei tao ha ei. Ama hroziezy ama pathleih leipa vâta, Ei phopi cha ei pahleipadia haw.

ZEREMIAH 35:11

Châhrasala Babylaw bei Nebukaneza ta râh a kaw siehnao tita deikua cha, ‘A vy teh u, Kaldia pheisaihzy nata Aramia pheisaihzy riahchipa vâta Zerusale lâ sie ei suh u,’ tah pi ta. Chavâta Zerusale liata a pahrâpa eima châ,” tah ei ta.

ZEREMIAH 4:8

Abeipa hiehâhna ru ngaitapa cha, Keimo tawhta pakuasapa a châ leipa vâta, Latho poh a bu u la, Mâchhiesapa ta cha muh vy.”

EZEKIA 16:27

Chavâta pachâ teh, na chô liata ei ku hypa ta, na tovyuh pachyh na ta, na chariahpazy khohlei khona lâ ei cha hlâ haw. Na sihryhna hro a zakhei kaw tyhpa Philistinâ sawchanôzy ku lia tlai ta ei cha hlâ haw.

EZEKIA 6:14

Ama chô liata ei ku pazawh aw na ta, ama pahrâna su zydua, râhchawhpa tawhta Riblâ taihta, râh cha roryhrapa nata arypa ta ei tao aw. Chatanachata kei he Abeipa ei châ tahpa ama pahno aw.”

HÔSIA 7:10

Izarei apalaina ta ano cha hmiadaisâ ta leih ta, Chatanachôta Abeipa ama Khazohpa lâ kua leipa ei ta, Cha zydua vâta ano cha tlua hlei veih ei.

AMÔSÂ 4:10

“Izi râh liata ei taopa hawhna khata, Nama hry liata hri vaw tuah na ta; Nama satliazy zaozi ta thie ei na ta, Nama arâzy ei siekhei ha ei; Nama hnapasu a chahu awpa taihta, Nama riehmo cha thu roh ta ei pabie; Chatanachôta kei lâ vaw kua veih ei chi,” Abeipa ta a tah.

AMÔSÂ 4:11

“Sawdawmâ nata Kawmawrâ khihpizy Khazohpa ta a paraopa hawhta, Nama hry liata thokha cha parao ei na ta, Mei tawhta thothu a daopa hawhta nama vaw châ haw; Chatanachôta kei lâ vaw kua veih ei chi,” Abeipa ta a tah.

AMÔSÂ 4:6

“Nama khihpi zydua liata, Hâh pathaihna cha pie ei na ta; Nama yna su maihta, Viahchhâ phahlana ei cha pie ei; Chatanachôta kei lâ vaw kua veih ei chi,” Abeipa ta a tah.

AMÔSÂ 4:8

Chavâta khihpi miano miathôh ta Ti do awpa tluapa ta, Khihpi miakha lâ sie ei ta, Châhrasala ama lôhrâ tlô hlei vei; Chatanachôta kei lâ vaw kua veih ei chi,” Abeipa ta a tah.

AMÔSÂ 4:9

“Raohna nata maohna ta cha tu ei na ta, Nama sadôzy chângyu ta nie ta, Nama kre sadôzy chângyu ta a nie khai haw; Nama theiku kôzy chângyu ta nie ta, Nama ôli thozy chângyu ta a nie khai haw, Chatanachôta kei lâ vaw kua veih ei chi,” Abeipa ta a tah.

ZEPHANIA 1:6

Abeipa pazi ha tlôh ta a kuasai heihpazy Chhawh pathlah aw ei na ta, Abeipa tlua leipa ta, ano a saohiah leipa maih cha, He su tawhta ei chhawh pathlah khai aw ei,” Abeipa ta a tah.

ZEPHANIA 3:2

Rei a ngiah leipa ta, Chhoreina chhao a pyh khoh vei. Abeipa ngâ leipa ta, A Khazohpa a hnia hra vei.

RYHPACHANEINA 31:17

Cha noh ta ama chô liata ei pathi ia aw ta, ei pathlua aw ei. Âmo tawhta ei hmia nyu aw na ta, pahleipadiapa ama châ aw. Hmo pha leipa nata nôpona hluhpi ama chô liata tlô aw ta, cha noh ta, ‘Eima Khazohpa eima hnohta a y leipa vâta, he hmo pha leipa he eima chô liata a vaw tlôpa châ vei ma?’ ama tah aw.