ISAI 49:7 - Mara Bible RV (BSI)

⁷ Mohnao ngaitapa nata Babylaw râh ta a pasi kawpa, Ryureituhpazy chakaotuhpa Izarei phopi hnohta, Abeipa, Izarei Chatlaituhpa ta hetana heta tah ta, Izarei Mo Pathaihpa ta hetana heta a tah: “Abeipa ngâchhihpa vâta, Châ tlyhtuhpa Izarei Mo Pathaihpa vâta, Beizy ta a cha hmô ti ei ta a duah aw ei ta, Beimachâzy na hmiakô liata amâ bôh aw.”

ISAI 49:7 ပူးပေါင်းရင်းမြစ်များ

ÂTHAONA 27:29

Phopizy ta cha chakao ei sala, Râhzy ta châ naoh mawh ei sy! Na unawhzy chô liata bei ta y la, Na nô sawzy ta châ naoh mawh ei sy! Chhie châ sapatuhpa maih, Chhiesapa ta y ei sala; Byhnâ châ awpatuhpa maih, Byhnâ topa ta y mawh ei sy!” tah ta.

HLAZY 47:9

Phopizy tawhta beizy a hmaoh ei ta, Abarahâ Khazohpa phopi chhao amâ hmaoh. Khizaw vyhphaozy he Khazohpa eih châ ta, Ano cha thata cheihchalopa a châ.

HLAZY 68:31

Izi râh tawhta lyuhchâpazy a khy aw ei ta, Kusi ta Khazohpa lâ a ku thlai a pazawh aw.

HLAZY 69:19

Reipachhiena ei tyhpazy pahno chi ta, Ei nozana nata ei nohzaona zy na pahno; Ei khakhaipazy chhao na pahno khai.

ISAI 14:1

Abeipa ta Zakaw ngiachhiepa ta, Izarei a tlyh heih aw ta, ama râh tlai liata a paysa heih aw ei. Chihropazy ta âmo cha a bai aw ei ta, Zakaw pathlazy cha amâ pazao aw.

ISAI 19:21

Cha noh liata, Abeipa ta Izi mo cha a pahnosa aw ta, Izi mo ta Abeipa cha ama pahno aw. Atheihna nata hmohlâpa ta Abeipa cha a chhypa ta, Abeipa liata bie a taih aw ei ta, ama bietaizy ama patlô aw.

ISAI 19:23

Cha noh liata, Izi râh tawhta Asuria taihta lâlai y aw ta, Asuria mo ta Izi râh lâ zu aw ei ta, Izi mo chhao ta Asuria râh lâ khy aw ei ta, Izi mo cha Asuria mo nata hmaohkha ta Abeipa ama chakao aw.

ISAI 27:13

Cha noh liata, chiahmie lai ngaitapa tôpa châ aw ta, Asuria râh liata a leipazy nata Izi râh lâta papuapazy a vy aw ei ta, Zerusale liata tlâh pathaihpa liata Abeipa amâ chhy aw.

ISAI 42:1

Nâ chakaotuhpa nata ei duakheipa he moh u la, Ei tlyhpa nata ei hro ta â ly ngaitapa he moh teh u. A chô liata ei Thlahpa soh na ta, Râhzy liata adona a tlôkhei aw.

ISAI 48:17

Abeipa ta hetana heta reih ta, Nâmo châ Chatlaituhpa, Izarei Mo Pathaihpa ta hetana heta a tah: “Kei he Abeipa na Khazohpa châ na ta, Na pha nawpa ta cha pachu na ta, Na sie nawpa lâpi liata châ chhihthatuhpa ei châ.

ISAI 48:7

Hlâno ta taopazy châ leipa ei ta, Tahmâ ta taopazy ama châ. Tanoh a vaw chhi hlâ heta la, Chazy cha thei beih veih ei chi. Chataleipatala, ‘Moh teh u, chazy cha ei pahno mâh tâh,’ Nama tah pathlei aw na.

ISAI 49:1

Hy tilaipi kiah râhzy saih u, Na nathlie u la; Nâmo, lâhlapi liata phopizy saih u, Nama nah pachôh teh u. Abeipa ta chhi tawhta na aw ta, Ei nô py chhôh tawhta ei moh eina bi.

ISAI 49:23

Beizy cha châ mohôhtuhpa na pawzy châ aw ei ta, Beinôzy chhao sâhpi ta châ chhytuhpa na nôzy ama châ aw. Ama hmia alei lâ a khupa ta, Na hmiakô liata a bôh aw ei ta; Na phei dohlei ama cha paliepa aw. Chatanachata kei he Abeipa ei châ tahpa pahno aw chi ta, Keima nâ hâtuhpazy cha ama hnabeidy aw vei.”

ISAI 49:26

Châ tlybaituhpazy cha âmo sa paniesa aw ei na ta, Kresawhti thlôhpa paripa hawhta âmo thisaih ama pari aw. Chatanachata chyhsa zydua ta, Kei, Abeipa he châ Pachhatuhpa châ na ta, Châ Chatlaituhpa, Zakaw Mo Pathaihpa ei châ tahpa ama pahno aw.”

ISAI 50:6

Ei ky he nâ tutuhpazy châta dao na ta, Ei baih he ei baihhmi nâ phiatuhpazy châta ei dao tyh. Ei hmia he nohzaona tawhta nyu leipa na ta, Pachih pachhaona tawhta nyu hra va na.

ISAI 52:15

Râh hluhpizy cha, A thisaih thiapa ta pathaisa aw ta; Ano vâta beizy hmaomopa ta ama y aw. Rei beih leipa hmozy hmô aw ei ta, Thei beih leipa hmozy ama pahno thai aw.

ISAI 53:3

Ano cha chyhsazy ta mohnaopa ta dytha ei ta, Pachârôhnazy a hneipa chyhsa châ ta, Pachâchhienazy a pahnopa a châ. Chyhsazy ta ama hmia ama nyusaipa chyhsa hawhta, Mohnaopa ta y ta; Keimo chhao ta, Ano cha pasâhsa hlei hra ma pi.

ISAI 60:10

Chihropazy ta na thokhyzy paduapathi aw ei ta, Ama beizy ta ama cha chakao aw. Ei hiehâhpa ta cha tu ei na ta, Châhrasala ei khokheina ta ei cha ngiachhie heih ei.

ISAI 60:16

Phopizy sâhpiti pazy aw chi ta, Beizy sâhpi nâ ngieh aw. Chatanachata kei he Abeipa châ na ta, Châ Pachhatuhpa ei châpa na pahno aw; Châ Chatlaituhpa châ na ta, Zakaw Thatlôpa ei châpa na pahno aw.

ISAI 60:3

Phopizy na khaihna lâ a vy aw ei ta, Beizy na nohchhi khaihpa lâ amâ vy aw.

ISAI 66:23

“Ei hmiakô liata nâ chhy awpa ta, Thla thiehpa maihta chyhsa zydua a vy aw ei ta, Pahânoh maihta amâ vy aw,” Abeipa ta a tah.

ZEKARIA 11:8

Châhrasala thla kha chhôh ta vaituhpa pathôh ei pabâh ha ei. Ama chô liata ei palôh chhâ kaw ta, âmo chhao ta eina ai kaw hra ei.

MATHAI 20:28

Chyhsa Sawchapawpa tlai chhao he, chyhsa ta ama chakaopa châ awpa ta a zupa châ leipa ta, chakaotuhpa châ awpa nata chyhsa hluhpi chatlai nawpa ta a hrona pie awpa ta a zupa a châ,” tah ta.

MATHAI 26:67

A hmia liata ama pachih ta pachhao ei ta, tu ei ta, thokha ta chabaih ei ta,

LUKA 22:27

Ahy a rônah via, tlâhkhai liata pati a dôhpa ma, a chakaopa maw? Tlâhkhai liata pati a dôhpa châ vei ma? Kei deikua cha nama hry liata chakaotuhpa hawhta ei y hih.

LUKA 23:18

Châhrasala â raoh ngaitapa ta awh ei ta. “Kha chyhsa kha pahleipadia la, Bârabâ kha miah papuapa teh,” tah ei ta.

LUKA 23:23

Châhrasala khaipâ awpa ta ao paro ngaitapa ta khâchâ a haw ei ta. Ama ao ta Pilâ cha pahnie ha ta.

LUKA 23:35

Zawpizy a kiapâh liata a duah ei ta, sai thlâh ha ei ta. Ryureituhpazy deikua ta pasipasawh ei ta, “Mohropazy a pachha tyh mâh tâh. Khazohpa Atlyhpa Mesia a châ tlai khiahta cha, anosasyh a pachha bao sa!” tah ei ta.

ZAWHÂNA 18:40

Châhrasala ao paro ngaitapa ta awh heih ei ta, “Kha chyhsa kha papua leipa la, Bârabâ kha papua teh!” tah ei ta. Bârabâ cha hraotuhpa a châ.

ZAWHÂNA 19:15

Âmo ta, “Pahleipadia teh, pahleipadia teh, khaipâ teh!” tahpa ta awh ei ta. Pilâ ta ama hnohta, “Nama Beipa he ei khaipâ aw ma?” tah ta. Theihthai beizy ta a chhy ei ta, “Kaisarâ leipa ta bei hropa hnei ma pi,” tah ei ta.

ZAWHÂNA 19:6

Theihthai beizy nata hyutuhpazy ta Zisu ama hmôpa nahta, “Khaipâ teh, Khaipâ teh!” tahpa ta awh ei ta. Pilâ ta ama hnohta, “Nâmo ta a chhi u la, khaipâ teh u, kei la thailei a châna khâpa hmah hmô va na,” tah ta.

1 KAWRINI 1:9

A Sawchapawpa eima Beipa Zisu Krista akaona liata nâmo châ awtuhpa Khazohpa cha ngâchhihpa a châ.

RYHPACHANEINA 7:9

Chavâta Abeipa nama Khazohpa cha Khazohpa a châ tahpa pahno teh u. Ano cha Khazohpa ngâchhihpa châ ta, ano kyhpachâ ta a biepiepa a zyhtuhpazy chô liata a biehrai nata a zawngiahna chhâ sâh kha taihta a paysapa a châ.

1 PITY 2:4

Ano cha chyhsazy kho leipa châ ta, Khazohpa mohmô liata deikua cha, atlyhpa nata sôh ngaitapa alô hrohpa a châ. Abeipa nama pangai hapa vâta,

BIEPHUAH 11:15

Chatawhcha vâlyuhchâpa pasarina ta a chiahmie tô ta, “Khizaw khinarâh cha eima Beipa nata a Krista khinarâh a vaw châ haw. Ano ta chhâzaw nata tlyzaw ta ryu a reih aw,” tahpa ta ao paro ngaitapazy avâ liata vaw y ta.

BIEPHUAH 3:7

“Philadelphia Awnanopa vâlyuhchâpa hnohta hetana heta roh teh: ‘Mopathaihpa, a hmeiseihpa, Dâvi châhbi hnei ta, ahy hmahta khaw thei lei awpa ta a pahytuhpa, ahy hmahta pahy thei lei awpa ta a khawtuhpa ta he biezy he a reih.