ISAI 44:17 - Mara Bible RV (BSI)

¹⁷ Tho laibâhpazy hmâpa ta khazoh tao ta, Ano châta khazoh nothlahpa â tao; Nothlahpa hmiakô liana cha a bôh ta, Nothlahpa cha â chhy tyh. Nothlahpa lâ cha thlahchhâ ta, “Ei khazoh na châ hih, Na pachha teh,” a tah tyh.

ISAI 44:17 ပူးပေါင်းရင်းမြစ်များ

1 ABEIZY 18:26

Viahchao tôhpa âmo ama piepa cha la ei ta, a chhuanoh ei ta, “Hy Bâlâ y, miah a chhy teh,” tahpa ta my tawhta nohchhô taihta Bâlâ moh cha pado ei ta. Châhrasala ao pyury rai y leipa ta, a chhytuhpa rai y veih ei. Chatawhcha maisâh ama taopa cha lâ chahlô ei ta.

1 ABEIZY 18:28

Ao paro ngaitapa ta awh ei ta, ama taozietyhpa hawhta, zaozi nata asei ta thi lo ngâna taihta a âpa ta a dy ei ta.

ISAI 2:8

Ama râh cha khazoh nothlahpazy ta bie ta, Ama ku ta ama taopazy hmia liata a bôh ei ta, Âmo kuparo ta a taopazy hmia liata amâ bôh tyh.

ISAI 37:38

Noh kha cha a khazoh Nisrô o liata khazoh â chhy hai nota, a sawchapawpa Adarâmele nata Sareze ta zaozi ta chhawhsao ei ta, Ararâ lâ ama râ hapa vâta, a sawchapaw hropa Esâhadô ta ano su liata â bei haw.

ISAI 44:15

Chatanachata cha thozy cha, Chyhsa châta meithu a vaw châ tyh. Zôthaipa ta tho cha patlaw ta, Thokha mei liata tipa ta a aih ta; Thokha cha viahchhâ tao nawpa ta Mei patina châta a hmâh tyh. Cha tho tawh pyly ta, Khazoh taopa ta a chhy ta; Khazoh nothlahpa tao ta, A hmiakô liata â bôh tyh.

ISAI 44:16

Tho khophie mei liata ti ta, Tho khophie cha sa niena châta a hmâh tyh; Cha liata sazy rao ta, Lôhrâtlôpa ta a y tyh. Mei a aih nawpa châta chhao hmâh ta, “Âh, a lalôh dâh cha, Mei a pha dâh cha!” a tah tyh.

ISAI 45:20

“A pahmaohpa ta a vy u la, Nâmo, phopi laibâhpazy saih u, Hmaohkha ta a vaw hnia teh u! Ama tho khazoh nothlahpa a phaoh laihpa phopizy ta Pahnona rai hnei leipa ei ta, A pachha thei leipa khazoh lâ thlah khâ ama chhâ tyh.

ISAI 46:6

Sahria tawhta ngôh bôpa ta, Khopathliahna ta tâkâ pathliah ei ta, Ngôh daihtuhpa pahriahlaosapa ta, Ngôh nata tâkâ hmâpa ta khazoh pataosa ei ta, A bôh ei ta amâ chhy.

ZEREMIAH 2:27

Âmo cha tho hnohta, ‘Ei paw na châ,’ a tahpazy châ ei ta, Alô hnohta, ‘Nâ satuhpa na châ,’ a tahpazy ama châ. Hmia na chhy leipa ei ta, Ama hnôh tlao eina chhy ha ei. Ama nôpona daihti a vaw tlô nahta deikua cha, ‘Thyu la, miah pachha teh!’ ama tah tyh.

DÂNIAH 3:17

Patina meihô liata thypa eima châpa chhao ta, eima chakaopa eima Khazohpa ta patina meihô ru ngaitapa tawhta miah pachha thei ta, Hy abei y, nâma ku tawhta chhao miah a pachha thei.

DÂNIAH 3:29

Chavâta he biepiepa he ei tao: Phopi nata râh nata reih kheihawhpa hmahta, Sâdarâka, Mesâka nata Abenekô zy Khazohpa chô liata bie pha leipa kheihawhpa rai a reihpa maih cha, a tlawpoh ta pachhaih khaipa châ aw ei ta, ama ozy cha hnaihny thyna ta taopa a châ aw; he hawhta a pachha theipa khazoh hropa rai y veih ei,” tahpa ta.

DÂNIAH 6:16

Chatawhcha abei ta biepie ta, Dâniah cha a vaw chhi ei ta, chakeibarôhneipa lôpu liana cha thy ei ta. Abei ta Dâniah hnohta, “Na chakao tyhpa na Khazohpa ta a cha pachha aw,” tah ta.

DÂNIAH 6:27

Pachhapa ta, pabohsa ta, Lei nata vâ liata ngiana nata noâhpazy a tao; Chakeibarôhneipa thatlôna tawhta Dâniah a pachhatuhpa a châ,” tah ta.

HÔSIA 13:2

Tahmâ chhao molei via rili ei ta, Ama tâkâ ta leihpa nothlahpazy amâ tao; Cha zydua cha âmo pachâpalipa ta Zôthaipazy taopa sai a châ. Chavâta âmo kyh liata, “Atheihna a hlâpazy ta Viahchaotaw amâ pahnâ,” Ama tah tyh.

MIKÂ 5:12

Dyuthaipazy na ku tawhta chhawh pathlah aw na ta, Kulâ moh thaipazy hnei khao aw va chi.

HABAKU 2:19

Thotô hnohta, ‘Thyu teh’ tah ta, Hrona hnei leipa lôtô hnohta, ‘A hra teh,’ A tahtuhpa cha a hu a po na! Cha chata a chhihtha thei aw ma? Moh tua, ngôh nata tâkâ ta pahupa châ ta, Ano liata husona rai hnei vei.

HMOTAOPAZY 19:27

Eima rai a chhâ aw tahpa chi â chhihpa dei châ leipa ta, khazohnô rônah ngaitapa Artemi achhyna o chhao he a vaw nawraih ha aw. Asia nata khizaw zydua ta amâ chhypa khazohnô he, a rônahna thypa a châ pathlei aw tahpa chhao chi â chhih ngaita,” tah ta.