ISAI 42:24 - Mara Bible RV (BSI)

²⁴ Ahy ma Zakaw cha parutuhpa liata hlâ ta, Izarei cha hraotuhpazy liata a hlâ ha tly? A chô liata eima vaw molei hapa, Abeipa ta a hlâpa châ vei ma? A lâpizy a chhih khoh leipa ei ta, A ryhpa ama zyh khoh leipa, Abeipa ta a hlâpa châ vei ma?

ISAI 42:24 ပူးပေါင်းရင်းမြစ်များ

2 THÂTIHZYRONA 15:6

Ama keichheih khai haw. Khazohpa ta tymâna to ama chô liata a patlôsapa vâta, phopi miakha cha phopi hropa ta parao ta, khihpi miakha ta khihpi hropa a parao.

2 THÂTIHZYRONA 36:17

Chavâta âmo a dyuh awpa ta, Abeipa ta Kaldia bei pathyusa ta, ano ta ama satliazy ama supathaihpa o liata zaozi ta thie ta, satlia nata laihsa, machâpa nata pawpi nôpipazy chhao ngiachhiena rai hnei leipa ta thie lymâ ta. Abeipa ta Zerusale khihsawzy cha Kaldia bei ku liata a hlâ khai ha ei.

HLAZY 81:12

Chavâta ama palôh kuhchha awpa ta pasaih na ta, Âmo ryhraona liata sie awpa ei pasai ha ei.

HLAZY 81:13

Aw, ei phopi ta ei bie nathliepa ta, Izarei ta ei lâpizy a vaw chhih ha mawh sala cha,

ISAI 30:15

Abeipa Zehôvâh, Izarei Mo Pathaihpa ta hetana heta a tah: “Rona nata apahâna liata nama pachhana y ta, A thlih thlâh hana nata ngâna liata nama thatlôna a y.” Châhrasala khoh leipa ei chi ta,

ISAI 42:23

Nama hry liata ahy ma, Cha bie lâta a nah pachôh aw ta; Daihti a vaw tlô awpa châta, A palôh hmâhpa ta a nathlie aw?

ISAI 45:7

Khaihna tao na ta, Zohna chhao ei paysa; Sivâphana patlôsa na ta, Chhiena chhao ei paysa; Kei he Abeipa, cha hmo zydua taotuhpa cha ei châ.

ISAI 47:6

Ei phopi chô liata ei hiehâh ta, Ei ryuto râh cha papuapaleipa ta, Âmo cha na ku liata ei cha pie. Zawngiahna rai ama chô liata palâsa leipa chi ta, Machâpazy taihta phaohri a hri ngaitapa na paphaosa ei.

ISAI 48:18

Ei biepiepazy na vaw nathlie ha mawh sala, Na thlalôhna chavah hawhta châ aw ta, Na siana tilaipi chatlaopa hawhta a châ awpa tlai!

ISAI 57:17

 do leipa ta athôhna a hmôpa vâta, Hiehâhpa ta tu na ta; Hiehâhpa ta ei hmia ei nyusai ha aw. Chatanachôta ano palôh khopa lâ sie ta, Chhorupa ta a y lymâ.

ISAI 63:10

Châhrasala Abeipa cha a dyuh ei ta, A Thlahpa Pathaihpa pachâ thata ama parôhsapa vâta, Abeipa cha ama chariahpa lâta a lie ha ta, Ano tlai ta â dyuh ha ei.

ZEREMIAH 44:10

Tanoh taihta a panawh to leipa ei ta, nâmo nata châ pathlatuhpazy hmiakô liata ei sopa ei ryhpa nata ei bieraopazy a chhih khoh leipa ei ta, chi hra veih ei.

ZEREMIAH 5:15

Hy Izarei pathlazy saih u, Moh teh u, nâmo châ dyuh awpa phopi Lâhlapi tawhta ei vaw chhi aw. Cha phopi cha phopi thatlôpa châ ta, Phopi hlôpa a châ. Ama reih na thei leipa phopi châ ta, Ama bie reipa na pahno leipa phopi a châ,” Abeipa ta a tah.

CHAPHÔHTUNA 1:14

“Ei paraona cha raopaky liata chahry pâpa châ ta, Abeipa ta ano ku tlai ta a chahry pâ haw; Ei rao liata pakypa châ ta, Ei tha a pazeisa khai haw; Ei pahnie thei lei awpazy ku liata, Abeipa ta eina hlâ haw.

CHAPHÔHTUNA 1:18

“Abeipa cha a siapa châ ta, A bie a zyh leipa cha keima he ei vaw châ; Chatahrasala Hy phopi zydua saih u, nathlie u la, Ei pasataona he moh tua u; Ei satlia laihsa zy Seichâna lâ ama sie khai ha hih.

DÂNIAH 1:2

Abeipa ta Zudâh bei Zehôki nata Khazohpa o hmobaoh thokhazy cha a ku liata pie ta. Chazy cha Sinâ râh liata a khazoh o lâta siekhei ta, a khazoh sôh o liata soh ta.

AMÔSÂ 3:6

Khihpi liata chiahmie tô ei sala, Zawpi chi leipa ta ama y aw ma? Abeipa ta a patlôsa leipa ta, Khihpi liata chhiena a vaw tlô aw ma?”

MATHAI 22:7

Abei cha a hiehâh ngaita ta, a pheisaihzy tuah ta, cha liany cheituhpazy cha pahleipadia ei ta, ama khih chhao rao ei ta.

RYHPACHANEINA 28:49

“Abeipa ta nâmo châ dyuh awpa ta, khizaw chhâna lâhlapi tawhta phopi miakha pahmôhpi a pathlôpa hawhta vaw tuah aw ta, cha phopi cha a reih nama thei leipa,

RYHPACHANEINA 32:30

Kheihta ma pakha ta sâh kha a chadai thei aw ta, Pano ta thy kha ama parâpaisa thei aw? Ama Lôpanô ta âmo cha zuah ha ta, Abeipa ta a uasa khao leipa vâ ei ta châ vei ma?

RYUREITUHPAZY 10:7

Chavâta Abeipa cha Izarei chô liata a hiehâh ngaita ta, Philistinâ mo ku lâta nata Amawna mo ku lâta Izarei sawzy cha zuah ha ta.

RYUREITUHPAZY 2:14

Chavâta Abeipa cha Izarei chô liata a pathi ia ta, hraotuhpazy lâta âmo cha pie ta, ama hrao haw. Ama chheipâh chariahzy ku liata âmo cha zuah ta, ama chariahzy hmiakô liata a duah thei khao veih ei.

RYUREITUHPAZY 3:8

Chavâta Izarei chô liata Abeipa a pathi ia ta, Izarei sawzy cha Mesôpôtamia bei Kusarisathai lâ a zuah ha ei. Izarei sawzy cha Kusarisathai ry liata kô charie y ei ta.