ISAI 42:11 - Mara Bible RV (BSI)

¹¹ Râhchawhpa nata a khihpizy ta ama ao papua ei sala, Kedâ mo pahrâna khihzy ta ama ao papua mawh ei sy; Selâ khihsawzy thaphapa ta hla sa ei sala, Tlâh lakizy tawhta awh mawh ei sy.

ISAI 42:11 ပူးပေါင်းရင်းမြစ်များ

ÂTHAONA 25:23

Abeipa ta a hnohta, “Na chhi chhôh liata râh miano y ta, Na py chhôh tawhta phopi miano a vaw pua aw; Phopi miakha cha ahropa hlâta a thatlô via aw ta, A uhthei viapa ta a seihnai viapa a chakao aw,” tah ta.

HLAZY 120:5

Mese mo râh liata y na ta, Kedâ mo poh ozy hry liata pahrâpa cha, Ei hu a po kaw dia!

ISAI 12:5

A hmo rônahpa taopazy vâta, Abeipa lâ reithaina hla sa u la, Cha cha khizaw zydua liata pahnosapa châ mawh sy.

ISAI 16:1

Râh ryureituhpa châta mietakutaw paphao u la, Selâ tawhta râhchawhpa lâpi a chhihpa ta, Zaio sawchanô tlâh lâ paphao muh vy.

ISAI 21:16

Abeipa ta ei hnohta hetana heta a tah: “Hria hlaopa kô reizie ta reipa ta, kô kha chhôh ta, Kedâ mo rônahna zydua cha a chhâ khai aw.

ISAI 32:16

Cha tina cha râhchawhpa liata adona charei aw ta, Lei phapa lyu cha siana ta a ypâ aw.

ISAI 35:1

Râhchawhpa nata râh raohpa zy a ly aw ei ta, Sadi su chhao thaphapa ta y aw ta, Rôspaw hawhta a pawh aw.

ISAI 35:6

Pheisypa sakhih hawhta a chapie aw ta, Reih pathlie thai leipa paleih chhao, Thaphapa ta hla a sa aw. Râhchawhpa liata tizy pua aw ei ta, Sadi bypizy liata vahtie tizy ama loh aw.

ISAI 40:3

Ao vaw paro ta, hetana heta a tah: “Râhchawhpa liata Abeipa lâpi a chhuahdy u la, Râh raohpa liata eima Khazohpa châta Lâlai patlâpa tao teh u.

ISAI 43:19

Moh teh u, hmo thiehpa tao aw na ta, Tahmâ tlai chhao he y ha ta, Hmô veih ei chi ma? Râhchawhpa liata lâpi tao aw na ta, Râh raohpa liata chavahzy ei tao aw.

ISAI 52:7

Thlalôhna bie phuahpa ta, Lôtlâhna bie vaw tlôkhei ta, Zaio pachhana phuahpa ta, Zaio hnohta, “Na Khazohpa ta ryu a reih,” a tahtuhpa, Tlâhzy liata thâtihpha a vaw tlôkheituhpa phei cha, Â ngia ngaita kaw dia!

ISAI 60:7

Kedâ mietaku zawzy nâ lâ a vaw hmaoh aw ei ta, Nebaiô mietaku tôhpazy ­ta ama cha chakao aw. Ei maisâh liata hlâ awpa châta a pyh tlâhpa châ aw ei ta, Ei o rônahpa cha ei parônahsa via rili aw.

ZEREMIAH 21:13

“Hy saikao liata a pahrâpazy saih u, Ei châ dyuh ei; Hy bypi lôpanô, Ei châ dyuh. ‘Ahy ma miah a zuhnao aw ta, Ahy ma eima ynazy liata a vaw ngia aw?’ A tah tyhpazy saih u, Ei châ dyuh ei,” Abeipa ta a tah.

ZEREMIAH 48:28

“Hy Môabâ râhsawzy saih u, Khihpizy puasaipa ta, Lôkâhpa liata pahrâ u la, Khaohtlô pâhchhô liata a bu a tuhpa Vachhuh hawhta y teh u.

ZEREMIAH 49:16

Nâ lôkhaohzy liata pahrâ chi ta, Tlâh laki liata a tlaih tyhpa y, Chichhihna na taopa ta cha dôvei ta, Na palôh apalaina ta a cha dôvei haw. Pahmôhpi bu tlu ta a sâhpa ta na bu tu hra la, Cha tawhna chata ei châ dao pathlah aw,” Abeipa ta a tah.

ZEREMIAH 49:31

“Thyu u la, chhôhmohpa ta a ypa phopi cha a kei dyuh u la, Thlalôhpa ta a ypa phopi cha a kei dyuh teh u; Thokhy chhikaozy nata a hraina lâzy hnei leipa ta, Âmo dei ta khih a sapa phopi cha siehnao teh u,” Abeipa ta a tah.

EZEKIA 27:21

Arabia mo nata Kedâ beimachâ zydua cha mietakutawzy, mietaku tôhpazy nata miezy ta sôh na palielâh khoh kawpazy châ ei ta, hezy heta na hmozy ama cha ri tyh.

ÔBADIA 1:3

Nâ lôpanô keina liata y chi ta, Su sâhpa liata pahrâpa ta, “Ahy ma alei lâ nâ pathla thei aw?” Na palôh liata a tahtuhpa y, Na palôh laina ta a cha dôvei haw.

NÂHU 1:15

“Moh teh u, tlâhpizy liata thâtihpha vaw tlôkhei ta, Adyhna bie a vaw phuahtuhpa pheizy huh! Hy Zudâh, na kyhchhizy tao lymâ la, Na bietaizy patlô mah y; Moleipa cha tlokhuh chhawh pathlah hapa châ ta, Cha chapia heih beih khao aw vei.”