HÔSIA 14:3 - Mara Bible RV (BSI)

³ Asuria ta miah pachha leipa aw ta, Arâzy kiah khao aw ma pi. Keimo ku ta taopa hmozy lâta, ‘Eima khazohzy nama châ,’ Tah khao hra aw ma pi. Hârapa ta nâ liata Zawngiahna a hmô tyh.

HÔSIA 14:3 ပူးပေါင်းရင်းမြစ်များ

2 THÂTIHZYRONA 16:7

Cha nota hrohsopa Hânani cha Zudâh bei Âsâ la a vy ta, a hnohta, “Abeipa na Khazohpa liata a pahnieh leipa chi ta, Aramia bei liata nâ pahniehpa vâta, Aramia bei pheisaihzy na ku tawhta ama pua haw.

HLAZY 10:14

Na hmô mâh tâh, Ruchhôna nata nôchhiena zy ngiapa ta, Na ku liata soh chi ta; Dyhchhiepa ta cha pangai ta, Paw hnei leipa baotuhpa na châ.

HLAZY 146:3

Abeizy a ngâchhâ leipa la, Chyhsa sawzy chhao a ngâchhâ khah y, Ano liata pachhana y vei.

HLAZY 146:9

Abeipa cha mapaihpazy vaih ta, Nôhmei nata paw hnei leipazy a deichhy tyh; Hmoparaopazy hro deikua cha, Âbôkalie lâta a paysa tyh.

HLAZY 33:17

Arâ cha pachhana châta apahniehna doleipa châ ta, A thatlôna rônahpa ta pachha thei vei.

HLAZY 68:5

Ano cha a pahrâna su pathaihpa liata a ypa Khazohpa châ ta, Paw hnei leipazy châta paw châ ta, Nôhmeizy a duakheituhpa a châ.

ISAI 1:29

Nama mopakiapa ôkâ thozy zakhei aw ei chi ta, Sadô namâ tlyhpazy vâta nohzaopa ta nama y aw.

ISAI 2:20

Cha noh liata cha chyhsazy ta, A chhy awpa ta âmo ta amâ taopa, Tâkâ nata ngôh nothlahpazy thy aw ei ta, Zabihzy nata pazu tâbalâpazy pahrâ nawpa ta ama siesai aw.

ISAI 27:9

Chavâta he hmo he hmâpa ta, Zakaw thaileichâna cha chatlaipa châ aw ta, He he a moleina pasiena thei cha a châ aw: Chinaih lôzy pakeichheihpa hawhta, Nothlahpa khazoh maisâhzy liata alô zydua cha, Izarei ta a pakeichheih khai tita, Aseri tôhzy a duah khao leipa aw ta, Ropahâhpa maisâhzy a duah khao aw vei.

ISAI 30:16

“Châ vei! Arâ kiah aw pi ta, Eimâ râ ha aw,” tah ei chi ta, Chavâta namâ râ tlai aw; “Arâ chahrapa eima kiah aw,” tah ei chi ta, Chavâta châ chadaituhpazy chhao, Chahra ngaitapa ama châ aw.

ISAI 30:2

Phiraoh thatlôna a chhaipa ta, Izi nohpahlipa liata a nyu awpa ta, Kei nâ saohiah tua leipa ei ta, Izi râh lâ zu awpa ta amâ thao.

ISAI 31:1

Baona hia awpa ta Izi râh lâ zu ta, Arâzy liata a pahniehpazy cha, Ama hu a po na! Izarei Mo Pathaihpa lâ moh leipa ei ta, Abeipa a saohiah hra veih ei; Talailih hluhpi hneina liata ama ngâna tlao pahnieh ei ta, Arâ pheisaih thatlôpazy liata tlao amâ pahnieh.

ISAI 31:3

Izi mo cha Khazohpa châ veih ei, Chyhsapa dei ama châ; Ama arâzy chhao thlahpa châ veih ei, Sapa dei ama châ. Abeipa ta a ku a pazawh tita la, Baotuhpa a chapia aw ta, A baopa chhao pao aw ta, Ama zydua ta hmaohkha ta ama leidia aw.

ISAI 36:8

Tahmâ a vy la, ei zibeipa Asuria bei hnohta sôhkâ pie awpa ta bie a taih teh. Keima lâ tawhta cha, arâ pheisaih sâh no na hnei khiahta cha, arâ sâh no ei cha pie aw.

ZEREMIAH 49:11

Paw leipa na sawzy cha siesai mah y, Kei ta ei hrôbieh aw ei; Na nôhmeizy chhao, Kei liata a pahnieh mawh ei sy.”

EZEKIA 36:25

Ti pathaihpa cha thia aw ei na ta, nama pathaih leina zydua tawhta vaw pathaih aw ei chi ta, nama khazoh nothlahpa zydua tawhta chhao ei cha pathai aw ei.

EZEKIA 37:23

Ama khazoh nothlahpazy nata ama hmo pasichhihpazy ta a papuapalei khao leipa aw ei ta, ama paraonazy ta a papuapalei khao aw veih ei. Ama moleina nata hnôh amâ syna zydua tawhta pachha aw ei na ta, ei pathaisa aw ei. Ei phopi châ aw ei ta, ama Khazohpa ei châ aw.

HÔSIA 12:1

Epharai cha ziza chahâpa ta, Noh y ta nochhi thlih a chadai ta, Haiphiana nata atudaina ama papôhsa. Asuria nata biehrai tao ei ta, Izi râh lâ sathaw ama paphao tyh.

HÔSIA 13:2

Tahmâ chhao molei via rili ei ta, Ama tâkâ ta leihpa nothlahpazy amâ tao; Cha zydua cha âmo pachâpalipa ta Zôthaipazy taopa sai a châ. Chavâta âmo kyh liata, “Atheihna a hlâpazy ta Viahchaotaw amâ pahnâ,” Ama tah tyh.

HÔSIA 14:8

“Hy Epharai, Nothlahpazy cha khâpa ma ei taona aw? Kei he châ chyh-eituhpa cha châ na ta, Châ mohôhtuhpa ei châ. Meisah tho hrohpa hawhta châ na ta, Keima tawhta na theizy na hmô.

HÔSIA 2:17

“Bâlâ mohzy a pakah tawhta thy aw na ta, Ama mohzy reipa châ beih khao aw vei.

HÔSIA 4:12

Ei phopi ta ama tho nothlahpa a saohiah ei ta, Ama tho chôchahrei tawhta bietapazy ama dao. Sihryhna thlahpa ta lâpi paviasa ei ta, Ama Khazohpa amâ pheisai haw.

HÔSIA 5:13

Epharai ta a pasana hmô ta, Zudâh ta a hmah a hmô nahta; Epharai cha Asuria lâ sie ta, Bei rônahpa lâ chyhsa a tuah. Châhrasala ano ta Cha patlâh thei leipa aw ei ta, Nama hmah paphasa thei aw vei.

HÔSIA 7:11

Epharai cha vachhuh lyu ta, Dôvei nao ta, palôh hnei vei; A châh ta Izi awsao ei ta, A châh ta Asuria lâ ama sie.

HÔSIA 8:6

Viahchaotaw cha Izarei ta a taopa châ ta, Syudaihpazy ta ama daipa a châ; Khazohpa châ vei. Samâri viahchaotaw cha, Pakeichheih khaipa a châ aw.

HÔSIA 8:9

Epharai cha râh alâ ano dei ta a tlaihpa châ ta, Asuria lâ khy ei ta, Ama khopawzy ama kaw chalei.

ZAWNA 2:10

Chatawhcha Abeipa ta nga cha biepie ta, nga ta Zawna cha ngiahkâ lâ vaw pali ha ta.

ZEKARIA 13:2

“Pheisaihzy Abeipa ta hetana heta a tah: Cha noh liata khazoh nothlahpa mohzy cha râh tawhta phie aw na ta, a thei thlâh khao aw veih ei. Hrohsopazy nata thlahpa puapazy chhao râh tawhta ei papua khai ha aw ei.

ZAWHÂNA 14:18

“Hârapa ta cha siesai aw veih ei na, nama hnohta ei vy heih aw.

RYHPACHANEINA 17:16

Bei cha arâzy deikua a hluhpi a hnei awpa châ leipa ta, arâ hluhpi hnei thei nawpa ta Izi râh lâ chyhsa a tuah awpa châ vei. Abeipa ta, ‘Tahmâ tawhta cha, cha lâpi lâ nama kua beih khao awpa châ vei,’ cha tah ha tlôh ei ta.