HÔSIA 10:12 - Mara Bible RV (BSI)

¹² Na châta siana chi tu la, Kyhpachâna tleih beih leipa thei hria mah y; Na râhmâhpa palie bâ teh. Tahmâ he Abeipa tlua daihti cha a châ hih, Chatanachata a vy aw ta, Na chô liata siana avâ a pasuasa aw.

HÔSIA 10:12 ပူးပေါင်းရင်းမြစ်များ

HLAZY 105:4

Abeipa nata a thatlôna tlua u la, A hmia khâ tlua muh vy!

HLAZY 72:6

Abei cha sibie thlyupa chô liata vâsua hawhta châ sala, Alei a baopa khihti hawhta châ mawh sy!

BIESOZY 11:18

Moleipa cha dôveina hmâpa ta hlao tyh ta, Siana chi a tupa deikua cha lymâ dopa a hmô tyh.

BIESOZY 18:21

Paleih hmotaotheina liata thina nata hrona y ta, A pasôtuhpazy ta a theizy ama nie aw.

BIECHHOTUHPA 11:6

My ta chi tu la, zâlâ chhao na ku pako thlâh ha khah y. Kheihawhpa ma a pyuh aw, he he ma, hao hao ma, a miano ta ama pha aw ma, tahpa zy pahno va chi.

ISAI 30:23

Chhaohlei liata na tupa chizy châta Abeipa ta vâsua cha pie aw ta, chhaohlei tawhta niedo phapa hluhpi a pua aw. Cha noh liata, nama sahrohzy cha sibiepa su kawhpazy liata ama lao bâ aw ei ta,

ISAI 31:1

Baona hia awpa ta Izi râh lâ zu ta, Arâzy liata a pahniehpazy cha, Ama hu a po na! Izarei Mo Pathaihpa lâ moh leipa ei ta, Abeipa a saohiah hra veih ei; Talailih hluhpi hneina liata ama ngâna tlao pahnieh ei ta, Arâ pheisaih thatlôpazy liata tlao amâ pahnieh.

ISAI 32:20

Chavah kiah to liata chi cheih aw ei chi ta, Viahchao nata alâ zy kho ta patlaihsapa ta, Thaphapa ta nama y aw.

ISAI 44:3

Râh dâhphipa liata ti bao aw na ta, Alei hipa liata vahtie tizy ei palosa aw. Na chipathla chô liata ei Thlahpa hry aw na ta, Na pathlazy chô liata ei byhnâ ei hry aw.

ISAI 45:8

“Avâzy saih u, chô lâ tawhta vâkatlâ patlasa u la, Meihdozy tawhta siana avâ za suah mawh sy. Alei a pahy sala, Pachhana chhyh kaw thao mawh sy; Siana chhao a chhyh kaw thao sala, Pachhana nata pyuh khoh mawh sy; Kei Abeipa heta chazy cha ei paysapa a châ.

ISAI 48:18

Ei biepiepazy na vaw nathlie ha mawh sala, Na thlalôhna chavah hawhta châ aw ta, Na siana tilaipi chatlaopa hawhta a châ awpa tlai!

ISAI 5:6

Sadô rypa ta tao aw na ta, A chiahzy taipa châ khao leipa aw ta, A lyu thlyupa châ khao hra leipa aw ta, Diahsai nata ahlohzy tlao a pyu awh. Sadô chô liata avâ suah lei awpa ta, Meihdozy chhao bie ei pie ha aw ei.

ISAI 54:14

Siana ta paduapa châ aw chi ta, Tlybaina tawhta lâhlapi ta na y bâ awpa vâta, Chi khao aw va chi; Chichhihpa tawhta lâhlapi ta y aw chi ta, Châ hnia khao aw vei.

ISAI 55:6

“Hmô thei awpa ta a y nota Abeipa cha tlua u la, Â hnia nona heta aw teh u!

ZEREMIAH 50:4

“Cha nohzy liata nata cha daihti liata, Izarei sawzy nata Zudâh sawzy hmaohkha ta amâ vy aw; Chana chôta a vy aw ei ta, Abeipa ama Khazohpa ama tlua aw,” Abeipa ta a tah.

EZEKIA 34:26

Âmo nata ei tlâhthlôh chaby suzy cha byhnâ pachâsa aw na ta, a daihti ta avâ pasuasa tyh aw na ta, vâ byhnâzy a vaw suah aw.

HÔSIA 12:6

Na Khazohpa lâ kua la, Ngâchhihna nata adona patu la, Na Khazohpa cha khâ ngâ mah y!

HÔSIA 14:1

Hy Izarei, kua la, Abeipa na Khazohpa lâ kua mah y; Na moleina vâta na pao ha hih!

HÔSIA 6:3

Abeipa pahnona chadai sih la, Ano cha pahno lymâ suh u; Khihdei awpa a siapa hawhta, Ano chhao â vaw luah tlai aw. Vâsua hawhta keimo lâ a vy aw ta, Châhvâ vâsua ta chhaohlei a padâpa hawhta â vy aw.”

HÔSIA 8:7

Ziza chi tu ei ta, Khisô tlao ama hria aw. Sâh kô a suh leipa ta a duah ta, Viahdie papua aw vei. Sâh hria awpa a ypa chhao ta, Chihropazy ta ama nie aw.

AMÔSÂ 5:15

Chhiena a haopa ta phana khoh u la, Thokhy chhikao liata ryureina dopa padua teh u; Cha hawhta nama tao khiahta cha, Zehôvâh, Pheisaihzy Khazohpa ta Zawsi chi laibâhpazy cha, A ngiachhie thei ngyu aw.

AMÔSÂ 5:4

Abeipa ta Izarei phopi hnohta hetana heta a tah: “Kei na tlua u la, Nama hroh aw.

AMÔSÂ 5:6

Abeipa tlua u la, Nama hroh aw; Chataleipatala Abeipa cha, Zawsi pathlazy hry liata mei hawhta vaw pua aw ta, Kâ aw ta, a pachhai awpa Bethel liata y aw veih ei.

AMÔSÂ 5:8

Awhsicharu nata Vaothawlâpia zy tao ta, Thina nohpahli cha my pachâsa ta, Chhô chhao zâ zohpa ta taopa ta, Tilaipi tizy aw ta alei chô lia a patlaituhpa cha, A moh Zehôvâh a châ.

LUKA 13:24

“Chhikao buahpa liata a ngia a chhuah lylia teh u. Ei cha chho ei, chyhsa hluhpi ta a ngia a chhuah aw ei ta, a ngia thei aw veih ei.

HMOTAOPAZY 2:18

Cha nohzy liata cha, Nâ chakaotuhpa nata nâ chakaotuhnô liata Ei Thlahpa hry aw na ta, Hrohsona bie ama phuah aw.

2 KAWRINI 9:10

Chitutuhpa hnohta chi a pietuhpa nata nie awpa châta viahchhâ a pietuhpa ta nama tu awpa chi cha pie aw ei ta, chi cha papôhsa aw ta, nama siana thei hluhpi a patheisa aw.

ZÂMIE 3:18

Siana thei cha adyryhna taotuhpazy ta adyryhna liata chi ama tupa patheipa a châ.