HMOTAOPAZY 2:11 - Mara Bible RV (BSI)

¹¹ Zu chyhsa nata Zu phohlypazy a pahlao pi ta, Krite mozy nata Arabia mozy chhao y hra ei ta, kheihtazie ta Khazohpa hmotao rônahpazy ama reipa eima reih chyu ta eima thei khai thlâh haw?” tah ei ta.

HMOTAOPAZY 2:11 ပူးပေါင်းရင်းမြစ်များ

1 ABEIZY 10:15

Chazy cha sôdaohpazy, sôhpaliepazy, notla bei zydua nata râh ryureituhpazy ta râhpaw ama piepazy thota Sawlawmaw liata a ngiapa ngôhzy a châ.

2 THÂTIHZYRONA 17:11

Philistinâ mo thokhazy ta Zehôsaphâ cha kuhria nata râhpaw châta tâkâ zy vaw pie ei ta. Arabia mo chhao ta mietaku tôhpa 7,700 nata mie 7,700 ama vaw phaopa hra.

2 THÂTIHZYRONA 26:7

Philistinâ mo nata Kubâlâ liata a ypa Arabia mo nata Muni mozy â dyuhna liata Khazohpa ta bao ta.

ZAWBÂ 9:10

Ano cha hmo rônahpa pahno thei leipa taotuhpa châ ta, Hmo noâhpa rei tiah leipazy taotuhpa a châ.

HLAZY 107:15

A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

HLAZY 107:21

A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy.

HLAZY 107:8

A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

HLAZY 111:4

Hmonoâhpa a taopazy cha khâ a thei thlâh awpa ta tao ta, Abeipa cha ngiachhiena nata zawngiahna a hneipa a châ.

HLAZY 136:4

Hmonoâh rônahpazy taotuhpa a y chhôhpa hnohta alyna bie reih teh u, A kyhpachâna tlyzaw ta a daihpa a châ.

HLAZY 26:7

Alyna biereina tlâh awhpa ta, Na hmotao noâhpa zydua ei chho aw.

HLAZY 40:5

Hy Abeipa, ei Khazohpa, Na hmotao noâhpazy he thata châ ta, Miah na pachânazy he thata a châ kaw dia! Nâma nata pakho tlâh y tlâ veih ei. Chazy cha phuahpa ta ei chhopa chhao ta, Chho khai tiah awpa châ vei.

HLAZY 71:17

Hy Khazohpa, ei hawti no tawhta na pachu chi ta, Tanoh taihta na hmotao noâhpazy ei phuah lymâ.

HLAZY 77:11

Abeipa hmotaopazy a thei thlâh ha aw na ta, A châ na, hlâno ta na hmonoâh taopazy ei thei thlâh ha aw.

HLAZY 78:4

Ama pathlazy phih leipa aw pi ta, Chhâ a vaw y awpa hnohta tlao eima chho aw; Abeipa hmotao rônahpa nata a thatlônazy chho aw pi ta, Hmonoâhpa a taopazy eima chho aw.

HLAZY 89:5

Hy Abeipa, avâzy ta na hmonoâhpazy reithai ei sala, Mopathaihpazy pakhypi liata na ngâchhihna reithai mawh ei sy!

HLAZY 96:3

Râhzy liata a rônahzie phuah u la, Phopi zydua hnohta a hmotao noâhpazy phuah teh u!

PUASAINA 15:11

“Hy Abeipa, khazohzy hry liata Nâ hawhpa he ahy ma a y? Pathaihna liata beichaipa châ chi ta, Rônahna liata zachhihpa na châ; Hmonoâhpazy a taotuhpa châ chi ta, Nâ hawhpa he ahy ma a y?

ISAI 13:20

Khati ta hmahta, Cha liata chyhsa pahrâ khao leipa aw ei ta; Chhâ zydua ta, A chhôh liata chyhsa y khao aw veih ei. Arabia chyhsazy ta, Cha liata ama poh o parai khao leipa aw ei ta; Mietaku vaituhpa ta, Cha liata ama mietaku zawzy pabyusa khao aw veih ei.

ISAI 21:13

He he Arabia kyh chhochhieliena bie a châ: Hy Dedâ sôhpaliepa khitlyhpazy saih u, Arabia râhmâhpa liata a rie u la,

ISAI 25:1

Hy Abeipa, nâ cha ei Khazohpa na châ; Cha cheihchalo aw na ta, Na moh ei reithai aw. Hmonoâhpazy a tao chi ta, Hlâno tawhta na pachhuapanohpazy cha, Ngâ a chhih ei ta amâ do.

ISAI 28:29

Cha pahnona chhao cha, Pheisaihzy Abeipa tawhta a vypa a châ; Ano cha ryhraotuh noâchhihpa châ ta, Sona kipa a hneipa a châ.

ZEREMIAH 25:24

Arabia bei zydua nata râhchawhpa liata a pahrâpa chipho a pahlaopa pathla zydua;

ZEREMIAH 3:2

“Awphy tlâh lakizy lâ khi ua la, sai tua rai, Ama châ ziakhei leina su a y ma? Râhchawhpa liata Arabia chyhsa hawhta, Na khopawzy hâpa ta lâkiahzy liata a tyuh tyh chi ta, Na sihryhna moleinazy ta râh na papuapalei haw.

HMOTAOPAZY 2:10

Pharuzia râh liata a ypazy, Pamphulia râh liata a ypazy, Izi râh liata a ypazy, Libia râh Kurini khih liata a ypazy nata Rawma khihpi tawhta khi a vaw tlyhpazy châ pi ta,

HMOTAOPAZY 2:12

Ama zydua ta ama noâh kaw ta, a pachâna rai pahno leipa ei ta, “He he khâpa ma a yzie tly?” tah ei ta.

HMOTAOPAZY 27:12

Balyh apahâna su cha chasipaw daihti hmâ nawpa châta â ryh leipa vâta, a hluh via ta sie awpa pha tah ei ta. Phôni khih chhâ ama tlô thei khiahta cha, cha liata chasipaw daihti hmâ awpa a phapa ta pahno ei ta. Phôni khih cha Krite liahpahlô liata balyh apahâna miakha châ ta, chho notla lâ nata maw notla lâ a heihpa a châ.

HMOTAOPAZY 27:13

Chho thlih nai zualuapa a vaw pathli nahta, ama khozie hawhta a châpa ta pachâ ei ta, thua cha-ia chalo ei ta, Krite liahpahlô ngiahkâ chheipa ta sie ei ta.

HMOTAOPAZY 27:7

Noh hluhpi dusawta ta sie pi ta, vâsâ ta Knidu khih dady tlô pi ta, thlih ta eima hmia lâ tawhta miah a supa vâta, Salmône dady ta thlih a chalihna Krite lâta chahrih pi ta.

1 KAWRINI 12:10

Thokha hnohta hmonoâhpa tao theina piepa châ ta, ahropa hnohta hrohsona bie phuah theina piepa a châ. Chyhsa hropa hnohta thlahpa nanopazy pahrua thaina piepa châ ta, mohropa hnohta reihtheileipa ta bie rei theina piepa châ ta, ahropa hnohta reihtheileipa chhopasia theina piepa a châ.

1 KAWRINI 12:28

Khazohpa ta Awnanopa liata chakaotuhpazy rao ta, miakhana liata lyuhchâpazy, mianona liata hrohsopazy, miathôhna liata pachutuhpazy a rao. Cha khai tawhta hmonoâhpa taotuhpazy, patlâhna hmopiepa a hneipazy, chyhsa bao khohna hmopiepa a hneipazy, ryurei thaina hmopiepa a hneipazy nata reihtheileipa hmopiepa a hneipazy a rao ei.

KALATIA 1:17

Kei hlâta lyuhchâpa a châ tuapazy a hmô awpa ta Zerusale lâ khy hra va na. Arabia râh lâ tlao sie na ta, Dâmaskâ khih lâ ei vaw lie heih.

KALATIA 4:25

Hâkarâ cha Arabia râh liata Sinai Tlâh châ ta, a sawzy chhaota sei ta a ypa ama châpa vâta, tahmâno ta Zerusale vyuhpa ta a duahpa a châ.

TITU 1:12

Krite chyhsa, ama hrohsopa cheingei ta, “Krite chyhsazy cha haihthaipazy, sahrâh moleipazy, thathi rikawhpa zy ama châ zôzaw,” tahpa ta reih ta.

TITU 1:5

Hmo pasia khai leipazy pasia awpa nata bie ei cha piepa hawhta khi to liata Awnanopa chhituhpazy rao awpa ta, Krite liahpahlô liata ei cha siesaipa kha a châ.

HEBRAI 2:4

Khazohpa chhao ta ngianazy, hmonoâhpazy nata hmotaotheina to ta nata a khozie hawhta Thlahpa Pathaihpa hmopiepazy piepa ta a pahnokhei.