Abeipa hmiakô liata a chalih la, Ano cha hâ hualua mah y. Moleipa a dyhpha tita na pachâ chhie leipa sala, Chhiena a patlôsatuhpa chyhsa vâta na pachâ chhie hra khah sy!
Cha noh liata hetana heta ama tah aw: “Moh teh u, he he eima Khazohpa cha châ ta, Miah pachha awpa ta eima hâpa Khazohpa cha a châ hih. He he Abeipa cha châ ta, Ano tlai he eima hâpa a châ hih. A pachhana liata a ly ei sih la, Thaphapa ta y ei suh u.”
Chatahrasala Abeipa cha, Cha ngiachhie awpa ei ta cha hâ thlâh ha ei ta; Nama chô liata zawngiahna palâsa awpa ta, Anosasyh ta â cheihchalo aw. Abeipa cha adona Khazohpa châ ta, Ano a hâtuhpazy cha vânoh ama to aw.
Abeipa a hâtuhpazy deikua cha, Ama thatlôna pathieh aw ei ta, Pahmôhpi hawhta mathlaw ta amâ zaw aw; A râ aw ei ta, Ama tha chhâ leipa aw ta; Sie aw ei ta, Panao aw veih ei.
Aluahna cha a daihti raopa hâ chy ta, Chhâna kyh reih ta, Rei chhei aw vei. Vaw tlô mâh vei hra sala, Hâ hualua mah y; A vaw tlô thlyu aw, Hawh aw vei.
Cha daihti liata, chyhsa pakha, a moh Simeôna ama tahpa Zerusale liata y ta. Ano cha chyhsa siapa nata Khazohpa a chipa châ ta, Izarei thlapalôh nawpa daihti a hâpa, Thlahpa Pathaihpa a hneipa chyhsa a châ.
Unawhzy ta eima thâtih ama thei nahta, a vy ei ta, Apia Daohpi nata Khichhai Bu Miathôh ama tahpa taihta miah vaw dy ei ta. Âmo cha a hmô nahta, Pawla cha Khazohpa lâ alyna bie reih ta, thlalôhpa ta y ha ta.